ဇူလိုင် ၁၊၂၀၂၆။ ထားမြတ်/People’s Spring
အာဏာသိမ်းစစ်တပ်ကို တော်လှန်ဖို့ ရှေ့တန်းမှာတိုက်ပွဲဝင်နေတဲ့ ပြည်သူ့ကာကွယ်ရေးတပ်မတော် (PDF)နဲ့ ကချင်လွတ်လပ်ရေးတပ်မတော်(KIA)က လူငယ်တွေဟာ အခက်အခဲကြားက ပညာဆက်လက်သင်ယူပြီး အဝေးသင်တက္ကသိုလ် ဖြေဆိုရာ အောင်မြင်မှုတွေရှိတယ်လို့ အမျိုးသားညီညွတ်ရေးအစိုးရ(NUG) ပညာရေးဝန်ကြီးဌာန ပြည်ထောင်စုဝန်ကြီး ဆရာမ ဂျာထွယ်ပန်က ပြောကြားပါတယ်။
နွေဦးဆရာ အတက်ပညာတက္ကသိုလ်(SNU)ရဲ့ ပဉ္စမအကြိမ် ဘွဲနှင်းသဘင် အခမ်းအနားမှာ ပြည်ထောင်စုဝန်ကြီး ဆရာမ ဂျာထွယ်ပန်က အဖွင့်အမှာစကား ပြောကြားစဉ်အခုလို အသိပေးခဲ့တာပါ။ အဲဒီ ဘွဲနှင်းသဘင်အခမ်းအနားကို ဇွန် ၂၁ရက်က ကျင်းပခဲ့တာဖြစ်ပြီး SNU က ဒီကနေ့ ဇူလိုင် ၁ရက်မှာ အသိပေးထုတ်ပြန်လာတာပါ။
ပညာသင်ယူလိုစိတ်ရှိတဲ့သူတွေက ဘယ်လိုအခြေအနေမှာ ဖြစ်ဖြစ် ပညာသင်ကြားခဲ့ကြတဲ့ သာဓက များစွာရှိကြောင်း ဝန်ကြီးက ပြောပါတယ်။
Public Service Announcement
“ကချင်မှာလည်း ကြုံခဲ့ဖူးတယ်။ ကချင်မှာလည်း PDF လူငယ်တွေရော KIAထဲက လူငယ်တွေရော လက်နက်ကိုင် တော်လှန်ရေးလုပ်ရင်းနဲ့ တဖက်ကနေ သူတို့ အဝေးသင်တွေ တက်ကြတယ်။ စာမေးပွဲ ဖြေမယ့်အချိန်ကျရင် ရှေ့တန်းကနေ ခွင့်ယူပြီးမှ လာဖြေကြတယ်။ အခက်အခဲတွေနဲ့ပေါ့။ အဲဒီလို ဖြေတဲ့အခါမှာလည်း အမှတ်ကောင်းတွေလည်း ရကြတယ်။ အခုကချင်မှာ KSCU တက္ကသိုလ်မှာ ရှေ့တန်းက ကျောင်းသားတွေ အဝေးသင်လာဖြေကြတယ်။ ဆရာဆရာမတွေက အရမ်းစိုးရိမ်ပေးတာပေါ့နော် ဪ သူတို့တွေ ဖြေနိုင်ကြပါ့မလားဆိုပြီး။ တကယ်အရမ်းကောင်းကောင်းဖြေနိုင်တာကို တွေ့ရတယ်” လို့ ဝန်ကြီး ဆရာမဂျာထွယ်ပန်က ပြောပါတယ်။
KSCU လို့ ခေါ်တဲ့ ကချင်ပြည်နယ် ပညာရပ်စုံ တက္ကသိုလ်ဆိုတာ စစ်တပ်အာဏာသိမ်းပြီးနောက်ပိုင်း NUGနဲ့ ကချင်လွတ်လပ်ရေးအဖွဲ့(KIO)တို့အတူပူးပေါင်းပြီးမြေပြင်မှာ ဖွင့်လှစ်ထားတာဖြစ်ပါတယ်။
KSCU ကို ၂၀၂၂ မေလ ၃၀ရက်က စတင်ဖွင့်လှစ်ခဲ့ခြင်းဖြစ်ပြီး ယခုအချိန်ထိ ဘွဲ့ရရှိသူ ၄၁၉ ဦးရှိပြီဖြစ်သည်။ KSCUအနေနဲ့ ကျောင်းသူကျောင်းသားတွေကို တတိယအကြိမ်အထိ ဘွဲ့နှင်းသဘင်အခမ်းအနားကျင်းပ ဘွဲ့လက်မှတ်တွေ ပေးအပ်ပြီးဖြစ်ပါတယ်။
အခု ကျင်းပတဲ့ဘွဲနှင်းသဘင်အခမ်းအနားကျင်းပတဲ့ နွေဦးဆရာအတက်ပညာတက္ကသိုလ်(SNU)ဟာလည်း CDM ဆရာဆရာမတွေ ဦးဆောင်ပြီး အထူးသဖြင့် အဆင့်မြင့် ပညာကဏ္ဍမှာ ဆရာဆရာမတွေ ဖြည့်ဆည်းဖို့ ပြုလုပ်နေတဲ့ ပညာရေးတက္ကသိုလ်ဖြစ်ပါတယ်။
ပုံမှန်အခြေအနေမှာတောင် ဆရာဆရာမ လုံလောက်မှုမရှိတာ ရင်ဆိုင်နေရတာဖြစ်လို့ အခုလို ကြားကာလ အခြေအနေမှာ ပညာရေးကဏ္ဍ ဆရာဆရာမ မလုံလောက်မှု မရှိကြောင်း၊ အင်တာနက် နဲ့ လေကြောင်းရန် အပါအဝင် အခက်အခဲများစွာ ရှိနေတဲ့ အခြေအနေမှာ ပညာသင်ကြားပေးသူ၊ ပညာသင်ကြားမှု ခံယူသူ အားလုံးကို ဂုဏ်ပြုဂုဏ်ယူ အထူးကျေးဇူးတင်ကြောင်းလည်း ဝန်ကြီးက ပြောကြားပါတယ်။
