ဇူလိုင် ၃၀၊ ၂၀၂၆။ဟာနာဆန်/People’s Spring
မကွေးတိုင်း၊ ရေစကြိုမြို့နယ်မှာ စစ်တပ်က အင်အား ၅၀ဝ ခန့် ထပ်မံရောက်ရှိလာပြီး စစ်မှုထမ်းတပ်သားသစ်တွေလည်း ပါဝင်လာကြောင်း ရေစကြိုသတင်းအချက်အလက်ကော်မတီရဲ့ တာဝန်ရှိသူက ပြောပါတယ်။
ဇူလိုင် ၂၈ ရက်က ရေစကြိုမြို့ကို သင်္ဘောနဲ့စစ်သား ၅၀၀ ခန့် လာရောက်ပို့ဆောင်ခဲ့ပြီး ရေစကြိုအခြေစိုက် ခြေလျင်တပ်ရင်းတွေဖြစ်တဲ့ အမှတ် -၂၅၆၊၂၅၇၊ ၂၅၈ တပ်ရင်းတွေဆီ ခေါ်ဆောင်သွားကြောင်း ရေစကြိုသတင်းအချက်အလက်ကော်မတီက ပြောပါတယ်။
အဲဒီတပ်သားတွေမှာ စစ်မှုထမ်းတပ်သားသစ် တွေ အများဆုံး ပါဝင်နေပြီး တချို့ဟာ အသက်မပြည့်သေးသူတွေပါ ပါဝင်နေတယ်လို့ မြို့ခံတွေဆီက သိရပါတယ်။
Public Service Announcement
“အသက်ငယ်တာတွေပါတာနဲ့ ကြောက်ရွံ့ထိတ်လန့်နေတဲ့အနေအထားမျိုးတွေတွေရလို့ မြို့ခံတွေက တပ်သားသစ်တွေဖြစ်မယ်လို့ ခန့်မှန်းပြောတာပါ။ လောလောဆယ်တော့ ၂၅၆နဲ့ ၂၅၈ မှာလို့သိရတယ်။ ဘယ်ပို့မယ်မပြောတတ်ဘူး”လို့ ရေစကြိုသတင်းအချက်အလက်ကော်မတီရဲ့ တာဝန်ရှိသူက ပြောပါတယ်။
တပ်သားသစ် ၁၀၀ခန့်ကို ရိက္ခာတွေနဲ့အတူ လာသမျှ ကားတွေ ချောဆွဲကာ တပ်ထဲပို့ခိုင်းပြီး ကျန် ၄၀၀ ခန့်ကတော့ ခြေလျင်ခေါ်ဆောင်သွားကြောင်း သိရပါတယ်။ စစ်ကောင်စီအင်အားတွေ ထပ်တိုးလာလို့ ရေစကြိုမြို့ပေါ်မှာ အပြင်ထွက်သူမရှိဘဲ ခြောက်ကပ်နေတယ်လို့ ဒေသခံတွေက ပြောပါတယ်။
ရေစကြိုနဲ့ နယ်ချင်းဆက်နေတဲ့ မြိုင်မြို့နယ်မှာတော့ အာဏာသိမ်းစစ်တပ်က မြေပြင်စစ်ကြောင်းတွေအပြင် လေကြောင်းတိုက်ခိုက်မှုတွေပါ ပြုလုပ်နေပြီး ပြည်သူထိခိုက်သေဆုံးမှုတွေပါ ရှိနေပါတယ်။
