“မနေ့ညတုန်းက ကျောင်းကို အိပ်သွားတာ အင်အား ၅၀နဲ့ ၇၀ကြားရှိမယ်။ သူတို့က နယ်မြေရှင်း လင်းရေးလာတယ်ပြောတာပဲ။ မနက် ၅နာရီခွဲတော့ သူတို့ ပြန်ထွက်သွားတယ်။ ရွာကလူတွေကတော့ မရှိဘူး အကုန်ထွက်ပြေးကြတာ။ အခု မနက် ၅နာရီခွဲတော့ ကျောင်းကနေ ပြန်ထွက်သွားပြီးတော့ ကျောင်းတောင်ဘက်မှာ ပစ်ခတ်သံတွေ ကြားတယ်။ မီးခိုးလုံးတွေလည်း မြင်ရတယ်။ ရှောင်တဲ့တဲတွေမီးရှို့ခံရတယ်ထင်တယ်။ ရွာကနေ ကြောက်ပြီး ရွာ့အပြင်ဘက်မှာ တဲတွေထိုးပြီးနေ ကြတာရှိတယ်။ အဲဒါတွေကို ဒီကောင်တွေ PDF ထင်ပြီး အကုန်မီးရှို့ပစ်လား မသိဘူး”ဟု ၎င်းက ပြောသည်။
ယခင်က အဆိုပါ စည်လှောင်ဒေသသို့ စစ်ကောင်စီတပ် ဝင်ရောက်မှု မရှိခဲ့ကြောင်း၊ ယခု စစ်ကောင်စီတပ်များ ဝင်ရောက်လာ၍ ဒေသခံများ ဒုက္ခကြုံတွေ့နေကြရကြောင်း စည်လှောင်ကျေးရွာခံက ပြောသည်။
ထို့ပြင် မတ်လ ၇ရက်က ယင်းမာပင်ခရိုင် ညောင်ပင်ကြီးဒေသရှိ စစ်ကောင်စီသတင်းပေး ဒလန်လေးဦးကို လက်နက်ကိုင်အဖွဲ့တစ်ခုက ရှင်းလင်းခဲ့ရာ အဆိုပါဒေသသို့ စစ်ကောင်စီတပ်မှ အင်အား ၃၀ခန့်ဝင်ရောက်လာကြောင်း ယင်းမာပင်နယ်ခံတစ်ဦးက ပြောသည်။
“မနေ့က ၁၀နာရီဝန်းကျင်လောက်မှာ ပျူ၊ဒလန် လေးယောက်ကို ရှင်းလိုက်တာ။ ပျူဒလန် လေးယောက်ထဲမှာ ဆားလင်းကြီးက ဒုရဲအုပ်၊ ရဲမေရဲ့ အဖေပါတယ်။ သူတို့က တော်လှန်ရေးအင်အားစုတွေကို အကုန်လိုက်ဖော်ထုတ်နေတာပေါ့။ ရှင်းတာက ငါးယောက်ကို တစ်ယောက်လွတ်သွားတာ။ နောက်ဆက်တွဲက ဘာဖြစ်လာလဲဆိုတော့ စစ်ကောင်စီ အင်အား ၃၀လောက်က ညောင်ပင်ကြီးကိုလာပြီး အိုမာထန်းတောကို မွှေတယ် နှောက်တယ် ပစ္စည်းတွေရှာတယ် မီးရှို့တာပေါ့”ဟု ယင်းမာပင် နယ်ခံတစ်ဦးက ပြောသည်။
Public Service Announcement
စစ်ကောင်စီတပ်သည် ဖေဖော်ဝါရီလကုန်ပိုင်းကလည်း ယင်းမာပင်မြို့နယ် ချင်းပုန်းရွာ နှင့် အနီးတဝိုက်ကျေးရွာများသို့ရဟတ်ယာဉ်ဖြင့် ဝင်ရောက်စီးနင်းပြီး ဒေသခံပြည်သူများကို သတ်ဖြတ်ခြင်း၊ နေအိမ်၊ ကားနှင့် ဆိုင်ကယ်များစွာကို မီးရှို့ဖျက်ဆီးခြင်း ပြုလုပ်ခဲ့သည်ဟု ဒေသခံများက ပြောသည်။
