အကြမ်းဖက်စစ်တပ် အာဏာသိမ်းချိန်စလို့ မတရားဖမ်းဆီးခံရသူတွေအားလုံးရဲ့ ၈၂ ရာခိုင်နှုန်းကို ဘယ်နေရာမှာ ထိန်းသိမ်းထားတယ်ဆိုတာ မသိရရှိဘူးလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP)ရဲ့ ထုတ်ပြန်ချက်မှာ ဖော်ပြပါတယ်။
အဲဒီလိုတရားလက်လွတ်ဖမ်းဆီးထိန်းသိမ်းချုပ်နှောင်ခံထားရသူများအား ဘယ်နေရာမှာ ထိန်းသိမ်းထားတယ်ဆိုတာကို စစ်အုပ်စုက ထုတ်ဖော်ပြောကြားဖို့ နိုင်ငံ တကာအသိုင်းအဝိုင်းက တောင်းဆိုဖို့လိုအပ်တယ်လို့လည်း AAPP က တိုက်တွန်းပါတယ်။
ဒီနေ့ ဩဂုတ် ၃၀ ရက်ဟာ အပြည်ပြည်ဆိုင်ရာ အတင်း အဓမ္မအစအနပျောက်ဆုံးစေမှုဒဏ်ခံရသူ များနေ့ဖြစ်ပြီး စစ်တပ်အာဏာသိမ်းချိန်ကစလို့ မြန်မာပြည်သူလူထုတစ်ရပ်လုံးကို ခြိမ်းခြောက် နေတဲ့ သူတို့ရဲ့ လူမဆန်တဲ့ကျူးလွန်မှုတွေထဲမှာ ပါဝင်နေတဲ့ပြည်သူများကို အတင်းအဓမ္မအစအန ပျောက်ဆုံးစေမှုတွေကို နိုင်ငံ တကာအသိုင်းအဝိုင်းက သတိမူပြီး အရေးယူမှုလုပ် ဆောင်ဖို့လည်း AAPP က တောင်းဆိုပါတယ်။
အကြမ်းဖက်စစ်တပ်အာဏာသိမ်းချိန်ကစလို့ ဒီနေ့အထိ ဖမ်းဆီးခံရသူ စုစုပေါင်း ၇၆၂၇ ဦး ရှိခဲ့ရာ ဖမ်းဆီးခံများကို ဘယ်နေရာမှာချုပ်နှောင်ထိန်းသိမ်းထားတယ်ဆိုတာကို စစ်အုပ်စုက ထုတ်ဖော်ပြောကြားခြင်းမရှိခဲ့ပေ။
Public Service Announcement
မိသားစုကိုယ်တိုင်၊ အရပ်ဖက်အဖွဲ့အစည်းတွေ၊ ရှေ့နေတွေ၊ မီဒီယာတွေ စတာတွေရဲ့ ကြိုးပမ်း အားထုတ်မှုကြောင့်သာ ဖမ်းဆီးခံရသူအချို့ဟာ ဘယ်နေရာမှာ ရှိနေတယ်ဆိုတာ သိရှိရခြင်း ဖြစ်ပါတယ်။
“နိုင်ငံတော်သမ္မတဦးဝင်းမြင့်နဲ့ လူထုခေါင်းဆောင်ဒေါ်အောင်ဆန်းစုကြည်ကိုတောင် ဒီကနေ့အထိ ဘယ်နေရာမှာ ထိန်းသိမ်းထားတယ်ဆိုတာ မထုတ်ပြန်တဲ့အပြင် ရှေ့နေတွေနဲ့ တွေ့ခွင့် ကိုပါ ပိတ်ပင်တာတွေ လုပ်လာခဲ့တယ်။ ဒီလိုရည်ရွယ်ချက်ရှိရှိ အစအနပျောက်ဆုံးစေခြင်းဟာ ပြည်သူတွေရဲ့လုံခြုံရေးကို ကြီးမားစွာခြိမ်းခြောက်တာဖြစ်ပြီး နိုင်ငံတကာဥပဒေတွေကိုလည်း စိန်ခေါ်ရာရောက်ပါတယ်”လို့ AAPP အတွင်းရေးမှူးဦးတိတ်နိုင်က ပြောပါတယ်။
ဒါ့အပြင် စစ်အုပ်စုဟာ အလိုရှိသူကို ဖမ်းမမိတဲ့အခြေအနေမျိုးမှာ မိသားစုဝင်တွေကို ဓားစာခံအဖြစ်ဖမ်းဆီးခြင်းတွေ ပြုလုပ်နေပြီး အဲဒီဓားစာခံတွေကို ဘယ်နေရာမှာ ထိန်းသိမ်းထားတယ် ဆိုတာ ထုတ်ဖော်ပြောဆိုခြင်းမရှိပါဘူး။
အဲဒီလို ဓားစာခံခေါ်ယူဖမ်းဆီးခံရသူတွေထဲမှာ အရွယ်မရောက်သေးတဲ့ လူမမယ် ကလေးငယ်တွေပါ ပါဝင်နေပါတယ်။
နောက်ပြီး ဖမ်းဆီးခံရပြီးမှာ စစ်ကြောရေးစခန်းတွေမှာ ညှင်းပန်းနှိပ်စက်ခံရတာကြောင့် ဘယ်သူမှ မသိလိုက်ဘဲ အသက်သေဆုံးသွားရမှုပင်ကြုံတွေ့ရနိုင်တဲ့ အန္တရာယ်ကို မြန်မာပြည်သူတွေ နေ့စဉ်ရင်ဆိုင်နေရပါတယ်။
AAPP တွဲဖက်အတွင်းရေးမှူး ဦးဘိုကြည်က “ဒီလိုလုပ်ရပ်ဟာ အထိန်းသိမ်းခံရသူတွေကို ခြိမ်းခြောက်နေတာတင်မကဘဲ မိသားစုဝင်တွေနဲ့ မိတ်ဆွေသူငယ်ချင်းတွေကိုပါ ထိခိုက်နစ်နာခံစား ရအောင် လုပ်ဆောင်နေတာဖြစ်ပါတယ်။ ချစ်ခင်ရသူတစ်ဦးဦးကို ဘယ်နေရာမှာ ထိန်းသိမ်းထား တယ်ဆိုတာ တရားဝင်အသိမပေးဘဲ ရည်ရွယ်ချက်ရှိရှိ ထိန်ချိန်ထားခြင်းဟာ စိတ်ပိုင်းဆိုင်ရာ ညှင်းပန်းနှိပ်စက်မှု အသွင်တစ်ခုဖြစ်သလို ရုပ်ပိုင်းဆိုင်ရာအရပါ ဖိစီးနှိပ်စက်ခြင်းမြောက်ပါတယ်။ ဒါကြောင့် ဒီနည်းလမ်းတွေကို ကျယ်ကျယ်ပြန့်ပြန့်နဲ့ စနစ်တကျ အသုံးပြုကျူးလွန်နေတာဟာ လူသားမျိုးနွယ်စုအပေါ် ကျူးလွန်တဲ့အဆိုးရွားဆုံးရာဇဝတ်မှုတွေထဲက တစ်ခုဖြစ် ပါတယ်” လို့ ပြောပါတယ်။
