ဖားကန့်တွင် မကြာခဏတိုက်ခိုက်ခံနေရသော စစ်ကောင်စီတပ်သည်ဖားကန့်မြို့အဝင်တွင်ကွန်ကရစ်ဘန်ကာအသစ်များတည်ဆောက်နေကြောင်းဒေသခံများကပြောသည်။
ဖားကန့်မြို့အဝင်လုံးခင်းကျေးရွာရှိလယ်ပြင်ဂိတ်တွင်ကွန်ကရစ်ဘန်ကာ နှစ်ခု တည်ဆောက်နေသည်ကို တွေ့ရသည်ဟု ဒေသခံတစ်ဉီးကယနေ့(ဧပြီလ ၂၆ရက်) ပြောသည်။
“လယ်ပြင်ဂိတ်မှာဆောက်နေတာဗျ။ပြီးတောင်ပြီးတော့မယ်။ဒီဂိတ်က ဖားကန့်ရဲ့ အဝင် အဓိကဂိတ်ပဲ” ဟု ဒေသခံတစ်ဦးကပြောသည်။
စစ်ကောင်စီတပ်သည်ဖားကန့်တွင်မကြာခဏတိုက်ခိုက်ခံနေရသောကြောင့် ဘန်ကာတည်ဆောက်ခြင်းဖြစ်သလို လက်နက်အားကိုးပြီး ရမ်းသမ်းပစ်ခတ်လာနိုင်ကြောင်း ဖားကန့်မြို့နယ်ပြည်သူ့ကာကွယ်ရေးတပ်ဖွဲ့၏ ရဲဘော်တစ်ဦးကပြောသည်။
Public Service Announcement
“ဘန်ကာဆောက်လည်းစစ်ခွေးအုပ်စုမလုံခြုံဘူး။ဒါပေမယ့် ပြည်သူ တွေအတွက်ကတော့ အန္တရာယ်ကြီးသွားမယ်လို့ထင်တယ်။ ဒီကောင်တွေကသံသယရှိတာနဲ့ဘန်ကာထဲကနေ ရမ်းပစ်မယ့်ကောင်တွေ”ဟု အဆိုပါ ထောက်ပို့ရဲ ဘော်ကပြောသည်။
စစ်ကောင်စီသာည် ရန်ကုန်မြို့တွင်လည်း မြို့ပြပြောက်ကြားအဖွဲ့များက မကြာခဏအတိုက်ခံလာရပြီးနောက် ဘန်ကာများဆောက်ခဲ့သည်။
ဖားကန့်တွင်စစ်ကောင်စီသည် KIA ၊PDF ပူးပေါင်းတပ်ဖွဲ့၏ တိုက်ခိုက်မှုကို မကြာခဏ ခံနေရပြီး တိုက်ခိုက်မှုတိုင်းတွင် အထိနာနေသည်။စစ်ကောင်စီတပ်ကတိုက်ခိုက်ခံရပါက အရပ်သားများကို စစ်ကောင်စီ ပစ်မှတ်ထားတုန့်ပြန်ခြင်း ၊လက်နက်ကြီးဖြင့် ရမ်းသန်းပစ်ခတ်ခြင်းပြုလုပ်လေ့ရှိကြောင်းဒေသခံများကပြောသည်။
ပြီးခဲ့သည့် မတ်လ ၁၈ရက်ညနေကလုံးခင်းကျေးရွာမျောက်ကုန်းနေရာတွင် ကားဖြင့်လာသောစစ်ကောင်စီတပ်ကိုကေအိုင်အေ၊ PDF ပူးပေါင်းတပ်ဖွဲ့က လမ်းမှဖြတ်၍ တိုက်ခိုက်ခဲ့သည်။စစ်ကောင်စီတပ်ဖွဲ့ဝင်သုံးဦး သေဆုံးခဲ့ပြီးနောက် စစ်ကောင်စီတပ်က လက်နက်ကြီးများဖြင့်ပြန်ပစ်ရာ ပြည်သူ ခြောက်ဦးသေဆုံးခဲ့သည်။ပစ်ခတ်ခံရသည့်နေရာပတ်ဝန်းကျင်မှ နေအိမ်များကို စစ်ကောင်စီတပ်က ဘူဒိုဇာဖြင့် ထိုး၍ ဖျက်ဆီးခဲ့သည်။ဖားကန့်မြို့နယ် ဆိုင်းဘရာကျေးရွာအနီး ဧပြီလ ၁၈ရက်က တိုက်ပွဲတွင်လည်း ဒေသခံများကို ဖမ်းဆီးကာ ၎င်းတို့၏ စစ်ကြောင်းရှေ့တွင် ထားပြီး အကာအကွယ်ယူခဲ့သည်။
ထို့အပြင်ဖားကန့်မြို့၊ မရှီကထောင်ရပ်ကွက်ရှိ HAPPY KTV တွင် ဧပြီလ ၂၃ရက်နံနက်အစောပိုင်းကစစ်တပ်၏ တပ်မ ၃၃ လက်အောက်ခံတပ်ရင်းခလရ(၁၃)စစ်ကြောင်းမှူး ဒုဗိုလ်မှူးဇော်မောင် (DSA အပတ်စဥ် ၄၇)နှင့်အတူ ကျောက်စိမ်းလုပ်ငန်းရှင် အမျိုးသားနှစ်ဦးနှင့် အမျိုးသမီးနှစ်ဦး သေနတ်ဖြင့် ပစ်သတ်ခံရသည်။ ဧပြီ ၂၄ရက် နံနက်တွင်ယလင်ကတည်းကဖမ်းထားသော PDF တစ်ဦးနှင့် အရပ်သားတစ်ဦးကို စစ်တပ်က ပစ်သတ်ပြီး Happy KTV ရှေ့ အများပြည်သူမြင်ကွင်းတွင်ရုပ်အလောင်းကိုလာချသွားသည်။
ယမန်နေ့(ဧပြီလ ၂၅ရက်)ကလည်းဖားကန့်မြို့ မှော်ပုံနှင့် ကံဆီးရွာကြားတွင် KIA ၊PDF ပူးပေါင်းတပ်ဖွဲ့နှင့် စစ်ကောင်စီတိုက်ပွဲအပြင်းအထန်ဖြစ်ပွားခဲ့ပြီး စစ်ကောင်စီက လူနေကျေးရွာများဘက်သို့ လက်နက်ကြီးများဖြင့် ပစ်ခတ်ခဲ့သည်။ထို့အပြင် ဆန်ခါနှင့် မှော်ပုံကျေးရွာမှ အရပ်သား ၂၁၅ ဦးကို ဧပြီလ ၂၁ရက်က ဖမ်းဆီးခဲ့ပြီး လူသားတံတိုင်းကဲ့သို့ ပြုလုပ်ထားသည်ဟု တော်လှန်ရေးအင်အားစုများကပြောသည်။ ဖမ်းဆီးထားသူများအနက် ၂၅ဦးကို ယနေ့ ပြန်လွှတ်ပေးကြောင်း သတင်းထွက်ပေါ်နေသော်လည်း အသေးစိတ်မသိရသေးပေ။
(စစ်တပ်က ဖားကန့်မြို့အဝင် လယ်ပြင်ဂိတ်တွင် ဘန်ကာဆောက်လုပ်ထားသည်ကိုတွေ့ရစဥ်။ ဓါတ်ပုံ-Manau Voice)
