စက်တင်ဘာ – ၈ ၊၂၀၂၆
ရုရှားနဲ့ မြောက်ကိုရီးယားကိုကားလမ်းတိုက်ရိုက်ဆက်သွယ်ပေးတဲ့ တံတားတစ်စင်းကို ပထမဆုံးအကြိမ် ဖွင့်လှစ်လိုက်ကြောင်း သိရပါတယ်။
ရုရှားအာဏာပိုင်တွေကတော့ စက်တင်ဘာ ၇ ရက်နေ့မှာ စတင်ဖွင့်လှစ်ခဲ့တဲ့ တူမန်မြစ်ကူးတံတားဟာ နှစ်နိုင်ငံ ဆက်ဆံရေး ပိုမိုနက်ရှိုင်းခိုင်မာလာမှုရဲ့ ပြယုဂ်တစ်ခုလို့ ညွှန်းဆိုခဲ့ပါတယ်။
အဲဒီတံတားဟာ နှစ်လမ်းမောင်း အမျိုးအစားဖြစ်ပြီး ၁ ကီလိုမီတာ ရှည်လျားပါတယ်။ အဲဒီတံတားကြောင့် ရုရှားနဲ့ မြောက်ကိုရီးယားကြားမှာ တိုက်ရိုက် ကားလမ်း ပေါက်သွားပြီ ဖြစ်ပါတယ်။ နေ့စဉ် အဲဒီတံတားကို ယာဉ်အစီးရေ ၃၀၀ လောက် ဖြတ်သန်းသွားလာလိမ့်မယ်လို့ ရုရှားအစိုးရက ခန့်မှန်းထားပါတယ်။
Public Service Announcement
နယ်စပ်နားမှာ အခြေခံ အဆောက်အအုံကဏ္ဍ တိုးတက်မှုတွေ ရှိလာခြင်းက နှစ်နိုင်ငံကြား အနာဂတ် ကုန်သွယ်ရေး၊ စီးပွားရေး၊ နည်းပညာ၊ သိပ္ပံနဲ့ ယဉ်ကျေးမှုဆိုင်ရာ ပူးပေါင်းဆောင်ရွက်မှုတွေကို တွန်းအားဖြစ်စေမယ်ဆိုတာ ယုံကြည်ကြောင်း ရုရှား ဝန်ကြီးချုပ် မစ်ခေးလ် မစ်ရှူစတင်က ပြောကြားခဲ့ပါတယ်။ ရုရှားဝန်ကြီးချုပ်ဟာ တံတားသစ် ဖွင့်လှစ်မှု အခမ်းအနားကို အွန်လိုင်းကနေ ချိတ်ဆက် ပါဝင်ခဲ့ပါတယ်။
ရုရှားနဲ့ မြောက်ကိုရီးယားရဲ့ ဆက်ဆံရေးဟာ ပြီးခဲ့တဲ့ နှစ်ပိုင်းတွေအတွင်း သိသိသာသာ တိုးတက်လာခဲ့ပါတယ်။ အထူးသဖြင့် ယူကရိန်း စစ်ပွဲမှာ ရုရှားကို မြောက်ကိုရီးယားက ခဲယမ်းမီးကျောက်တွေနဲ့ စစ်သည်တွေ ပံ့ပိုးကူညီခဲ့တဲ့နောက် နှစ်နိုင်ငံ ပူးပေါင်းဆောင်ရွက်မှုတွေ ပိုပြီး အားကောင်းလာပါတယ်။ အပြန်အလှန်အဖြစ် ရုရှားက မြောက်ကိုရီးယားအတွက် စစ်ရေးနည်းပညာနဲ့ ရင်းနှီးမြှုပ်နှံမှု အကူအညီတွေ ပေးအပ်ခဲ့ပါတယ်။
ရုရှားနဲ့ မြောက်ကိုရီးယားတို့ဟာ နယ်စပ်ဖြတ်ကျော် ရထားလမ်းကူး တံတားတစ်ခုကို တည်ဆောက်ထားသလို တိုက်ရိုက် လေကြောင်းပြေးဆွဲမှုတွေလည်း ရှိနေပါတယ်။
၂၀၂၄ မှာတော့ တူမန်မြစ်ကို ဖြတ်ကူးတဲ့ ကားလမ်းတံတား တစ်စီး တည်ဆောက်ရေး သဘောတူခဲ့ကြပြီး အခုတော့ အဲဒီတံတားသစ်ကို ဖွင့်လှစ်ခဲ့တာ ဖြစ်ပါတယ်။ တူမန်ဟာ မြောက်ကိုရီးယား ပိုင်နက်ကို တရုတ်၊ ရုရှားနိုင်ငံတွေနဲ့ ပိုင်းခြားပေးတဲ့ မြစ်တစ်စင်း ဖြစ်ပါတယ်။
ကိုးကား – ABC
