AAကလက်နက်ကြီးပစ်လို့ စစ်တွေပါဒလိတ်တပ်ရင်းမှ ဗိုလ်မှူးအပါအဝင်စစ်သား ၅ ဦးထက်မနည်းသေဆုံး

●စစ်တပ်ကပုဏ္ဏားကျွန်းဘက်ကိုတန်ပြန် ထိုးစစ်ဆင်ဖို့ထပ်မံကြိုးစား

●စစ်​တွေမှာ AA ကစစ်တပ်တပ်ရင်း​တွေကိုလက်နက်ကြီး​တွေနဲ့ညလုံး​ပေါက်ပစ်ခတ်တိုက်ခိုက် ၊နေရာငါးခုမှာတိုက်ပွဲပြင်းထန်နေ

နိုဝင်ဘာ-၃၊၂၀၂၆။ခိုင်မြတ်/People’s Spring

အာဏာသိမ်းစစ်တပ်ရဲ့ ဒေသကွပ်ကဲမှုစစ်ဌာနချုပ်(ဒကစစစ်တွေ)အဓိကရှေ့ထွက်တပ်ရင်းတွေဖြစ်တဲ့ ပါဒလိတ်တပ်ရင်းတွေထဲကို အာရက္ခတပ်တော်(AA)ကလက်နက်ကြီးနဲ့ ပစ်ခတ်၊ တိုက်ခိုက်တာကြောင့် ဗိုလ်မှူးအဆင့်အပါအဝင် ၅ ဦးထက်မနည်းသေဆုံးခဲ့တယ်လို့ မြေပြင်သတင်းရင်းမြစ်တွေကပြောပါတယ်။

Public Service Announcement

စစ်တွေမြို့ရဲ့မြောက်ဘက်၊ဒကစဌာနချုပ်နဲ့ ၄ မိုင်ကျော်အကွာပါဒလိတ်ရွာမှာ စစ်တပ်ရဲ့ ​ခြေလျင်တပ်ရင်းနဲ့ ​ခြေမြန်တပ်ရင်း​တွေဖြစ်တဲ့ ခလရ (၂၃၂) ၊ ခမရ(၃၄၄)၊ အမှတ် (၁၀) ပညာရေးသင်တန်းကျောင်း နဲ့ အမှတ် (၃၄၃) စစ်လက်နက်ပစ္စည်းတပ်ခွဲတို့ အခြေစိုက်ထားပါတယ်။အဲဒီတပ်ရင်းတွေကို AA ကတိုက်ခိုက်ခဲ့တာဖြစ်ပြီး ခလရ(၂၃၂ )ထဲကိုကျရောက်ပေါက်ကွဲခဲ့တယ်လို့သိရပါတယ်။

“အရာရှိနေရာကိုကျတယ်။ညဘက်မှာပစ်သွားတာ။ အတည်ပြုနိုင်တာငါးယောက် သေတယ်။ဒဏ်ရာရတာတွေလည်းရှိအုံးမယ်။ ဗိုလ်မှူးတွေပါတယ်။ဒုဗိုလ်မှူးကြီးအဆင့်တွေကိုပါရှေ့တန်းမှာကွပ်ကဲခိုင်းထားတယ်လို့ သိရတယ်”လို့စစ်ရေးနဲ့ နီးစပ်တဲ့မြေပြင်သတင်းရင်းမြစ်ကပြောပါတယ်။

အာရက္ခတပ်တော်(AA)ဟာ ပါဒလိတ်တပ်ရင်းတွေအပါအဝင် စစ်တွေမြို့နယ်အတွင်းက စစ်တပ်ရဲ့ တပ်ရင်းတွေကိုလက်နက်ကြီး​တွေ၊ ဒရုန်းတွေနဲ့ တိုက်ခိုက်နေတာဖြစ်ပါတယ်။ နိုဝင်ဘာလ ၁ ရက်နေ့က ပါဒလိတ်တပ်ရင်းထဲကျရောက်ထိမှန်ပြီးစစ်တပ်အရာရှိတွေ သေဆုံးခဲ့ရတာလို့ ဆိုပါတယ်။

“လက်နက်ကြီးတိုက်ပွဲလို့တောင် ပြောလို့ရ တယ်။ကိုယ့်ဘက်ကလူတွေ လက်နက်ကြီးတွေနဲ့ချည်း ချနေတာ။ အောင်ပွဲရတယ်ပြောကြတယ်။ညဘက်ဆိုရင်လက်နက်ကြီးသံတွေ စကြားရပြီ မိုးလင်းပေါက်နီးပါးပဲ” လို့ စစ်တွေ မြို့နယ်နဲ့ထိစပ်နေတဲ့ပေါက်တောဒေသခံစစ်ရေးနီးစပ်သူတဦးကပြောပါတယ်။

AA ဟာ စစ်တပ်တပ်ရင်းတွေကို အဝေးပစ်လက်နက်တွေနဲ့ တိုက်ခိုက်နေသလိုအမြင့်ကျွန်း၊ရေချမ်းပြင်၊ကံ့ကော်ကျွန်းတို့ဝန်းကျင်ရှိစစ်တပ်စခန်းတွေကို မြေပြင်ကနေလည်း ထိုးစစ်ဆင်နေပြီး တိုက်ပွဲပြင်းထန်နေတယ်စုံစမ်းသိရပါတယ်။

ဒါ့အပြင် စစ်တပ်က အင်အားအလုံးအရင်းဖြည့်တင်းလာတဲ့ ရွှေမင်းဂံရေတပ်ဝန်းကျင်၊ ငတောက်တက်ဝန်းကျင်တို့ မှာလည်း တိုက်ပွဲပြင်းထန်နေတယ်လို့ စစ်ရေးသတင်းရင်းမြစ်တွေက ပြောပါတယ်။

စစ်တွေမြို့နယ်အတွင်းက စစ်တပ်စခန်း ၁၀ ကျော်လက်လွှတ်ထားရပြီး ပေါက်တောမြို့နယ် ငပြီကျွန်းပေါ်မှာပါ ခြေကုပ်စခန်းချခွင့်မရဘဲ တပ်ရင်းတခုလုံးနီးပါး သေဆုံးခဲ့ရတဲ့ စစ်တပ်ဟာ စစ်တွေကနေ ပုဏ္ဏားကျွန်းမြို့နယ် ဘက်ကို နောက်တကြိမ် တန်ပြန်ထိုးစစ်ဆင်ဖို့ ကြိုးစားလာတယ်လို့ မြေပြင်သတင်းရင်းမြစ်တွေက ​ပြောပါတယ်။

“ဒီကောင်တွေ ငတောက်တက်၊ ဝါဘိုနားကနေပြီးတော့ ပုဏ္ဏားကျွန်းဘက်ကို ထပ်ပြီးထိုးဖို့ လုပ်တယ်။သူတို့ ကြိုးစားနေတာ သုံး၊ လေးရက်ရှိပြီ။ရွှေမင်းဂံကလည်း ခမောင်းတောဘက်ကို ထပ်တက်ဖို့ကြိုးစားတယ်။ အဲဒီမှာလည်း တိုက်ပွဲဖြစ်နေကြတယ်” လို့ AA နဲ့နီးစပ်တဲ့ မြေပြင်သတင်းရင်းမြစ်က ပြောပါတယ်။

စစ်တပ်ကတန်ပြန်ထိုးစစ်ဆင်ဖို့ထပ်မံကြိုးစား​နေပေမယ့် မအောင်မြင်ဘဲ ​သေဆုံး၊ဒဏ်ရာရသူများပြီး အထိနာနေတယ်လို့ သူကဆိုပါတယ်။ အခုရက်ပိုင်းစစ်တွေမြို့နယ်အတွင်းက မြေပြင်တိုက်ပွဲတွေမှာ စစ်တပ်ဘက်က သေဆုံးသူဆယ်နဲ့ချီရှိတယ်လို့AA သတင်းရင်းမြစ်က ပြောပါတယ်။

“ခမောင်းတောဘက်မှာ ပိုနာတယ် ေ ွး တွေ ဒီနှစ်ရက်၊ သုံးရက်လောက်မှာ ၃၀ လောက် ရတယ်။ ကိုယ့်ဘက် လည်း အထိအခိုက်ရှိပေမယ့်အားလုံးပေါင်း၅ ယောက်၊၆ယောက်လောက်ပဲဒဏ်ရာရတာရှိတယ်။အကောင်းဆုံးထိန်းထားတယ်” AA သတင်းရင်းမြစ်က ပြောပါတယ်။

စစ်တပ်ဟာ ပြီးခဲ့တဲ့ စက်တင်ဘာလ ၄ ရက်နေ့ကလည်း စစ်တွေမြို့နယ်ကနေ AA သိမ်းပိုက်ထိန်းချုပ်ရာ ပုဏ္ဏားကျွန်းမြို့ နယ်ဘက်ကို အင်အားထောင်ချီသုံးပြီးထိုးစစ်ဆင်ခဲ့ပေမယ့် AA စခန်းတွေ သိမ်းနိုင်တာမရှိဘဲ စစ်ကြောင်းအားလုံး အထိနာ နောက်ပြန်ဆုတ်ခဲ့ရပါတယ်။

ဒါကြောင့် ရွှေမင်းဂံရေတပ်ရဲ့ အရှေ့ဘက် ကုလားတန်မြစ်လယ် ရှိ ငပြီကျွန်းပေါ်ကို အောက်တိုဘာ ၇ ရက်နေ့မှာ ကမ်းတက်ဖို့ ကြိုးစားခဲ့ပြီး ကမ်းတက်နိုင်ခဲ့ပေမယ့် တိုက်ပွဲသုံးပတ် အကြာအောက်တိုဘာ ၂၉ ရက်နေ့မှာတော့ ငပြီကျွန်းပေါ်မှ ခြေကုပ်နေရာတွေအားလုံးကိုAA ကအပြည့်အဝပြန်လည်ထိန်းချုပ်နိုင်ခဲ့ပါတယ်။ ငပြီကျွန်းတိုက်ပွဲမှာလည်းစစ်တပ်က ​သေဆုံး၊ဒဏ်ရာရသူ ၊လက်နက်ချသူ အများအပြားရှိပြီးအထိနာခဲ့ပါတယ်။

အဲဒီနောက်အခုတကြိမ် ပုဏ္ဏားကျွန်းမြို့နယ်ဘက်ကို တန်ပြန်ထိုးစစ်လုပ်လာတာဖြစ်ပါတယ်။ ဒါပေမယ့် AAက စစ်တွေမြို့သိမ်းတိုက်ပွဲအတွက် အချိန်ယူပြင်ဆင်ထားတာကြောင့် စစ်တပ်ရဲ့ တန်ပြန်ထိုး စစ်တွေဟာ အောင်မြင်နိုင်ခြေနည်းသွားပြီလို့ စစ်ရေးနဲ့နီးစပ်သူတွေက သုံးသပ်ပါတယ်။

၄၉၂၆ စစ်ဆင်ရေးလို့ နာမည်ပေးခဲ့တဲ့ စစ်တပ်ရဲ့ ထိုးစစ်နှစ်လနီးပါးအတွင်း AA ဟာ စစ်တွေမြို့နယ်အတွင်းက တပ်စခန်း ၁၃ ခုကို သိမ်းပိုက်ပြီး စစ်တပ်သင်္ဘော ၅ စီးထက်မနည်းကို တိုက်ခိုက်ဖျက်ဆီးနိုင်ခဲ့ပါတယ်။

စစ်တပ်ဟာ ရခိုင်ပြည်နယ် စစ်တွေအပြင် ကျောက်ဖြူ၊ ရခိုင်ရိုးမအရှေ့ဘက်ခြမ်း မကွေးတိုင်း ပဒါန်း၊ မင်းတုန်း၊ ပဲခူးတိုင်း ပန်းတောင်း၊ ဧရာ၀တီတိုင်း ရေကြည်၊ သာပေါင်းမြို့နယ်တို့ကနေ AA ထိန်းချုပ်ရာဒေသတွေကို ပြီးခဲ့တဲ့ စက် တင်ဘာ ၄ ရက်နေ့ကစပြီး ၄၉၂၆ စစ်ဆင်ရေးလို့ကြွေးကြော်ပြီး တန်ပြန် ထိုးစစ်ဆင်နေခဲ့တာ နှစ်လနီးပါးရှိပြီ ဖြစ်ပါတယ်။

စစ်တပ်ဝါဒဖြန့်လူမှုကွန်ယက်တွေမှာတော့ ရခိုင်တိုက်ပွဲတွေမှာ စစ်တပ်က အသာရနေပြီး AA အထိနာနေတယ်လို့ ဝါဒဖြန့်နေတာတွေ့ရပါတယ်။ စစ်တပ်ဟာ စစ်ဆင်ရေးနှစ်လနီးပါးအတွင်း စစ်တွေမြို့ နယ်အတွင်းက တပ်စခန်း ၁၃ ခု၊ စစ်တွေအစပ် ပေါက်တောမြို့နယ်က ၁ ခု၊ ကျောက်ဖြူမြို့နယ်အတွင်းက ၂ ခု၊ မင်းတုန်းမြို့နယ်အ တွင်းက ၁ ခု ၊ စုစုပေါင်း စစ်တပ်စခန်း ၁၇ ခုထက်မနည်းလက်လွှတ်ဆုံးရှုံးခဲ့ပါတယ် ။