ကရင်အမျိုးသားအစည်းအရုံး(KNU/KNLA)တပ်မဟာ (၅)နယ်မြေ ဖာပွန်ခရိုင်အတွင်း၌ တိုက်ပွဲဆက်လက်ဖြစ်ပွား၍ စစ်ကောင်စီတပ်ဖွဲ့ဝင် ၁၂ဦး ထပ်မံသေဆုံးကြောင်း KNU တပ်မဟာ(၅)က ယနေ့ ထုတ်ပြန်သည်။
ဩဂုတ် ၂၁ရက်နှင့် ၂၂ရက် နှစ်ရက်တာအတွင်း ကရင့်အမျိုးသားလွတ်မြောက်ရေး တပ်မတော် KNLAနှင့် နယ်မြေကျူးကျော်ဝင်ရောက်လာသည့် အာဏာလုစစ်ကောင်စီတို့ အကြား ရင်ဆိုင် တိုက်ပွဲပေါင်း ၉ကြိမ်ဖြစ်ပွားခဲ့ရာ စစ်ကောင်စီဘက်က ၁၂ဦးသေဆုံးကာ ၁၉ဦး ဒဏ်ရာရရှိခဲ့ကြောင်း တပ်မဟာ(၅)က ထုတ်ပြန်ခဲ့သည်။ KNLA ဘက်က အကျအဆုံးမရှိဟုလည်း ဖော်ပြထားသည်။
တပ်မဟာ(၅) ထိန်းချုပ်နယ်မြေတွင် အာဏာလုစစ်ကောင်စီလက်အောက်ခံတပ်များက စစ်အင်အားတိုးချဲ့ဝင်ရောက်လာခြင်းကြောင့် တိုက်ပွဲများနေ့စဉ်နီးပါး ဖြစ်ပွားလျက်ရှိကြောင်း KNU က ထုတ်ပြန်ထားသည်။
