မုံရွာမှာ ပစ်သတ်ခံထားတဲ့ ရဲဘော်ရုပ်အလောင်းနား စစ်တပ်က ကင်းပုန်းဝပ်စောင့်နေ

အောက်တိုဘာ ၂၀၊ ၂၀၂၆။ ဇေအောင်/People’s Spring

စစ်ကိုင်းတိုင်း၊ မုံရွာမြို့နယ်၊ မြေနဲ-အောင်သာလမ်းမှာ ရဲဘော်တစ်ဦးဟာ စစ်တပ်ရဲ့ ပစ်ခတ်မှုကြောင့် ကျဆုံးခဲ့ပြီး ရုပ်အလောင်းလာကောက်မယ့်သူတွေကို စစ်တပ်က ကင်းပုန်းဝပ်ပြီး စောင့်နေကြောင်း မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။

အောက်တိုဘာ ၁၈ ရက် နေ့လယ်ပိုင်းက မုံရွာမြို့၊ မုံရွာ-မန္တလေးလမ်း၊ မြေနဲ-အောင်သာ လမ်းကူးမှာ တော်လှန်ရေးရဲဘော်တစ်ဦးဟာ အာဏာသိမ်းစစ်တပ်ရဲ့ ပစ်ခတ်မှုကြောင့် ကျဆုံးသွားခဲ့ကြောင်း ဒေသခံတွေက ပြောပါတယ်။

“အဲဒီလမ်းမှာက ကြေးနီတင်ကားတွေသွားတိုင်း ခဏတိုင်းဖြစ်တယ်။ သွားကောက်ဖို့က မလွယ်ဘူး”လို့ ဒေသခံတစ်ဦးက ပြောပါတယ်။

Public Service Announcement

ကျဆုံးသွားတဲ့ ရဲဘော်ရဲ့ ရုပ်အလောင်းမှာ လမ်းပေါ်မှာပဲဆက်လက်ရှိနေပြီး အနီးနားမှာ စစ်တပ်က ကင်းပုန်းဝပ် စောင့်ဆိုင်းနေတာကြောင့် ဒီကနေ့ အောက်တိုဘာ ၂၀ရက် ၃ ရက်မြောက်တဲ့အထိ လာရောက်သိမ်းဆည်းတာမျိုး မရှိသေးဘူးလို့ မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။

ရဲဘော်ရုပ်အလောင်းဟာ ရက်ကြာလာလို့ ပုပ်ပွလာပြီး စစ်တပ်က လူနေအိမ်တွေရဲ့ရှေ့ လမ်းပေါ်မှာ ထားထားတယ်လို့ သိရပါတယ်။ လာကောက်မယ့်သူတွေကိုလည်း ပစ်ခတ်ဖမ်းဆီးဖို့ စောင့်ဆိုင်းနေတာဖြစ်ကြောင်း မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။

အောက်တိုဘာလလယ်ပိုင်းကလည်း မုံရွာ-သာစည်လမ်းဘက်မှာ အာဏာသိမ်းစစ်တပ်နဲ့ တော်လှန်ရေးရဲဘော်တွေ ပစ်ခတ်မှုဖြစ်ပွားခဲ့ပြီး စစ်အုပ်စုထိခိုက်မှုတွေ ရှိခဲ့ပါသေးတယ်။