အာဏာသိမ်းစစ်တပ်က စစ်အင်အားတိုးချဲ့ပြီး ထိုးစစ်ဆင်မှုဆက်လက်လုပ်ဆောင်နေပါက ကချင်ပြည်နယ်သာမက Kachin sub-state ဒေသများတွင် တိုက်ပွဲကဆက်လက်ဖြစ်ပွား နိုင်ခြေရှိ ကြောင်း စစ်ရေးအကဲခတ်သူများက သုံးသပ်ထားသည်ဟု ကချင်လက်နက်ကိုင်အဖွဲ့(KIA) သတင်းနှင့်ပြန်ကြားရေးဌာန Kachinnet Burmese က သတင်းဖော်ပြသည်။
အာဏာသိမ်းစစ်တပ်မှ ထိုးစစ်ဆင်မှုများပြုလုပ်နေ၍ KIAနှင့် တိုက်ပွဲများ ဆက်လက်ဖြစ်ပွားနေကြောင်း သတင်းဖော်ပြရာတွင် အထက်ပါအတိုင်း ထည့်သွင်း ဖော်ပြခဲ့သည်။
“Kachin sub-state ဆိုတာ ရှမ်းပြည်မြောက်ပိုင်းလေ။ ရှမ်းပြည်မြောက်ပိုင်းမှာ တပ်မဟာ(၄)ရှိတယ် တပ်မဟာ (၉)ရှိတယ်။ တပ်မဟာ(၆)ရှိတယ်။ မူဆယ်တို့ မုံးကိုးတို့ ကွတ်ခိုင်တို့ ပါတယ်လေ” ဟု ကချင်ဒေသခံတစ်ဦးက ပြောသည်။
အာဏာသိမ်းစစ်တပ်က ကချင်ဒေသအနှံတွင် ထိုးစစ်ဆင်စစ်ရေးလှုပ်ရှားမှု များဆက်လက်လုပ်ဆောင်နေသည့်အတွက် KIAနှင့် တိုက်ပွဲ ဆက်လက်ဖြစ်ပွားလျက်ရှိကြောင်း၊KIA တပ်မဟာ(၈) တပ်ရင်း(၅)နယ်မြေ၊ တပ်မဟာ (၄)နယ်မြေ၊ တပ်မဟာ(၆) နယ်မြေ များ၌ တိုက်ပွဲများ ဖြစ်ပွားခဲ့ကြောင်း Kachinnet Burmese က သတင်းဖော်ပြသည်။
Public Service Announcement
ဇူလိုင် ၉ရက်နှင့် ၁၀ရက်တွင် ဂေါဂွေချောင်း(ကောက်ကွေ့ချောင်း)အနီး မြို့လှကျေးရွာတ၀ိုက် တွင် အာဏာ သိမ်းစစ်တပ်နှင့် တိုက်ပွဲဖြစ်ပွားခဲ့ရာ အာဏာသိမ်းစစ်တပ်မှ တိုက်လေယာဉ်များဖြင့် ဗုံးကြဲတိုက်ခိုက်ခဲ့ကြောင်း ဖော်ပြသည်။
KIA တပ်မဟာ(၄)နယ်မြေ နမ်ဘာချီ ကျေးရွာအနီး၌ တိုက်ပွဲပြင်းထန်ခဲ့ကြောင်း၊ ထို့ပြင် တပ်မဟာ(၆)၊ တပ်ရင်း (၃၆) နယ်မြေ မုန်းကုန်းဒေသ ဖောင်းဆိုင်ကျေးရွာအနီး၌လည်း အာဏာသိမ်းစစ်တပ်နှင့် ကိုးကန့်လက်နက်ကိုင်အဖွဲ့တို့ တိုက်ပွဲဖြစ်ပွားခဲ့ကြောင်း သတင်းဖော်ပြခဲ့သည်။
ရွှေကူမြို့နယ် မြို့နယ်ကျေးရွာအနီး တိုက်ပွဲတွင် KIA တပ်ဖွဲ့ဝင်များနှင့်အတူ ပြည်သူ့ကာကွယ်ရေးတပ်ဖွဲ့ (PDF)များလည်း ပူးပေါင်းတိုက်ခိုက်ခဲ့ကြောင်း ကသာ PDFက သတင်းထုတ်ပြန်ထားသည်။ KIA/PDF ပူးပေါင်းအဖွဲ့နှင့် စစ်ကောင်စီအကြား တိုက်ပွဲပြင်းထန်ခဲ့ရာ ဇူလိုင် ၅ရက်မှ ၉ရက်အထိ စစ်ကောင်စီ တပ်ဖွဲ့ဝင် ၁၈၀ ကျော်သေဆုံးခဲ့ကြောင်း ကသာ PDFက ထုတ်ပြန်ထားသည်။
KIA/PDF ပူးပေါင်းအဖွဲ့မှလည်း ၃ဦး ကျဆုံး သုံးဦး အဆက်အသွယ်မရဟု ဆိုသည်။ အဆိုပါ တိုက်ပွဲ၌ ထိခိုက်သေဆုံးမှု စာရင်းများနှင့်ပတ်သက်ပြီး သီးခြားအတည်ပြုနိင်ခြင်းမရှိသေးပေ။
