မလေးရှားနိုင်ငံမှာ ပြီးခဲ့တဲ့ ရက်ပိုင်း အာဏာပိုင်တွေက အော်ပရာစီရာမှာ မြန်မာနိုင်ငံသားတွေ ဖမ်းဆီးခံရတာဟာ စစ်ကောင်စီ ဆီအခွန်ဆောင်တဲ့အတွက် NUG က မလေး ရဲ ကို သတင်းပေးလိုက်တာကြောင့်ဖြစ်တယ်လို့ စစ်ကောင်စီအာဘော် တယ်လီဂရမ်ချန်နယ်က သတင်းဖြန့်ဝေနေပါတယ်။
အဲဒီသတင်းကို ” မှိုင်းဝေ” အမည်နဲ့ တယ်လီဂရမ်ချန်နယ်က ဒီဇင်ဘာလ ၂၃ ရက်မှာစတင် ဖြန့်ဝေပြီး ဒီနေ့ထိတိုင် တယ်လီဂရမ်သုံးစွဲသူ လေးထောင်ကျော် ကြည့်ရှုပြီး တွေ့ရပါတယ်။
စစ်ကောင်စီအာဘော်တယ်လီဂရမ်ရဲ့ သတင်းဖြန့်ဝေလင့်ခ်
(https://t.me/hminewai/43652)
ဒီဖြန့်ဝေမှုကို စိစစ်ရာမှာ သတင်းမှားဖြစ်ပြီး ရည်ရွယ်ချက် ရှိရှိ ဝါဒဖြန့်တာကိုတွေ့ရပါတယ်။
ဒီဇင်ဘာလ ၂၁ ရက်က ကွာလာလမ်ပူမြို့မှာရှိတဲ့ ကိုတာရာယာအရပ်ကို မလေးရဲနဲ့ ဌာနစုံပါဝင်တဲ့ အင်အား တစ်ထောင်ခန့်ကမလေးလို ” အော်ပရာစီ” လို့ ခေါ်တဲ့ ရှောင်တခင်ဝင်ရောက်စစ်ဆေးတာတွေကို လုပ်ခဲ့ပါတယ်။
ဘင်္ဂလားဒေ့ရှ်နိုင်ငံသားအများစုနေထိုင်ကြပြီး ” ဒါကာအသေးစား ” လို့ ခေါ်တဲ့ အဲဒီ အရပ်ကို ဝင်ရောက်စီးနင်းတာဟာ ခွင့်ပြုချက်မရဘဲ လုပ်ကိုင်နေတဲ့ နိုင်ငံခြားသားတွေ ရဲ့ လုပ်ငန်းတွေကို ကိုင်တွယ်ဖြေရှင်းဖို့ ဖြစ်တယ်လို့ မလေးရှားလဝက ကရှင်းလင်းထားပါတယ်။
မလေးရှားလဝက ရဲ့ သတင်းထုတ်ပြန်ချက်ကို ဖတ်ရှုနိုင်ဖို့
( https://www.facebook.com/photo/?fbid=674942308150731&set=a.162848352693465)
စီးနင်းမှုအတွင်း နိုင်ငံခြားသား ၅၀၀ နီးပါး ဖမ်းခံရပြီး ဘင်္ဂလားဒေ့ရှ် ၊ နီပေါနဲ့ မြန်မာနိုင်ငံသားတွေပါဝင်တယ်လို့ မလေး လဝက ဆိုထားပါတယ်။
ဖမ်းဆီးသွားတဲ့သူတွေထဲက နေထိုင်ခွင့်အထောက်အထားရှိသူတွေကို မလေးအာဏာပိုင်တွေက ပြန်လွှတ်ပေးလိုက်တယ်လို့ RFA မြန်မာပိုင်းသတင်းဌာနက လည်းသတင်းဖော်ပြထားပါတယ်။
မလေးအာဏာပိုင်တွေ စီးနင်းတဲ့နေရာဟာ ဘင်္ဂလားဒေ့ရှ်နိုင်ငံသားတွေအများဆုံးနေထိုင်ပြီး တရားမဝင်နေထိုင်သူတွေများပြားနေတာကြောင့် မလေးအာဏာပိုင်တွေက ဝင်ရောက်ဖမ်းဆီးတာလို့ RFA က မလေးရောက် ခရီးသွားလုပ်ငန်း လုပ်ကိုင်နေသူရဲ့ပြောပြချက်ကို ကိုးကားပြီး ဖော်ပြပါတယ်။
RFA မြန်မာပိုင်းရဲ့ သတင်းကိုဖတ်ကြည့်ဖို့
( https://www.facebook.com/rfaburmese/videos/1105520877115561 )
မလေးရှားလဝက ရဲ့ထုတ်ပြန်ချက်တွေအရ ယခင်ကလည်း နိုင်ငံအတွင်း တရားမဝင်နေထိုင်သူတွေ များပြားရာနေရာတွေကို ဝင်ရောက်စီးနင်း ဖမ်းဆီးတာတွေရှိတာသိရပါတယ်။
အထက်ပါ စိစစ်တွေ့ရှိချက်တွေအရ စစ်ကောင်စီအာဘော် တယ်လီဂရမ်ချန်နယ်ရဲ့ ဖြန့်ဝေမှုဟာ သတင်းမှားသာဖြစ်ပါတယ်။