EUက တရုတ်နဲ့ ကုန်သွယ်ရေး လိုငွေပြမှုကို လျှော့ချချင်နေပေမယ့် တရုတ်အဲကွန်းတွေ အများအပြား တင်သွင်းနေရ

ဥရောပတိုက်မှာ အပူလှိုင်းဖြတ်တဲ့ဒဏ်ကြောင့် တရုတ်နိုင်ငံဆီက လေအေးပေးစက် (အဲကွန်း)တွေကို မကြုံစဖူး အမြောက်အမြား မှာယူ တင်သွင်းနေရပါတယ်။ ဥရောပ သမဂ္ဂ (EU)ဟာ တရုတ်နဲ့ ကုန်သွယ်မှုမှာ ပို့ကုန်ထက် သွင်းကုန်တန်ဖိုးက အရမ်းများနေတာကို လျှော့ချဖို့ ကြိုးစားနေချိန်မှာပဲ အခုလို အခြေအနေနဲ့ ကြုံလာရတာ ဖြစ်ပါတယ်။

EUရဲ့ ခေါင်းဆောင်တွေက တရုတ်နဲ့ ကုန်သွယ်ရေး လိုငွေပြမှု ကွာဟချက်ကို ကျဉ်းမြောင်းသွားစေဖို့ အရေးတကြီး လိုအပ်ကြောင်း ဝန်ခံထားကြပါတယ်။ မကြာသေးခင်ကတော့ တရုတ်နဲ့ EUတို့ဟာ နှစ်ဖက် ကုန်သွယ်ရေး ကဏ္ဍမှာ ပိုပြီး ဟန်ချက်မျှတစေဖို့၊ စျေးကွက်ထဲက ပြဿနာတွေကို အတူညှိနှိုင်း ဖြေရှင်းဖို့ သဘောတူခဲ့ကြောင်း ရှားပါးတဲ့ ပူးတွဲ ကြေညာချက်တစ်စောင် ထုတ်ပြန်ခဲ့ပါတယ်။

တစ်နည်းအားဖြင့် EUဟာ တရုတ်ဆီကို ပိုမိုစုံလင်များပြားတဲ့ ကုန်စည်တွေ တင်ပို့ဖို့နဲ့ တရုတ်ဆီက ဝယ်ယူတင်သွင်းရမှုတွေကို အတိုင်းအတာ တစ်ခုထိ လျှော့ချဖို့ ရည်ရွယ်ထားခဲ့တာပါ။ ဒါပေမဲ့ ရာသီဥတုဒဏ်ကြောင့် အဲဒီအစီအစဉ်က လောလောဆယ် ဘယ်လိုမှ အထမမြောက်နိုင်သေးပါဘူး။

ဥရောပ အနောက်ပိုင်းမှာ ဆိုးဆိုးရွားရွား အပူလှိုင်း ဖြတ်နေပြီး နိုင်ငံတချို့မှာ အပူလွန်ကဲမှု စံချိန်အသစ်တွေတောင် ကြုံတွေ့နေခဲ့ပါတယ်။ ဒါကြောင့်လည်း အခုသီတင်းပတ် အစောပိုင်းထိ အခြေအနေအရ ဥရောပဟာ တရုတ်ဆီကနေ အဲကွန်းယူနစ်ပေါင်း ၂ သိန်းကျော်ကို မှာယူ တင်သွင်းထားရပါတယ်။ အဲဒီပမာဏဟာ ၂၀၂၅ နဲ့ယှဉ်ရင် နှစ်ဆ ပိုများလာတာဖြစ်ပြီး လာမယ့်ရက်တွေမှာ ထပ်တိုးလာမယ့် အလားအလာ ရှိနေပါတယ်။

Public Service Announcement

အမေရိကန်မှာတော့ အိမ်အားလုံးရဲ့ စုစုပေါင်း ၉၀ ရာခိုင်နှုန်း နီးပါးက အဲကွန်းတပ်ထားပေမယ့် ဥရောပမှာတော့ အဲဒီအချိုးအစားဟာ ၂၀ ရာခိုင်နှုန်း ဝန်းကျင်ပဲ ရှိပါတယ်။ ပြီးတော့ ဥရောပမှာ ရောင်းအား အကောင်းဆုံး အဲကွန်း အမှတ်တံဆိပ် ၅ ခုစလုံးက ဥရောပ အခြေစိုက် လုပ်ငန်းတွေ မဟုတ်ပါဘူး။ Haier၊ Gree၊ Zhuhaiနဲ့ Mideaလို အရောင်းသွက် အဲကွန်းတံဆိပ်တိုင်းဟာ တရုတ်ထုတ်ကုန်တွေချည်းပဲ ဖြစ်ပြီး ၂၀၂၅ ခုနှစ်မှာ ဥရောပ စျေးကွက်တစ်ခုလုံးရဲ့ ၃၂ ရာခိုင်နှုန်းကို စိုးမိုးထားခဲ့ပါတယ်။ တူရကီရဲ့ Bekoနဲ့ ဂျပန်ရဲ့ Daikinတို့ရဲ့ အဲကွန်းတွေကလည်း ထိပ်ဆုံး ၅ နေရာ စာရင်းထဲ ပါဝင်နိုင်ဖို့ အစွမ်းကုန် ကြိုးစားနေပါတယ်။

ဥရောပရဲ့ အလိုအပ်ဆုံး အီလက်ထရောနစ် ထုတ်ကုန်တစ်ခုအတွက် ရောင်းအားအကောင်းဆုံး လုပ်ငန်း ၅ ခု စာရင်းမှာ ဥရောပ ကုမ္ပဏီတွေ လုံးဝ ပါမနေတာကိုက EU ခေါင်းဆောင်တွေ အထူးအလေးထား ထောက်ပြနေတဲ့ ကုန်ထုတ်စွမ်းအား ပြဿနာကို ပိုပြီး ထင်ထင်ရှားရှား မြင်သာလာစေပါတယ်။

ဥရောပ နိုင်ငံတွေ အနေနဲ့ တရုတ်ရဲ့ နည်းပညာ ထုတ်ကုန်တွေအပေါ် ကြီးကြီးမားမား ဆက်လက် မှီခိုနေရတဲ့ အတွက်လည်း နှစ်ဖက် ကုန်သွယ်ရေး ညှိနှိုင်းမှုတွေမှာ တရုတ်ဖက်က လိုက်လျော အလျှော့ပေးဖို့ ဖြစ်နိုင်ခြေကို ပိုလျော့နည်းသွားစေလိမ့်မယ်လို့ စျေးကွက် သုတေသီတွေက သုံးသပ်ထားကြပါတယ်။

ကိုးကား: Wall Street Journal