အောင်ဘာလေထီလုပ်ငန်းအား အပြီးတိုင်ဖျက်သိမ်းပြီး ဖြစ်သည့်အတွက် လက်ကားဝယ်ရောင်းနေသော ထီလုပ်ငန်းရှင်ကြီးများအနေဖြင့် အောင်ဘာလေထီလက်မှတ်များ ဝယ်ယူ၊ရောင်းချ၊ဖြန့်ဖြူးခြင်း မပြုကြရန် အထူးသတိပေး တားမြစ်ခြင်းကြောင်း အမျိုးသားညီညွတ်ရေးအစိုးရ(NUG) စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာနက ယနေ့ထုတ်ပြန်သည်။
ဩဂုတ် ၆ရက်က အတည်ပြုပြဌာန်းထားသည့် လောင်း ကစားဥပဒေကို ပထမအကြိမ်ပြင်ဆင်သည့် ဥပဒေတွင် ထီဆိုသည်မှာ အမျိုးသားညီညွတ်ရေးအစိုးရ၊ စီမံကိန်း၊ဘဏ္ဍာရေးနှင့် ရင်းနှီးမြုပ် နှံမှုဝန်ကြီးဌာန ပြည်တွင်းအခွန်များဦးစီးဌာနက ကြီးမှူးဖွင့်လှစ်သော “အောင်လံလွှင့်ချီ နွေဦးထီ” ကို ဆိုလိုကြောင်း အတိအလင်း ပြင်ဆင်ပြဌာန်းထားပြီးဖြစ်သည်ဟု ယခုထုတ်ပြန်ချက်တွင် ဖော်ပြထားသည်။
ထို့ကြောင့် လက်ကားထီလုပ်ငန်းရှင်ကြီးများအနေဖြင့် အကြမ်းဖက်စစ်ကောင်စီ၏ တရားမဝင်လောင်းကစား ဖြစ်သည့် အောင်ဘာလေထီလက်မှတ်များ ဝယ်ယူရောင်းချဖြန့်ဖြူးခြင်း အလျဉ်းမပြုကြရန် အထူးသတိ ပေးတားမြစ်လိုက်ကြောင်း ထုတ်ပြန်သည်။
တားမြစ်ချက်အား ဖောက်ဖျက်ကျူးလွန်သည့် ထီလုပ် ငန်းရှင်ကြီးများအား တည်ဆဲဥပဒေများနှင့်အညီ အရေး ယူဆောင်ရွက်သွားနိုင်ရေးအတွက် အမျိုးသားညီညွတ်ရေးအစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနနှင့် ညှိနှိုင်းပေါင်းစပ်ဆောင်ရွက်သွားမည်ကြောင်း အသိပေးထားသည်။
Public Service Announcement
