ကယားပြည်နယ် ဒီးမော့ဆိုမြို့နယ် ကျောက်ဆည်ကန်တိုက်ပွဲတွင် စစ်ကောင်စီတပ်က သေဆုံးထိခိုက်မှုများ ပြားခဲ့ရာ စစ်ကောင်စီတပ်ဖွဲ့ဝင်အလောင်းများနှင့် ဖမ်းဆီးရမိခဲ့သည့် စစ်ကောင်စီတပ်ဖွဲ့ဝင် အချို့ကို တော်လှန်ရေးရဲဘော်တစ်ဦးက လူမှုကွန်ရက်တွင်ဖော်ပြခဲ့သည်။
ယမန်နေ့ (မတ်လ ၆ရက်)က ဒီးမော့ဆိုမြို့နယ် ငွေတောင်ကျေးရွာအုပ်စု ဘုရားငုတ်တိုရွာ ကျောက်ဆည်ကန်တွင် တိုက်ပွဲပြင်းထန်ခဲ့ကြောင်း၊ ဒီးမော့ဆို ပြည်သူ့ကာကွယ်ရေးတပ်(PDF)နှင့် ဒေသတင်း မဟာမိတ်ပူးပေါင်းတပ်ဖွဲ့၊ CTU နည်းပညာလက်ရုံးတပ် နှင့် အခြားတော်လှန်ရေးတပ်များပူးပေါင်း၍ စစ်ကောင်စီတပ်ကို ခုခံတိုက်ခိုက်ခဲ့ကြောင်း ဒီးမော့ဆို PDFက ယနေ့နံနက်တွင် ထုတ်ပြန်ထားသည်။
ယမန်နေ့တွင် ကျောက်ဆည်ကန် အပါအဝင် နေရာနှစ်ခု၌တိုက်ပွဲဖြစ်ခဲ့ရာ စစ်ကောင်စီတပ်မှ ၃၅ဦးထက်မနည်းသေဆုံးခဲ့သည်ဟု ဒီးမော့ဆို PDFက ဆိုသည်။
စစ်ကောင်စီတပ်က ဖေဖော်ဝါရီလလည်မှစ၍ ထိုးစစ်ဆင်နေ၍ ဒီးမော့ဆိုနှင့် ရှမ်းကယားနယ်စပ် မိုးဗြဲဒေသတွင် နေ့စဉ်လိုလို တိုက်ပွဲဖြစ်ပွားနေသည်။
Public Service Announcement
