လေ့ကျင့်ပျံသန်းရင်း ဗြိတိန် တော်ဝင်ရေတပ် ရဟတ်ယာဉ် ပျက်ကျခဲ့တာကြောင့် ၃ ဦး သေဆုံးခဲ့ပါတယ်။
ဒီဗွန်မှာရှိတဲ့ ကွင်းပြင် တစ်ခုကို ရဟတ်ယာဉ် ပျက်ကျသွားတဲ့နောက် မီးသတ်နဲ့ ကယ်ဆယ်ရေး အဖွဲ့တွေက အပူတပြင်း သွားရောက်ခဲ့ကြပါတယ်။ နောက်ပိုင်းမှာတော့ ရေတပ်က ရဟတ်ယာဉ်ပေါ် ပါသွားသူ အမှုထမ်း ၃ ဦး အသက်ဆုံးရှုံးခဲ့ကြောင်း အတည်ပြု ကြေညာခဲ့ပါတယ်။
သေဆုံးသူတွေရဲ့ မိသားစုဝင်တွေဆီ အသိပေးထားပြီး အဲဒီနောက် အချိန်တစ်ခု ကြာမှသာ အသေးစိတ် အချက်အလက် အသစ်တွေကို ထုတ်ပြန်ဖြစ်မယ်လို့လည်း ရေတပ်က ပြောပါတယ်။
ရေတပ် အကြီးအကဲ ဗိုလ်ချုပ်ကြီး ဆာဂွန်းဂျန်ကင်စ်က ဒီသတင်းကြောင့် ရေတပ် အသိုက်အဝန်း တစ်ခုလုံး အထူးတုန်လှုပ်သွားမယ်ဆိုတာ နားလည်ကြောင်း၊ ဖြစ်ရပ်ဆိုးမှာ ထိခိုက်ခံစားခဲ့ရတဲ့ မိသားစုဝင်တွေ၊ ကွယ်လွန်သူတွေရဲ့ မိတ်ဆွေ အပေါင်းအသင်းတွေနဲ့ထပ်တူ ဝမ်းနည်းကြေကွဲမိကြောင်း ထုတ်ပြန်ခဲ့ပါတယ်။
Public Service Announcement
အခင်းဖြစ်တဲ့ နေရာက ဓာတ်ပုံတွေမှာတော့ Merlin Mk4 ရဟတ်ယာဉ်ဟာ လုံးဝဥဿုံ အပိုင်းပိုင်းကြေပြီး ပျက်စီးနေတာကို တွေ့ခဲ့ရပါတယ်။ အခု ပျက်ကျမှု ဖြစ်ပွားတဲ့ ဒတ်မော မြောက်ပိုင်း ဧရိယာမှာ စစ်ဘက် ရဟတ်ယာဉ်တွေ ပုံမှန် လေ့ကျင့် ပျံသန်းလေ့ ရှိပါတယ်။
ရဟတ်ယာဉ် ပျက်ကျရတဲ့ အကြောင်းရင်းကိုတော့ တိတိကျကျ မသိရသေးပါဘူး။ Merlin ကုမ္ပဏီရဲ့ Mk2နဲ့ Mk4 ရဟတ်ယာဉ်တွေကို ဗြိတိန် တော်ဝင်ရေတပ်မှာတော့ ရေငုပ်သင်္ဘောတွေကို ရှာဖွေ အမဲလိုက်တာမျိုး စစ်ရေး မစ်ရှင်တွေ၊ ရှာဖွေရေးနဲ့ ကယ်ဆယ်ရေး၊ သယ်ယူပို့ဆောင်ရေးနဲ့ ကင်းလှည့်ပျံသန်းမှု မစ်ရှင်တွေအတွက် အသုံးပြုနေပါတယ်။
ရဟတ်ယာဉ် ပျက်ကျတဲ့ နေရာနားက အဝေးပြေး လမ်းမကိုလည်း ယာယီပိတ်ခဲ့ပြီး နာရီပိုင်းလောက် အကြာမှ ပြန်လည် ဖွင့်လှစ်ပေးခဲ့ကြောင်းလည်း သိရပါတယ်။
ကိုးကား: BBC
