'/%3E%3C/svg%3E){kind=small}
အောက်တိုဘာ ၂၀၊ ၂၀၂၆။ ကတ်သရင်း / People’s Spring
မန္တလေး အိုးဘိုအကျဉ်းထောင်မှာ နိုင်ငံရေးအကျဉ်းသားတွေ ဖိနှိပ်ခံနေရပြီး ပြည်သူတွေအနေနဲ့ ကူညီတောင်းဆိုပေးကြဖို့နဲ့ တော်လှန်ရေး ဦးဆောင်နေသူတွေအနေနဲ့ အပြီးသတ်တော်လှန်ရေးကို ဆက်သွားကြဖို့ အိုးဘိုထောင်အတွင်းက နိုင်ငံရေးအကျဉ်းသားတွေက တောင်းဆိုလိုက်ကြပါတယ်။
အိုးဘိုထောင်အတွင်းက နိုင်ငံရေးအကျဉ်းသားတွေက တော်လှန်ရေး ဦးဆောင်နေသူတွေအနေနဲ့ အပြီးသတ်တော်လှန်ရေးကို ဆက်သွားကြဖို့ တောင်းဆိုလိုက်တာဖြစ်တယ်လို့ နိုင်ငံရေးအကျဉ်းသား မိသားစုဝင်တွေက ပြောပါတယ်။
ဒါ့အပြင် ထောင်ပိုင်ကြီးနဲ့ ထောင်ဝန်ထမ်းတွေက ခေါင်းစဉ်အမျိုးမျိုးတပ် ငွေတောင်းမှုတွေကြောင့် နိုင်ငံရေးအကျဉ်းသားတွေ ခက်ခဲနေကြပြီး ထောင်ဝင်စာ ကန့်သတ်တာတွေလည်း ဆက်တိုက် လုပ်ခံနေရတယ်လို့ နိုင်ငံရေးအကျဉ်းသား မိသားစုဝင်တွေက ပြောပါတယ်။
Public Service Announcement
အိုးဘိုအကျဉ်းထောင်မှာ အကျဉ်းသား ရှစ်ထောင်ခန့်သာ ဆန့်ပေမယ့် လက်ရှိမှာ အကျဉ်းသား ၂၀,၀၀၀ ခန့် ထားရှိကာ ထောင်က ပေးနေကျ ပုံစံဝတ်စုံကိုပါ မပေးတော့ဘူးလို့ စုံစမ်းသိရပါတယ်။
ဒါ့အပြင် ရေသန့်စက်၊ ရေနွေးစတီးအိုး၊ ရေတွင်းပြုပြင်ဖို့ ပန်ကန်အတွက် စတဲ့ ခေါင်းစဉ်အမျိုးမျိုးကို အလှူလို့ ခေါင်းစဉ်တပ်ကာ အကျဉ်းသားတွေထံက ငွေတောင်းခံနေတယ်လို့ နိုင်ငံရေးအကျဉ်းသား မိသားစုဝင်တွေက ပြောပါတယ်။
“ချိုးရေမလောက်တော့လည်း အကျဉ်းသားတွေက ကိုယ့်ပိုက်ဆံနဲ့ ကိုယ်တူးရတယ်။ လှူတယ်ပေါ့လေ။ တစ်တွင်းနဲ့ မလောက်ရင် နောက်အကျဉ်းသားတစ်ဦးက တစ်တွင်း ထပ်လှူရတယ်” လို့ နိုင်ငံရေးအကျဉ်းသား မိသားစုဝင်တစ်ဦးက ပြောပါတယ်။
ဒါ့အပြင် ထောင်ဝန်ထမ်းတွေကြောင့် စက်ပစ္စည်းပျက်ပါကလည်း အကျဉ်းသားတွေဆီ ခွဲတမ်းချ ပြန်လည်ပြုပြင်ခိုင်းတယ်လို့ ဆိုပါတယ်။
“မပြင်လို့လည်း မရဘူးလေ။ သောက်ရေသန့်ပျက်ရင်လည်း လူများတော့ ရေက မလောက်ဘူး။ အဲကျရင် ပိုက်ကလာတဲ့ အဝီစိတွင်းရေကို သောက်ရတာ။ ထောင်ဆေးခန်းအတွက် ဆေးကအစ အကျဉ်းသား မိသားစုတွေဆီက တောင်းရတာ” လို့ နိုင်ငံရေးအကျဉ်းသား မိသားစုဝင်တစ်ဦးက ပြောပါတယ်။
ထောင်အတွင်း နိုင်ငံရေးအကျဉ်းသားတွေကို ယခုလို ဖိနှိပ်ငွေတောင်းနေပေမယ့် ထောင်ဝင်စာ ပို့တာကိုတော့ ပိုမို တင်းကြပ်ထားတယ်လို့ မိသားစုဝင်တွေက ပြောပါတယ်။
အရင်လို ပွဲစားနဲ့ လက်မခံတော့ဘဲ မိသားစုဝင် ကိုယ်တိုင် ထောင်ဝန်ထမ်းတွေကနေတဆင့် ပို့ရတာဖြစ်ပြီး တစ်နေ့လုံး တန်းစီပြီးခါမှ ၁၀ ဦးတစ်ဖြတ် ဝင်ခိုင်းပြီး အချိန်လွန်သွားပြီလို့ဆိုကာ ပြန်လွှတ်တာတွေလည်း ရှိတယ်လို့ ဆိုပါတယ်။
“နေပူကြီးထဲ တစ်နေကုန် ရပ်စောင့်ရတာ။ သက်ကြီးရွယ်အိုတွေဆို မူးလဲကြတယ်။ အရင်ကထက်လည်း ငွေကုန်၊ အချိန်ကုန် ဖြစ်ကြတယ်” လို့ နိုင်ငံရေးအကျဉ်းသား မိသားစုဝင်တစ်ဦးက ပြောပါတယ်။
ဒါ့အပြင် ကန်စွန်းရွက်ကြော်၊ လိမ္မော်သီး၊ ပန်းသီးတွေကိုပါ ပို့ခွင့် ပိတ်ထားတယ်လို့ ဆိုပါတယ်။
“အိုးဘိုထောင်ပိုင် သိန်းဇော်မောင်ကို တင်ပြတော့ စားစရာမရှိရင် မစားနဲ့ဆိုပြီး ပြန်ပြောတယ်” လို့ နိုင်ငံရေးအကျဉ်းသား မိသားစုဝင်က ပြောပါတယ်။
