ရဟတ်ယာဉ်ဌားရမ်းဝယ်ယူတာနဲ့ပတ်သက်ပြီး သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို စစ်ကောင်စီက အဂတိပုဒ်မ နဲ့အမှု ၅ မှု စွဲဆိုလိုက်ပါတယ်။
အဲဒီအမှုတွေကို ဒီနေ့မှာ တရားရုံးက အသိပေးခဲ့တယ်လို့သိရပါတယ်။
စွပ်စွဲခံထားရတဲ့ ဒေါ်အောင်ဆန်းစုကြည်တို့ဘက်က ဒီအမှုတွေကိုလိုက်ပါဆောင်ရွက်မယ့် ရှေ့နေတွေနဲ့ တိုင်ပင်မှာဖြစ်လို့ ရှေ့နေကိုယ်စားလှယ်လွှဲစာမတင်နိုင်သေးကြောင်း တရားရုံးက တင်ပြခဲ့ပါတယ်။
တရားရုံးဘက်ကလက်ခံပြီး ဇန်နဝါရီလ ၂၁ ရက်မှာ ကိုယ်စားလှယ်လွှဲစာတင်ပြဖို့ အသိပေးခဲ့တယ်လို့သိရပါတယ်။
Public Service Announcement
ရဟတ်ယာဉ်ဌားစီးတာနဲ့ ရဟတ်ယာဉ်ဝယ်ယူရာမှာ နိုင်ငံဘဏ္ဍာငွေထိခိုက်နစ်နာတာတွေရှိတယ်ဆိုပြီး သမ္မတဦးဝင်းမြင့် ၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ လူကယ်ပြန်ဝန်ကြီး ဒေါက်တာဝင်းမြတ်အေးတို့ကို အဂတိပုဒ်မနဲ့ စစ်ကောင်စီက တရားစွဲတာပါ။
သဘာဝဘေးအန္တရာယ်ကာကွယ်ရေးအတွက် ရဟတ်ယာဉ် တစ်စီးဌားရမ်းရာမှာ စာချုပ်မှာပါတဲ့ ပျံသန်းချိန်ထက် အသုံးပြုတဲ့ ပျံသန်းချိန်လျော့နည်းခဲ့တာကြောင့် နိုင်ငံဘဏ္ဍာငွေ ထိခိုက်နစ်နာတယ်ဆိုကာ တရားစွဲတာလို့သိရပါတယ်။
ဒါအပြင် နိုင်ငံတော် ပိုင်ရဟတ်ယာဉ်တစ်စီးဝယ်ရာမှာလည်း ဘဏ္ဍာရေးစည်းကမ်းမလိုက်တာတာ ၊ ရဟတ်ယာဉ်မရောက်သေးဘဲ ဝန်ဆောင်ခကို ကြိုပေးထားတာ ၊ သဘာဝဘေးအန္တရာယ်တွေမှာ သုံးဖို့ ဘဏ္ဍာငွေကို ထိရောက်စွာမသုံးဘဲ ရဟတ်ယာဉ်ဝယ်ဖို့ ပေးချေတာတွေကြောင့် နိုင်ငံဘဏ္ဍာ ဆုံးရှုံးရတယ်လို့ စစ်ကောင်စီဘက်က သတင်းထုတ်ပြန်ထားဖူးပါတယ်။
ရဟတ်ယာဉ်ကိစ္စနဲ့ပတ်သက်ပြီး လူကယ်ပြန်ဝန်ကြီး ဒေါက်တာဝင်းမြတ်အေး ၊ သမ္မတ ဦးဝင်းမြင့်နဲ့ ဒေါ်အောင်ဆန်းစုကြည်တို့ကို အဂတိပုဒ်မ ၅၅ နဲ့တရားစွဲလိုက်တယ်လို့သိရပါတယ်။
ဒီပုဒ်မဟာ ထောင်ဒဏ် ၁၅ နှစ်ထိချနိုင်တဲ့ပုဒ်မလည်းဖြစ်ပါတယ်။
