▪️စစ်ရေးအခြေအနေကြောင့် အာရှလမ်း၌ ပြည်သူများ ခရီးသွားလာရန်မသင့်ဟု ဒေသခံပြော
ကရင်ပြည်နယ် ကော့ကရိတ်မြို့နယ်တွင် ယနေ့တိုက်ပွဲဆက်လက်ဖြစ်ပွားနေပြီး စစ်ကောင်စီတပ်က လက်နက် ကြီးများဖြင့် ဆက်လက်ပစ်ခတ်နေကြောင်း ကော့ကရိတ်ဒေသခံတစ်ဦးက ပြောသည်။
ယမန်နေ့ကတည်းက ကော့ကရိတ်မြို့နယ် ကော့နွယ်အုပ်စုရှိ အာရှလမ်း တဝိုက်တိုက်ပွဲများဖြစ်ပွားနေသည်ဟုဆိုသည်။ ယနေ့တွင် အာရှလမ်းပိုင်း ကော့ကရိတ်ဘက်ခြမ်း တောနော် ရေတံခွန်အနီးတွင် ကုန်တင်ကား အချို့ မီးရှို့ခံထားရကြောင်းလည်း ခရီးသွားအချို့ ဓာတ်ပုံများ ဖော်ပြသည်။
“မနေ့က နေရာမှာပဲ။ ရေတံခွန်ရဲ့ အောက်ဘက်မှာကျမှာပေါ့။ ရေတံခွန် အနီးအနားတဝိုက်ပြောရမှာပေါ့ အဲဒီမှာ စစ်ကြောင်းထိုးနေတယ် ထိုးနေတော့ ပစ်ခတ်မှုတွေဖြစ်တယ်။ ရွာသစ်ကတော့ တချို့တဝက်ထွက်ပြေးနေပြီ။ ကော့နွယ်အုပ်စုကတော့ အကုန်လုံးထွက်ပြေး နေတာပေါ့။ အရင်ကတည်းက သူတို့လည်း ပြန်နေလို့မရသေးဘူးလေ”ဟု ဒေသခံက ပြောသည်။
Public Service Announcement
ကားတစ်စီးတိုက်ခိုက်ခံရ၍ မီးလောင်သွားသည်ဟု သိရကြောင်း၊ အသေးစိတ်မသိရသေးကြောင်း ၎င်းကဆိုသည်။
“စစ်ရေးက ပိုပြီးတော့ ပြင်းထန်လာနိုင်တဲ့ အနေအထားတစ်ခုအပေါ်မှာ ဖြစ်နေတာပေါ့။ နောက် တစ်ခုက ခရီးသွားပြည်သူတွေ ဒီလမ်းကြောင်းကို မသွားသင့်တဲ့ အခြေအနေ ဖြစ်လာပြီပေါ့။ ဒီအာရှလမ်းကို လုံး၀ သွားလို့ မသင့်တဲ့အကြောင်းဖြစ်လာပြီ”ဟု ကော့ကရိတ်ဒေသခံက ပြောသည်။
လတ်တလောတွင် စစ်ရေးသတင်းမရသေးသူများ ခရီးသွားလာမှုရှိနေကြောင်း ၎င်းက ဆိုသည်။
ဒေသကာကွယ်ရေးတပ်ဖွဲ့ဝင်တစ်ဦးကလည်း အာရှလမ်း ကော့ကရိတ်အပိုင်းကို လက်ရှိ အခြေအနေ၌ ဖြတ်သန်းသွားလာခြင်းမပြုရန် အသိပေးထားသည်။ လမ်းပေါ်၌ တိုက်ပွဲဖြစ်နေ၍ ပြည်သူများ ထိခိုက်မှု မဖြစ်စေရန် သတိထားနိုင်ရန် အတွက်ဖြစ်ကြောင်း ၎င်းက ဆိုသည်။
အဆိုပါ ကော့ကရိတ်ဒေသနှင့် လေးကေ့ကော်ဒေသရှိ စစ်ကောင်စီတပ်များ သုံးရက်အတွင်း ဆုတ်ခွာရန် KNU ဒူးပလာယာခရိုင်က မတ်လ ၇ရက်တွင် စစ်ကောင်စီထံ စာပို့ထားပြီးနောက် မတ်လ ၁၁ရက်မှစ၍ အဆိုပါ ဒေသ၌ တိုက်ပွဲ ပြန်လည်ဖြစ်ပွားကာ စစ်ကောင်စီတပ်က အင်အားများဖြည့်တင်းနေသည်။
