ကော်ဘရာစစ်ကြောင်း ဖွဲ့စည်းပုံကို ပြင်ဆင်
ကော်ဘရာစစ်ကြောင်း ဖွဲ့စည်းပုံကို ပြင်ဆင်ဗိုလ်မှူးချုပ် နယ်ဒါးမြ၏ ကော်သူးလေအာမီလက်အောက်ခံ စစ်ကြောင်းဖြစ်သည့် Venom စစ်ကြောင်း တစ်ခုလုံး လာရောက်ပူးပေါင်းလာကြောင်း ကရင်အမျိုးသားအစည်းအရုံး(KNU) ဦးဆောင်မှုအောက်ရှိ ကော်ဘရာစစ်ကြောင်းက ယနေ့ သတင်းထုတ်ပြန်သည်။
“Cobra စစ်ကြောင်းထံသို့ Venom စစ်ကြောင်းတစ်ကြောင်းလုံး လာရောက်ပူးပေါင်း”ဟု ဖော်ပြထားပြီး ဧပြီ ၄ရက်တွင် လာရောက်ပူးပေါင်းခြင်းဖြစ်သည်ဟု အသိပေးထားသည်။
အဆိုပါ ပူးပေါင်းမှုကြောင့် ကော်ဘရာစစ်ကြောင်း၏ဖွဲ့စည်းပုံအား စစ်ကြောင်း(၁)နှင့် စစ်ကြောင်း(၂)ဟူ၍ ပြန်လည်ဖွဲ့စည်းလိုက်ကြောင်း အသိပေးထားပြီး ကော်ဘရာစစ်ဆင်ရေးမှူး – ဗိုလ်ဒါဘော၊ စစ်ကြောင်း(၁)စစ်ကြောင်းမှူးအဖြစ် ဗိုလ်စောကော် စစ်ကြောင်း(၁)ဒုစစ်ကြောင်းမှူး – ဗိုလ်တွံတေး (ခ) စောဘလူ့ဒို့တို့ တာဝန်ယူမည်ဟု ထုတ်ပြန်သည်။
စစ်ကြောင်း(၂)စစ်ကြောင်းမှူးအဖြစ် Venom စစ်ကြောင်းမှူးဖြစ်သည့် ဗိုလ်စောဝင်းမြင့်အား တာဝန်ပေးအပ်ခဲ့ပြီး စစ်ကြောင်း(၂)ဒုစစ်ကြောင်းမှူးမှာ ဗိုလ်စောငြိမ်းချမ်းဝင်း ဖြစ်သည်ဟုဆိုသည်။
Public Service Announcement
”ကျွန်တော်တို့လူငယ်တွေသည် စနစ်ဆိုးကြီးကို ဖြိုရန်စည်းလုံးမှူကို တည်ဆောက်နေပါသည်”ဟု ကော်ဘရာစစ်ကြောင်း (၁)စစ်ကြောင်းမှူး ဗိုလ်စောကော်က ၎င်း၏ Facebook မှတဆင့် အသိပေးသည်။
ဗိုလ်မှူးချုပ်နယ်ဒါးမြသည် ယခင်က KNU လက်အောက်ရှိ ကရင်အမျိုးသားကာကွယ်ရေးတပ်(KNDO) စစ်ဦးစီးချုပ် ဖြစ်သော်လည်း ဝေါ်လေဒေသ တံတားလုပ်ငန်းခွင်မှ အရပ်သားများ အစုလိုက်အပြုံလိုက် သတ်ဖြတ်မှု နှင့်ပတ်သက်ပြီး KNU၏ စုံစမ်းစစ်ဆေးမှုကို လက်မခံသည့်အပြင် ကော်သူးလေအာမီဟု ခွဲထွက်တည်ထောင်ခဲ့၍ အဖွဲ့မှ ထုတ်ပယ်ခံခဲ့ရသူဖြစ်သည်။
ကော်ဘရာ စစ်ကြောင်းအနေဖြင့် ကော်သူးလေ အာမီအောက်ရှိ စစ်ကြောင်းအချို့၌ ပူးတွဲပြီး မြ၀တီ သင်္ဃန်းညီနောင် ဒေသစစ်ဆင်ရေးကို ဆောင်ရွက်ခဲ့သည်။ အဆိုပါ စစ်ဆင်ရေးကို ဗိုလ်မှူးချုပ်နယ်ဒါးမြ ဦးဆောင်သည်ဟု သတင်းများ ဖြန့်ဝေခဲ့သည့်အပေါ် ကော်ဘရာ စစ်ကြောင်းမှူး ဗိုလ်ကြီးဒါဘောက မဟုတ်မှန်ကြောင်း ပြန်လည်ရှင်းလင်းခဲ့သည်။ ၎င်းအနေဖြင့် ဗိုလ်မှူးချုပ်နယ်ဒါးမြ ဦးဆောင်မှုဖြင့် စစ်ဆင်ရေး တစ်ကြိမ်မှ မလုပ်ဆောင်ခဲ့ဖူးကြောင်း၊ KNU၏ ဦးဆောင်မှုအောက်မှ KNU ၏ မူဝါဒအတိုင်း ဆောင်ရွက်နေခြင်းဖြစ်ကြောင်း ဗိုလ်ကြီးဒါဘောက ဖြေရှင်းထားသည်။
