ပဋိပက္ခများဖြစ်ပါလာပါက အသုံးပြုရန် တစ်ကိုယ်စာအရေးပေါ် အိတ် အတွက် ကြိုတင်စုဆောင်းပြင်ဆင်ထားသင့်သည့်ပစ္စည်းများစာရင်းကို အမျိုးသားညီညွတ်ရေးအစိုးရ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက စက်တင်ဘာ ၂ရက်တွင် ထုတ်ပြန်သည်။
အဆိုပါ ဝန်ကြီးဌာနအနေဖြင့် ပဋိပက္ခများအတွင်း ပြည်သူများ ဘေးအန္တရာယ်အတွက် ကြိုတင်ပြင်ဆင်ရမည့် အချက်များကို အပိုင်းလိုက် ထုတ်ပြန်လျက်ရှိရာ အပိုင်း (၅)ကို ထပ်မံထုတ်ပြန်ခြင်းဖြစ်သည်။
အရေးပေါ် အိတ်အတွက် ကြိုတင်စုဆောင်းပြင်ဆင်ထားသင့်သည့် ပစ္စည်းများစာရင်းမှာ သောက်သုံးရေ၊ မုန့်ခြောက်၊ ခေါက်ဆွဲခြောက်၊ အရေးပေါ်ဆေးဝါးတွေ၊ လက်သန့်ဆေး၊ နှာခေါင်းစည်း၊ နားတွင်း ပိတ်ဆို့စရာ ၊ ဂွမ်းစ ၊ပတ်တီးလိပ်၊ ခြင်နှင့် ပိုးမွှားအန္တရာယ် ကာကွယ်နိုင်မည့် လူးဆေးနှင့် ဖြန်းဆေးများ စုဆောင်းပြင်ဆင်ထားသင့်ကြောင်း ဖော်ပြထားသည်။
ထို့ပြင် ဓာတ်ခဲ သို့မဟုတ် နေရောင်ခြည်ဖြင့်သုံးနိုင်သည့် ဓာတ်မီး၊ ထီး၊ မိုးကာ၊ စာကြည့်မီး၊ ဖုန်းအားသွင်းကြိုး၊ Power Bank ၊ ဖုန်းငွေဖြည့်ကဒ်၊ အတွင်းခံအပါအဝင် လွတ်လပ်ပေါ့ပါးသည့် အဝတ်အစားအချို့၊ အမျိုးသမီးဖြစ်ပါက လစဉ်သုံးပစ္စည်းတို့ကိုလည်း စုဆောင်းပြင်ဆင်ထားသင့်သည်ဟု ဆိုသည်။
Public Service Announcement
စာချုပ်စာတမ်းနှင့် လုပ်ငန်းလိုင်စင်ကဲ့သိုသောအရေး ကြီးစာရွက်စာတမ်းများ၊ မှတ်ပုံတင်၊ ယာဉ်မောင်းလိုင်စင်၊ အိမ်ထောင်စုစာရင်း၊ ငွေကြေး၊ ဘဏ်စာအုပ်နှင့် တန်ဖိုးကြီးပစ္စည်းများ၊ တစ်သျှူးအစိုနှင့် အခြောက်၊ ဖယောင်းတိုင်၊ မီးခြစ်၊ ဓား၊ ကတ်ကြေး၊ ရေဒီယိုနှင့် ခရာတို့ကိုလည်း စုဆောင်းပြင်ဆင်ထားသင့်ကြောင်း ထုတ်ပြန်ခဲ့သည်။
ယခင်က ထုတ်ပြန်ခဲ့သည့် အသိပေးချက်များမှာ ပဋိပက္ခကြိုများအတွင်းဘေးအန္တရာယ်အတွက် ကြိုတင်ပြင်ဆင်ရန်အပိုင်း(၁)၊ အပိုင်း(၂)လက်နက်ငယ်ဖြင့် ပစ်ခတ်ခံရနိုင်သည့် ဒေသများရှိ အရပ်သားပြည်သူများ အတွက်သတိပြုရန် အချက်များ၊ အပိုင်း(၃) နေအိမ်ကို စွန့်ခွာရမည်ဆိုပါက ဆောင်ရွက်သင့်သည့် အချက်များ၊ အပိုင်း(၄) လက်နက်ကြီးဖြင့် ပစ်ခတ်ခံရနိုင်သည့် ဒေသများက အရပ်သားပြည်သူများအတွက် သတိပြုရမည့် အချက်များဖြစ်သည်။
