ဇန်နဝါရီ-၁၂၊၂၀၂၆။အိမ်သွင်/People’s Spring
မိုးကုတ်နဲ့ မိုးမိတ်မြို့ကြားမှာ တိုက်ပွဲပြင်းထန်နေပြီး မိုးမိတ်မြို့အဝင်ကို အာဏာသိမ်းစစ်တပ်က ပိတ်ဆို့ထားတယ်လို့ ဒေသခံတွေကပြောပါတယ်။
“ပစ်ခတ်သံတွေကိုမိုးမိတ်မြို့ထဲကပါကြားနေရတာ။ဆူညံနေတာပဲ။စစ်တပ်ကမိုးမိတ်အဝင်ကို ပိတ်ထားတယ်။မြို့ထဲကနေလည်း လက်နက်ကြီးတွေပစ်နေတယ်”လို့ဒေသခံတစ်ဦးကပြောပါတယ်။
တိုက်ပွဲက မိုးကုတ်ဘနဲ့ မိုးမိတ်မြို့နယ်အစပ်ဖြစ်တဲ့ ထုံးဖိုရွာ၊ ဟွေလိပ်ရွာ၊ ကုန်းမကန်းရွာက တောင်ကြောတစ်လျှောက်မှာ ဇန်နဝါရီလ ၁၀ရက်နေ့က စပြီးပြင်းထန်နေတာလို့ သိရပါတယ်။
Public Service Announcement
တအာင်းတပ်(TNLA)က မိုးကုတ်နဲ့မိုးမိတ်မြို့ကို စစ်ကောင်စီထံ ပြန်ပေးအပ်ပြီးတဲ့နောက်ပိုင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD) စစ်ရုံးချုပ်က မိုးကုတ်-မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာလ (၉) ရက်နေ့မှာစတင်ဖွဲ့စည်းခဲ့ပါတယ်။အဲဒီနောက်နိုဝင်ဘာလ၃၀ရက်ကစပြီးစစ်တပ်စစ်ကြောင်းတွေကို တိုက်ခိုက်ခဲ့တာဖြစ်ပါတယ်။
နိုဝင်ဘာလ (၃၀) ရက်က နေ ဒီဇင်ဘာလ ၂၄ရက်အတွင်း တိုက်ပွဲကြီးငယ်ပေါင်း ၂၀ ကျော်ဖြစ်ခဲ့ပြီးစစ်တပ်စခန်း တချို့ကို သိမ်းပိုက်နိုင်ခဲ့သလို စစ်ကောင်စီတပ်ဖွဲ့ဝင် ၁၈ဦး သေဆုံးပြီး ၃ဦးဖမ်းမိထားတယ်လို့ MODက ထုတ်ပြန်ပါတယ်။စစ်ကောင်စီတပ်တွေရဲ့အုပ်ချုပ်မှု၊ ကွပ်ကဲမှု၊ ထောက်ပံ့မှု ရပ်ဝန်းတွေကို အထူးစစ်ဆင်ရေးဖော်ဆောင်ပြီး အဆက်မပြတ်တိုက်ခိုက်နေတယ်လို့ ကာကွယ်ရေးဝန်ကြီးဌာနက အသိပေးထားပါတယ်။
မိုးကုတ်မြို့မှာဇန်နဝါရီလဆန်းကလည်း စစ်တပ်စွဲထားတဲ့နေရာတချို့ဒရုန်းနဲ့ဗုံးကြဲတိုက်ခိုက်ခံခဲ့ရသလို လက်နက်ကြီးပစ်ခတ်သံနဲ့ပေါက်ကွဲသံတွေကြားနေရတယ်လို့ ဒေသခံတွေကပြောပါတယ်။
မိုးကုတ်မြို့နယ်ထဲမှာ တိုက်ပွဲဆက်ဖြစ်နေချိန်စစ်ကောင်စီက ရဲနဲ့ ပျူစောထီးတွေပို့ထားပြီး စစ်တပ်ဆန့်ကျင်တဲ့သူတွေကို ပစ်မှတ်ထားပြီး စုံစမ်းနေပါတယ်။
မိုးမိတ်မြို့မှာလည်း စစ်ကောင်စီတပ်တွေထဲက စစ်မှုထမ်းသင်တန်းဆင်းတွေ ထွက်ပြေးတာတွေဖြစ်နေပြီး ပြီးခဲ့တဲ့ ဇန်နဝါရီလ ၂ရက်နေ့မှာ ၄၀ ဦး ထွက်ပြေးလို့ စစ်တပ်က ပိတ်ဆို့ရှာဖွေခဲ့ပါတယ်။လက်ရှိဆက်လက်ဖြစ်ပွားနေတဲ့တိုက်ပွဲတွေနဲ့ပတ်သက်လို့ NUGက သတင်းမထုတ်ပြန်သေးပါဘူး။
