အာဖဂန်မှာ အိုင်အက်စ်အဖွဲ့ အကြမ်းဖက် တိုက်ခိုက်လာနိုင်တယ်လို့ အမေရိကန် သတိပေး

အာဖဂန်ရဲ့ မြို့တော် ကဘူးလ်ကို တာလီဘန် စစ်သွေးကြွတွေက သိမ်းပိုက်လိုက်တဲ့နောက် မြို့ထဲမှာ ရှုပ်ရှုပ်ထွေးထွေး အခြေအနေတွေ ဖြစ်ပေါ်နေပါတယ်။ အထူးသဖြင့် တာလီဘန်တွေရဲ့ ရက်စက် ကြမ်းကြုတ်မှုတွေအပေါ် စိုးရိမ် ကြောက်လန့်နေတဲ့ ကဘူးလ်မြို့ခံတွေက အာဖဂန်ကနေ ထွက်ခွာနိုင်ဖို့ ကဘူးလ် လေဆိပ်ဆီ အုံနဲ့ကျင်းနဲ့ သွားရောက်နေပါတယ်။ ကဘူးလ် နိုင်ငံတကာ လေဆိပ်ကိုတော့ လက်ရှိ အချိန်ထိ အမေရိကန် စစ်တပ်က ထိန်းချုပ်ထားပါတယ်။

ဩဂုတ် ၂၂ ရက်မှာတော့ အာဖဂန်မှာရှိတဲ့ အမေရိကန် သံရုံးက လုံခြုံရေး စိုးရိမ်ရတဲ့ အခြေအနေတွေကြောင့် လေဆိပ်ကို အမေရိကန် နိုင်ငံသားတွေ လတ်တလော မသွားရောက်ကြဖို့ တိုက်တွန်း ကြေညာလိုက်ပါတယ်။ လေဆိပ်တဝိုက်မှာ အိုင်အက်စ် စစ်သွေးကြွ အုပ်စုက အကြမ်းဖက် တိုက်ခိုက်လာမှာကို အမေရိကန် ထောက်လှမ်းရေးက စိုးရိမ်နေတာကြောင့်ပါ။

အာဖဂန် အခြေစိုက် အိုင်အက်စ် အဖွဲ့ခွဲဟာ တာလီဘန်တွေနဲ့ ပြိုင်ဘက်အသွင် ရပ်တည်ခဲ့ပါတယ်။ လက်ရှိ အချိန်ထိတော့ အာဖဂန်မှာ အိုင်အက်စ်တွေက အကြမ်းဖက် တိုက်ခိုက်မယ် ဆိုတာမျိုး ခြိမ်းခြောက်ထားတာ မရှိသေးပါဘူး။

လက်ရှိ အနေအထားအရ ကဘူးလ် လေဆိပ်မှာ အာဖဂန် နိုင်ငံသားတွေ ထောင်သောင်းချီ ဝင်ရောက်ဖို့ ကြိုးစားနေတဲ့အတွက် လုံခြုံရေး အစီအမံတွေ မကျိုးပေါက်အောင် ထိန်းထားဖို့ ခဲယဉ်းနေပါတယ်။ အမေရိကန် အစိုးရက ဩဂုတ် ၁၄ ရက်ကစလို့ ကဘူးလ်ကနေ လူပေါင်း ၁၇၀၀၀ လောက်ကို လေယာဉ်တွေပေါ် တင်ဆောင် ခေါ်ယူ ရွှေ့ပြောင်းပေးပြီးပြီလို့ ပြောပါတယ်။ လက်ရှိ အခြေအနေအရ အာဖဂန်မှာ အမေရိကန် နိုင်ငံသား ၅၈၀၀ လောက် ပိတ်မိနေဆဲလို့ ယုံကြည်ရပါတယ်။

Public Service Announcement