အကြမ်းဖက်မြန်မာစစ်တပ်နဲ့ စစ်ရေးဆိုင်ရာပူးပေါင်းဆောင်ရွက်မှုတိုးမြှင့်လုပ်ဆောင်သွားမယ်လို့ ရုရှားကာကွယ်ရေးဝန်ကြီးဌာနက ပြောပါတယ်။
နိုင်ငံတကာတပ်မတော်အားကစားပြိုင်ပွဲနဲ့ စစ်ဘက်ဆိုင်ရာနည်းပညာဖိုရမ် ၂၀၂၁ တက်ရောက်ဖို့ ရုရှားကိုရောက်နေတဲ့ အကြမ်းဖက်စစ်ကောင်စီရဲ့ ကြည်း၊ရေ၊လေ ညှိနှိုင်းကွပ်ကဲရေးမှူး မောင်မောင်အေးနဲ့ ရုရှားကာကွယ်ရေးဒုတိယဝန်ကြီးတို့ ဒီနေ့တွေ့ဆုံဆွေးနွေးရာမှာ နှစ်နိုင်ငံ စစ်ဘက်ဆိုင်ရာပူးပေါင်းဆောင်ရွက်မှုမြှင့်တင်ဖို့ ပြောကြားခဲ့တာပါ။
“စစ်ဘက်နဲ့ စစ်ဘက်ဆိုင်ရာနည်းပညာနယ်ပယ်တွေ အပါအဝင် ကျွန်တော်တို့ နှစ်နိုင်ငံတွေအကြား ဆက်ဆံရေးတိုးချဲ့၊မြှင့်တင်ဖို့ လုပ်ဆောင်သွားမှာပါ” လို့ ရုရှားဒုဝန်ကြီးဖိုမင်က ပြောပါတယ်။
မြန်မာနိုင်ငံဟာ ရုရှားရဲ့ အာရှ-ပစိဖိတ်ဒေသမှာ ယုံကြည်ရတဲ့ မဟာဗျူဟာကျမိတ်ဖက်ဖြစ်ပြီး ပြည်တွင်းနိုင်ငံရေးအခြေအနေဟာ ဆိုးရွားနေတယ်လို့ ရုရှားက လက်ခံပါတယ်။ ဒါပေမဲ့ မြန်မာ ခေါင်းဆောင်ပိုင်းဟာ တည်ငြိမ်းရေးရရှိဖို့ အစွမ်းကုန်လုပ်ဆောင်နေတယ်လို့ ရုရှားက ယူဆနေ ပါတယ်။
Public Service Announcement
ဥပဒေမဲ့ အာဏာသိမ်းတဲ့ ၇ လအတွင်းအကြမ်းဖက်မြန်မာစစ်တပ်ကို နိုင်ငံတကာမျက်နှာစာမှာ ရုရှားကလွဲလို့ ဘယ်နိုင်ငံကမှ အသိအမှတ်ပြုလက်ခံခြင်းမရှိပါဘူး။ ရုရှားဟာ အကြမ်းဖက်စစ်တပ်အတွက် စစ်လက်နက်တင်သွင်းရာအဓိကနိုင်ငံဖြစ်ပြီး အကြမ်းဖက်စစ်ခေါင်းဆောင် မင်းအောင်လှိုင်ဟာလည်း ပြီးခဲ့တဲ့ ဇွန်လက ရုရှားကို ရက်အတန်ကြာသွားရောက်လည်ပတ်ခဲ့ပါတယ်။
ကိုးကား – TASS
