အသက် ၁၂ နှစ်အရွယ် လူငယ်တွေမှာလည်း ကာကွယ်ဆေး အားဖြည့် Booster ထပ်ထိုးဖို့ အမေရိကန် ကျန်းမာရေး အရာရှိတွေက ထောက်ခံ တိုက်တွန်းလိုက်ပါတယ်။
အသက် ၁၂ နှစ်နဲ့ ၁၅ နှစ်ကြား အရွယ်တွေဟာ အခွင့်အရေး ရလာတာနဲ့ Booster ထပ်ထိုးသင့်တယ်လို့ အမေရိကန် ရောဂါ တားဆီး ထိန်းချုပ်ရေးဌာန (CDC)က ကြေညာပါတယ်။ လောလောဆယ် အမေရိကန်မှာ အသက် ၁၆ နှစ်နဲ့ ၁၇ နှစ်အထက် လူငယ်ပိုင်းပါ ကာကွယ်ဆေး ထိုးဖို့ တိုက်တွန်းထားပါတယ်။
Omicronမျိုးကွဲသစ် ကိုရိုနာဗိုင်းရပ်စ် ကူးစက်မှုတွေ မြင့်တက်လာတဲ့နောက် ကာကွယ်ဆေး Booster ထိုးနှံခြင်းကသာ ကိုဗစ်ရောဂါကို ထိထိရောက်ရောက် တွန်းလှန်နိုင်မယ့် အဖြေတစ်ခု ဖြစ်လိမ့်မယ်လို့ CDCက မှတ်ချက် ပေးထားပါတယ်။ ကိုဗစ်ရဲ့ ပြင်းထန်တဲ့ ရောဂါ လက္ခဏာတွေ ပေါ်ထွက်လာနိုင်ခြေကို လျှော့ချဖို့အတွက်ဆိုရင် ကလေးတွေရော၊ ဆယ်ကျော်သက် မြီးကောင်ပေါက်တွေပါ ကာကွယ်ဆေး Booster ထပ်ထိုးထားသင့်တယ်လို့ CDCရဲ့ ညွှန်ကြားရေးမှူး ရော့ချဲလ် ဝါလန်စကီးက ဆိုပါတယ်။
လောလောဆယ်တော့ အမေရိကန်မှာ Pfizerနဲ့ BioNTechက ပူးပေါင်း ထုတ်လုပ်တဲ့ ကာကွယ်ဆေးကိုသာ လူငယ်တွေမှာ ထိုးနှံခွင့် ပြုထားပါတယ်။ ကာကွယ်ဆေးတွေဟာ Omicron အပါအဝင် ကိုရိုနာဗိုင်းရပ်စ် မျိုးကွဲတွေကြောင့် ပြင်းထန်တဲ့ ကိုဗစ်ရောဂါ ဖြစ်ပွားနိုင်ခြေကို ထိထိရောက်ရောက် လျှော့ချနိုင်ဆဲလို့ သုတေသီတွေက ပြောပါတယ်။
ကလေးတွေဟာ ကိုဗစ်ရောဂါ ပြင်းထန်နိုင်ခြေ နည်းပေမယ့် တစ်ဆင့်ခံ အဖြစ်နဲ့ ရောဂါဒဏ် ပိုခံရတဲ့ မိဘတွေ၊ ဘိုးဘွားတွေဆီ ပျံ့နှံ့ ကူးစက်နိုင်တဲ့ သဘောမျိုး ရှိနေပါတယ်။ နောက်ပြီး ကိုဗစ်ကြောင့် ဆေးရုံတက်ရတဲ့ ကလေးနဲ့ ဆယ်ကျော်သက် အရွယ်တွေထဲမှာ ကာကွယ်ဆေး ထိုးမထားသူ အချိုးအစားက သိသိသာသာ ပိုများနေတာကြောင့် Booster ထပ်ထိုးတာကို CDCက ထောက်ခံထားတာ ဖြစ်ပါတယ်။