ပိုလန်နိုင်ငံ၊ ခရာကော့ မြို့လယ်မှာ သေနတ်သမား တစ်ယောက်ရဲ့ ပစ်ခတ်မှုကြောင့် ၆ ဦးထက်မနည်း သေဆုံး

ပိုလန်နိုင်ငံ၊ ခရာကော့မြို့လယ်မှာ သေနတ်သမား တစ်ဦးရဲ့ ပစ်ခတ်မှုကြောင့် လူ ၆ ဦးထက်မနည်း သေဆုံးသွားကြောင်း မြို့ခံ ရဲတပ်ဖွဲ့က ပြောပါတယ်။ ဒါ့အပြင် သေနတ်သမားရဲ့ နေအိမ်မှာ နောက်ထပ် အလောင်း ၃ ခုကိုလည်း ရှာတွေ့ထားခဲ့ပါတယ်။

နိုဝင်ဘာ ၇ ရက် ညနေပိုင်းက ပိုလန်နိုင်ငံသား သေနတ်သမား တစ်ဦးဟာ မြို့လယ်ရင်ပြင်နားကို ကားနဲ့ မောင်းဝင်လာရင်း တွေ့သမျှလူတွေကို ကြုံသလို ပစ်ခတ်ခဲ့တာပါ။ အခုတိုက်ခိုက်မှုကြောင့် လူ ၆ ဦး သေဆုံးပြီး ၁၂ ဦးထက်မနည်း ဒဏ်ရာရခဲ့ကြောင်း သိရပါတယ်။ ပြီးတော့ ဒဏ်ရာရသူတွေထဲမှာ ရဲအရာရှိတွေလည်း ပါဝင်ခဲ့ပါတယ်။

အဲဒီနောက် ကနဦး တိုက်ခိုက်မှုနဲ့ သိပ်မဝေးတဲ့ နေရာမှာ ရဲတွေရဲ့ တုံ့ပြန်ပစ်ခတ်မှုကြောင့် သေနတ်သမားက ကျည်ထိမှန် ဒဏ်ရာရသွားခဲ့ပါတယ်။ ဖမ်းမိချိန်မှာ သေနတ်သမားဟာ ပြောက်ကျား စစ်ဝတ်စုံကို ဝတ်ဆင်ထားသလို စစ်သုံး သေနတ်တစ်လက်ကို ကိုင်ဆောင်ထားခဲ့တယ်လို့ ဆိုပါတယ်။

ခရာကော့ ရဲတပ်ဖွဲ့ ပြောရေးဆိုခွင့်ရ အရာရှိ ကက်တာဇီနာ ဆစ္စလိုက ရဲတွေဟာ သံသယရှိသူရဲ့ ကားထဲမှာ နောက်ထပ် လက်နက်တွေနဲ့ ကျည်ဆန်တွေ အများအပြားကိုပါ ရှာတွေ့ခဲ့တယ်လို့ အတည်ပြုသွားပါတယ်။ ဆစ္စလိုက သေနတ်သမားဟာ ပြစ်မှုကို တစ်ကိုယ်တော် ကျူးလွန်ခဲ့ပြီး ကြံရာပါတွေ မရှိဘူးလို့ ယုံကြည်ရကြောင်း၊ လူထုရဲ့ လုံခြုံရေးက လောလောဆယ် စိတ်ချရပြီဖြစ်ကြောင်း ပြောကြားခဲ့ပါတယ်။

Public Service Announcement

ပိုလန် အာဏာပိုင်တွေက သေနတ်သမားကို အသက် ၂၅ နှစ်အရွယ်၊ အစွန်းရောက် အမျိုးသားရေး ဝါဒီတစ်ဦးလို့ ထုတ်ပြန်ထားပါတယ်။ လောလောဆယ်မှာတော့ သူလည်း ဒဏ်ရာတွေကြောင့် ဆေးရုံမှာ ခွဲစိတ်ကုသမှု ခံယူထားရပါတယ်။ ပစ်ခတ်မှုဟာလည်း လက်ယာ အစွန်းရောက် ဝါဒကို အခြေခံပြီး ကျူးလွန်ခဲ့တာလို့ ရဲတွေက ယူဆထားကြပါတယ်။

ရဲတွေက သေနတ်သမားရဲ့ နောက်ကြောင်းကို စုံစမ်းပြီး သူ့အိမ်ကို ဝင်ရောက် စစ်ဆေးတဲ့ အခါမှာတော့ သူ့ရဲ့ မိသားစုဝင်တွေလို့ ယုံကြည်ရတဲ့ အမျိုးသမီး ၂ ဦး၊ အမျိုးသား ၁ ဦးရဲ့ အလောင်းတွေကိုပါ တွေ့ရှိခဲ့ပါတယ်။

မြို့လယ်ရင်ပြင် ပစ်ခတ်မှုမှာ သေဆုံးခဲ့သူတွေကတော့ အမျိုးသမီး ၄ ဦးနဲ့ အမျိုးသား ၂ ဦးဖြစ်ပြီး ပိုလန် နိုင်ငံသား ၃ ဦး၊ ဗြိတိန် ၁ ဦး ပါဝင်တယ်လို့ သိရပါတယ်။ ကျန်တဲ့ သေဆုံးသူ ၂ ဦးကိုတော့ ဘယ်သူဘယ်ဝါဆိုတာ စုံစမ်းနေဆဲပါ။

အခင်းဖြစ်ရာ မြို့လယ် ရင်ပြင်နားမှာတော့ ရဲကားတွေ၊ ဆေးရုံကားတွေ ရှုပ်ရှုပ်ထွေးထွေး ဖြစ်နေတာကို မြင်ခဲ့ရပါတယ်။ မြို့တွင်းမှာ ပြေးဆွဲတဲ့ လျှပ်စစ်ကေဘယ်လ် ဘတ်စ်ကား ယာဉ်မောင်းတစ်ဦးက သူ့ရဲ့ယာဉ်ကို ကျည်ထိမှန်ပြီး မှန်ကွဲသွားရာက ကားတစ်စီးပေါ်ကနေ ရမ်းသမ်းပစ်ခတ်သွားတဲ့ မှုခင်းကို ရဲတွေဆီ တိုင်ကြားခဲ့တာ ဖြစ်ပါတယ်။

ဗီဒီယို မှတ်တမ်းတွေမှာတော့ သေနတ်သမားရဲ့ ကားဟာ မြို့လယ်ဧရိယာကို ဖြတ်မောင်းသွားရင်း လူတွေက ထွက်ပြေးကြတာကို တွေ့ရပြီး သေနတ်သံတွေကိုလည်း ကြားနေခဲ့ရပါတယ်။

ခရာကော့ကို နှစ်စဉ် ကမ္ဘာလှည့်ခရီးသွား ၁၅ သန်းလောက် လာရောက် လည်ပတ်လေ့ရှိပြီး အများစုက မြို့လယ် ရင်ပြင်ဆီ သွားရောက် လည်ပတ်တာကြောင့် အခင်းဖြစ်တဲ့ နေရာဟာ လူစည်ကားနေလေ့ ရှိပါတယ်။ ခရာကော့ဟာ ပိုလန်ရဲ့ ဒုတိယ အကြီးဆုံး မြို့လည်း ဖြစ်ပါတယ်။

ဝါဆောမြို့တော်မှာ ရှိနေတဲ့ ပိုလန် ဝန်ကြီးချုပ် ဒေါ်နယ်လ်တက်စ်ခ်က ရဲတွေဟာ ဖြစ်စဉ်အပေါ် စုံစမ်းမှုတွေ စတင်နေပြီလို့ လူမှုကွန်ရက် မီဒီယာ Xမှာ ရေးသားခဲ့ပါတယ်။ ပိုလန် ဝန်ကြီးချုပ် ကာရိုးလ် နော်ရော့ကီကတော့ ထိခိုက်ဒဏ်ရာရသူတွေ၊ သေဆုံးသူတွေရဲ့ မိသားစုတွေအတွက် အထူးဝမ်းနည်းကြောင်း ထုတ်ပြန်ထားပါတယ်။

ကိုးကား: AP