လုယက်ဆူပူမှုတွေအပြီး မီလန်မှာ စစ်တပ်အင်အား ၅၀၀ လောက် ဖြန့်ကျက်ထားဖို့ အီတလီ အစိုးရ စီစဉ်

မီလန်မြို့က ဆန္ဒပြပွဲတွေမှာ အဓိကရုဏ်းဆန်ဆန် သောင်းကျန်းမှုတွေအဖြစ် ပြောင်းလဲသွားခဲ့တဲ့နောက် တပ်အင်အား ၅၀၀ လောက် လုံခြုံရေး ဖြန့်ကျက်ထားဖို့ အီတလီ အစိုးရက ညွှန်ကြားထားပါတယ်။

ဝန်ကြီးချုပ် ဂျော်ဂျီယာ မယ်လိုနီရဲ့ အစိုးရဟာ မီလန်မှာ စစ်သားတွေ လုံခြုံရေးအတွက် ဖြန့်ကျက်ထားဖို့ အောက်တိုဘာ ၂၀ မှာ ခွင့်ပြုပေးခဲ့တာ ဖြစ်ပါတယ်။ မီလန်အပါအဝင် အီတလီရဲ့ မြို့ကြီးတချို့မှာ လက်ဝဲစွန်း လူငယ်တွေ ဦးဆောင်တဲ့ အစိုးရ ဆန့်ကျင်ရေး ဆန္ဒပြပွဲတွေ ပျံ့နှံ့ ဖြစ်ပေါ်လာပါတယ်။ မီလန်မှာတော့ တချို့ ဆန္ဒပြသူတွေဟာ ဆူပူသောင်းကျန်းမှုတွေကိုပါ ကျူးလွန်ပြီး စျေးဆိုင်တွေကို လုယက်ဖျက်ဆီးတာတွေပါ ကျူးလွန်လာပါတယ်။

အီတလီ ဒုတိယ ဝန်ကြီးချုပ် အန်တိုနီယို တာဂျာနီက အစိုးရဟာ စစ်သားတွေကို ရဲတပ်ဖွဲ့ လုပ်ပိုင်ခွင့် အာဏာမျိုး ပေးအပ်ပြီး လုံခြုံရေးအတွက် ဖြန့်ကျက်တာမျိုး နည်းလမ်းတွေနဲ့ တုံ့ပြန်သွားမယ်လို့ ပြောပါတယ်။

ပြီးခဲ့တဲ့ သီတင်းပတ်ကုန်က မီလန်ရဲတပ်ဖွဲ့ဟာ မြို့ထဲက ဆူပူသောင်းကျန်းသူ ၂၇၀ လောက်ကို ဖမ်းဆီးခဲ့ပြီး အများစုက အသက်မပြည့်ကြသေးကြောင်း သိရပါတယ်။ အီတလီမှာ ဆန္ဒပြပွဲတွေ ဖြစ်ပေါ်လာတာဟာ အိမ်နီးချင်း ပြင်သစ်နိုင်ငံမှာ လတ်တလော ကြုံတွေ့နေတဲ့ အခြေအနေတွေနဲ့ ထင်ဟပ် ဆင်တူနေပါတယ်။ ပြင်သစ်က ဆန္ဒပြပွဲတွေကတော့ ပိုပြီး ပြင်းထန်ပါတယ်။

Public Service Announcement

တာဂျာနီက ရဲတပ်ဖွဲ့ အနေနဲ့ ဆန္ဒပြသူတွေထဲကနေ ဆူပူပြီး အဖျက်အမှောင့် ကျူးလွန်မယ်လို့ ယူဆရသူတွေကိုပါ ထိန်းသိမ်းဖို့ အခွင့်အာဏာမျိုး ရရှိလာမှာ ဖြစ်တယ်လို့ ပြောပါတယ်။ မီလန်ရဲ့ သမိုင်းဝင် နေရာတွေမှာ ဒေသခံတွေနဲ့ နိုင်ငံခြား ခရီးသွား ဧည့်သည်တွေ လွတ်လွတ်လပ်လပ် သွားလာလည်ပတ်ဖို့၊ ရောင်းဝယ် ဖောက်ကားဖို့အတွက် လိုအပ်တဲ့ စည်းမျဉ်းတွေကို အစိုးရက ထုတ်ပြန်သွားမယ်လို့လည်း ဒုတိယ ဝန်ကြီးချုပ်က ဆိုပါတယ်။

အီတလီရဲ့ နောက်ထပ် ဒုတိယ ဝန်ကြီးချုပ်ဖြစ်ပြီး လက်ယာစွန်း အာဏာရ ညွန့်ပေါင်း အစိုးရမှာ ပါဝင်နေတဲ့ မက်တီယို ဆယ်လ်ဗီနီကလည်း မီလန်မှာ လုံခြုံရေးအတွက် စစ်တပ်အင်အား ၅၀၀ လောက် ဖြန့်ကျက်မယ့် သတင်းကို ကြိုဆိုကြောင်း လူမှုကွန်ရက်မှာ ရေးသားထားခဲ့ပါတယ်။

ကိုးကား: Politico