ရှမ်းပြည်နယ် မြောက်ပိုင်း မူဆယ်မြို့နယ် မုံးကိုးဒေသ၌ ဖြစ်ပွားခဲ့သည့် ကိုးကန့်လက်နက်ကိုင်အဖွဲ့(MNDAA)နှင့် အာဏာသိမ်းစစ်ကောင်စီတပ်တို့၏ တိုက်ပွဲတွင် စစ်ကောင်စီတပ်ဖွဲ့ဝင် ၇ဦးသေဆုံးပြီး ၁၈ဦး ဒဏ်ရာရရှိခဲ့ကြောင်း MNDAAက တရုတ်ဘာသာဖြင့် ထုတ်ပြန်ထားသည်ဟု ရှမ်းမြောက်ဒေသခံတစ်ဦးက ပြောသည်။
ဇူလိုင် ၁၂ရက်က မုံးကိုးဒေသသို့ စစ်ကောင်စီတပ်က ထိုးစစ်ဆင်လာ၍ တိုက်ပွဲပြင်းထန်စွာ ဖြစ်ပွားခဲ့ကြောင်း၊ စစ်ကောင်စီတပ်ဖွဲ့ဝင်များထံမှ လက်နက်ခဲယမ်းများသိမ်းဆည်းရမိခဲ့ကြောင်း၊ ကိုးကန့်တပ်ဖွဲ့မှလည်း တစ်ဦးဒဏ်ရာရရှိခဲ့ကြောင်း ထုတ်ပြန်ချက်၌ ပါရှိသည်။
“သူတို့လက်နက်တွေရတဲ့ ပုံစံအရတော့ တပ်ကတော့ ထိခိုက်မှုရှိမယ်ထင်တယ်” ဟု ဒေသခံက ပြောသည်။
ကိုးကန့်လက်နက်ကိုင်အဖွဲ့အနေဖြင့် မုံးကိုးဒေသတွင်သာမက ကွတ်ခိုင်မြို့နယ်အတွင်း၌လည်း စစ်ကောင်စီတပ်များနှင့် တိုက်ပွဲဖြစ်ပွားမှုရှိခဲ့သည်။
Public Service Announcement
“ကွတ်ခိုင်မှာဖြစ်ရင်တော့ အများစုက သုံးဖွဲ့ပေါင်းပြီးဖြစ်တာပေါ့။ AAရယ် TNLAရယ် ကိုးကန့်ရယ် ပေါင်းပြီး လှုပ်ရှားတဲ့ပုံစံမျိုး။ မုံးကိုးဘက်မှာတော့ သပ်သပ်မဲ့ တိုက်ပွဲဖော်တာတော့ မဟုတ်လောက်ဘူး။ တပ်မတော်က စစ်ကြောင်းထိုးလာလို့ သူတို့ တိုက်တဲ့တိုက်ပွဲတွေဖြစ်မယ်” ဟု ရှမ်းမြောက်ဒေသခံတစ်ဦးက ပြောသည်။
လက်ရှိ ကိုးကန့်နှင့် စစ်ကောင်စီတပ်တို့ တိုက်ပွဲဖြစ်ပွားရာနယ်မြေ မုံးကိုးဒေသ၌ ကချင်လက်နက်ကိုင်အဖွဲ့(KIA)လည်းလှုပ်ရှားသည်။
