▪︎မြေပြင်တွင် အရေအတွက် ပိုမိုများပြားဟု သတင်းရင်းမြစ်များပြော
မြန်မာနိုင်ငံတွင် နေရပ်စွန့်ခွာထွက်ပြေးတိမ်းရှောင်သူအရေအတွက် ၁.၈ သန်းကျော်(၁,၈၅၁,၇၀၀)ရှိနေပြီဖြစ်ကြောင်း ကုလသမဂ္ဂဒုက္ခသည်များအေဂျင်စီ UNHCR ၏ အစီရင်ခံစာထုတ်ပြန်ချက်အရ သိရသည်။
အပြည်ပြည်ဆိုင်ရာဒုက္ခသည်များနေ့မတိုင်မီ UNHCR ၏ အစီရင်ခံစာတွင် ဖော်ပြခြင်းဖြစ်ပြီး အထက်ပါနေရပ်စွန့်ခွာသူ ၁.၈ သန်းကျော်အနက် ၁.၅ သန်ကျော်(၁,၅၂၃,၇၀၀)မှာ စစ်အာဏာသိမ်းမှုအပြီး ပြည်တွင်းနှင့် အိမ်နီးချင်းနိုင်ငံများသို့ ထွက်ပြေးတိမ်းရှောင်နေရသည့် အရေအတွက်ဖြစ်သည်။ လူဦးရေ ၃၂၈,၀၀၀ မှာ စစ်အာဏာသိမ်းမှုမတိုင်မီ ပြည်တွင်းနေရပ်စွန့်ခွာရခြင်းဖြစ်ကြောင်း UNHCR က ဆိုသည်။
စစ်အာဏာသိမ်းမှုအပြီးတွင် စစ်ကိုင်းတိုင်းမှာ နေရပ်စွန့်ခွာသူအရေအတွက် ၇၆၅,၂၀၀ ဦးဖြင့် အများဆုံးဖြစ်ပြီး အကြမ်းဖက်စစ်အုပ်စု၏ မီးရှို့ဖျက်ဆီးခံရမှုလည်း အများဆုံးခံစားနေရသည့် ဒေသဖြစ်သည်။ မကွေးတိုင်းမှာ ၂၀၅, ၆၀၀ ဦးဖြင့် နေရပ်စွန့်ခွာသူအရေအတွက် ဒုတိယအများဆုံးဖြစ်သည်။
မြန်မာနိုင်ငံတွင် စစ်အာဏာသိမ်းမှုမတိုင်မီတွင် ကချင်၊ ကရင်၊ ချင်း၊ ရခိုင်နှင့် ရှမ်းပြည်နယ်တို့မှာ နေရပ်စွန့်ခွာသူများပြားခဲ့သော်လည်း အာဏာသိမ်းမှုအပြီးတွင် ကရင်နီပြည်နယ်၊ ပဲခူးတိုင်း၊ မွန်ပြည်နယ်နှင့် တနင်္သာရီတိုင်းတို့မှာ နေရပ်စွန့်ခွာသူ အများအပြားရှိလာခဲ့သည်။
Public Service Announcement
UNHCR ၏ အစီရင်ခံစာအရ ကရင်နီပြည်နယ်(ကယား)တွင် ၉၈,၁၀၀ ဦး နေရပ်စွန့်ခွာရသည်ဟု ဖော်ပြထားသည်။ သို့သော် မကြာသေးမီက မြေပြင်တွင် စစ်ရှောင်အရေးကူညီဆောင်ရွက်ပေးနေသူ ကရင်နီပြည်လူမှုအသင်းအဖွဲ့များကွန်ရက် တာ၀န်ရှိသူတစ်ဦးက ဖယ်ခုံ၊ မိုးဗြဲအပါအဝင် ကရင်နီဒေသတွင် ပျမ်းမျှ စစ်ရှောင်(နေရပ်စွန့်ခွာ)အရေအတွက်မှာ ၂၁၀,၀၀၀ ကျော်ရှိနေပြီဟု People’s Spring သို့သည်။
အခြား ပြည်နယ်နှင့် တိုင်းများတွင်လည်း မြေပြင်ရှိ နေရပ်စွန့်ခွာသူအရေအတွက်မှာ UNHCR အစီရင်ခံစာပါအရေအတွက်ထက် ပိုမိုများပြားသည်ဟု သတင်းရင်းမြစ်များက ပြောသည်။
