တပတ်ကို ပုံမှန် ၄ ရက်နီးပါး ရုံးထုတ်ထွက်နေရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရဲ့ ကျန်းမာရေးအတွက် စိုးရိမ်တာကြောင့် တရားခွင်ကို ရက်ခြားစစ်ဆေးပေးဖို့ လျှောက်ထားချက်ကို တရားရုံးက ပယ်ချလိုက်တယ်လို့သိရပါတယ်။
ဒေါ်အောင်ဆန်းစုကြည်ဟာ ပုဒ်မ ၁၁ ခုနဲ့ တရားစွဲခံထားရတာဖြစ်ပြီး ပုဒ်မ ၅၀၅(ခ) နဲ့ သဘာဝဘေး ဥပဒေ နဲ့စွဲဆိုထားတဲ့အမှု တွေကို အပတ်စဉ် တနလာၤနဲ့ အင်္ဂါနေ့တွေမှာစစ်ဆေးတာပါ။
ကြာသပတေးနေ့မှာ အစိုးရ လျှို့ဝှက်ချက်ဥပဒေ နဲ့စွဲဆိုထားတဲ့အမှုကိုစစ်ဆေးပါတယ်။
အဂတိပုဒ်မနဲ့ စွပ်စွဲခံရတဲ့အမှုကို တပတ်ခြားတခါ သောကြာနေ့တိုင်းစစ်ဆေးဖို့ တရားရုံးက ဆုံးဖြတ်ထားတာပါ။
Public Service Announcement
“တပတ်မှာ ၄ ရက် အမေက ပုံမှန်ရုံးထုတ်ထွက်ရသလိုဖြစ်နေတော့အမေ့ ကျန်းမာရေးကို စိတ်ပူလို့ ရုံးတော်ကို ကျွန်မတို့က လျှောက်ထားတာ ၊အခုစစ်နေတဲ့တနင်္လာ၊အင်္ဂါ အပတ်စဉ် ရုံးချိန်းကို တပတ်ခြားတခါ ရွှေ့ပေးဖို့ဆိုပြီးတော့ လျှောက်ထားတာ ရုံးတော်က ခွင့်မပြုဘူးဆက်တိုက်သွားမယ်လို့ပြောပါတယ်” လို့ တရားလွှတ်တော်ရှေ့နေ ဒေါ်မင်းမင်းစိုးက ပြောပါတယ်။
ဒီနေ့မှာတော့ပုဒ်မ ၅၀၅ (ခ ) နဲ့အမှု ကိုစစ်ဆေးခဲ့တာလို့သိရပါတယ်။
