ဇန်နဝါရီ – ၂၇ ၊၂၀၂၆ ၊ဆိုင်းမင်း/People’s Spring
စစ်ကောင်စီတပ်ရဲ့အလယ်ပိုင်းတိုင်းစစ်ဌာနချုပ် (လပခ) တည်ရှိရာ မန္တလေးမြို့မှာ ဒီနေ့ (ဇန်နဝါရီလ ၂၇ ရက်) မနက်ပိုင်းက ပစ်ခတ်သံတွေကြားရပြီးနောက် ဒီနေ့တစ်နေ့လုံးနီးပါး စစ်ဆေးမှုတင်းကျပ်ခဲ့တယ်လို့မြို့ခံအချို့ဆီကသိရပါတယ်။
ဒီမနက်အစောပိုင်း ၄ နာရီခွဲခန့်က မန္တလေးမြို့အနောက်ဘက် ဧရာဝတီမြစ်ဘက်က ပစ်ခတ်သံတွေကို မြို့ခံတွေကကြားခဲ့ရတာပါ။
အဲဒီနောက် မနက်ပိုင်းကစတင်ပြီး မန္တလေးမြို့ပေါ်မှာ စစ်သား ၊ရဲ နဲ့ယာဉ်ထိန်းတို့ပါတဲ့အဖွဲ့တွေက လမ်းသွားလမ်းလာတွေ ၊ ယာဉ်တွေကို စစ်ဆေးတာတွေရှိခဲ့တယ်လို့ သိရပါတယ်။
Public Service Announcement
“မနက်ရုံးသွားချိန်မှာ ရဲတွေအများကြီးပဲ စစ်နေတာ”လို့ အမပူရမြို့နယ်၊တောင်မြို့မှာ နေထိုင်သူတစ်ဦးကပြောပါတယ်။
မန္တလေးမြို့အထွက် မြို့ပတ်လမ်းတဝိုက်မှာလည်းစစ်ဆေးမှုတွေ ရှိခဲ့ပါတယ်။ အလယ်ပိုင်းတိုင်စစ်ဌာနချုပ် တည်ရှိရာ အောင်မြေသာစံ မြို့နယ် မြောက်ပြင်ရပ်မှာနေထိုင်သူအချို့ကလည်း ဒီမနက်ပိုင်းမှာ လက်နက်ကြီး ပစ်ခတ်သံ ကြားရတယ်လို့ဆိုပါတယ်။
Brave Warriors for Myanmar (BWM) အဖွဲ့ကတော့ မန္တလေးနန်းတွင်းရှိအလယ််ပိုင်းတိုင်းစစ်ဌာနချုပ်မှာအာဏာသိမ်းစစ်ခေါင်းဆောင် တည်းခိုနေတယ်ဆိုတဲ့သတင်းအရ ရှော့တိုက်ဒုံးတွေနဲ့ပစ်ခတ်တိုက်ခိုက်ခဲ့တာလို့ထုတ်ပြန်ထားပါတယ်။
ရှော့တိုက်ဒုံး ငါးလုံး နဲ့ပစ်ခတ်ရာမှာ သုံးလုံးက နန်းတွင်းထဲကို ကျရောက်ပေါက်ကွဲခဲ့တယ်လို့ အဲဒီအဖွဲ့က ဆိုထားပါတယ်။
အဲဒီပစ်ခတ်မှုကို BWM အဖွဲ့ရဲ့ ဦးဆောင်မှုနဲ့ No More Dictatorship (NMD-PDF) ၊ Shadow (Mandalay) နဲ့ Infinity (အညာ) အဖွဲ့တွေ ပူးပေါင်းလုပ်ဆောင်ခဲ့တာလို့ သတင်းထုတ်ပြန်ထားတာပါ။
စစ်တပ်ဝါဒဖြန့်တယ်လီဂရမ်ချန်နယ်တွေကတော့ မန္တလေးနန်းတွင်းထဲ လက်နက်ကြီးကျရောက်တယ်ဆိုတာသတင်းမှားတွေ လို့ တုံ့ပြန်ဖြန့်ဝေထားပါတယ်။
အာဏာသိမ်းစစ်ကောင်စီခေါင်းဆောင်ဟာ ရွေးကောက်ပွဲအပိုင်း (၃) ပြုလုပ်တဲ့ ဇန်နဝါရီလ ၂၅ ရက်မှာ မန္တလေး ဆီ လာရောက်ခဲ့ပြီး အလယ်ပိုင်းတိုင်းစစ်ဌာနချုပ်ဆီကိုသွားရောက်ခဲ့ပါတယ်။
