လွိုင်ကော်မြို့သိမ်းတိုက်ပွဲအတွင်း ကရင်နီပူးပေါင်းတပ်တွေကယ်ထုတ်သွားတဲ့ ပညာရေးဝန်ထမ်းတွေနဲ့ မိသားစုဝင်တွေကို အမြန်ဆုံးပြန်လွှတ်ပေးဖို့ NUG အစိုးရက တောင်းဆိုတယ်ဆိုတဲ့ ထုတ်ပြန်ချက်တစ်စောင် စစ်ကောင်စီဝါဒဖြန့်တယ်လီဂရမ်မှာဖြန့်ဝေနေပါတယ်။
NUG အစိုးရ ကာကွယ်ရေးဝန်ကြီးဌာန အမှတ်တံဆိပ်ကိုသုံးထားတဲ့အဲဒီထုတ်ပြန်ချက်ကို စစ်ကောင်စီဝါဒဖြန့် Ko Thet တယ်လီဂရမ်မှာ နိုဝင်ဘာလ ၂၁ ရက် ကစတင်ဖြန့်ဝေတာပါ။
ထုတ်ပြန်ချက်ထဲမှာ လွိုင်ကော်တက္ကသိုလ်အတွင်းပိတ်မိနေတဲ့ ဝန်ထမ်းတွေ၊ ကျောင်းသားကျောင်းသူတွေ ၊ မိသားစုဝင်တွေကို တိုက်ပွဲဖြစ်ပွားတဲ့ကြားထဲက ထိခိုက်မှုမရှိစေဖို့ကယ်ထုတ်သွားတာကိုကြားသိရကြောင်း နဲ့ ပြန်လွှတ်ပေးတာမရှိဘဲ ရက်ရှည် ထိန်းသိမ်းထားတဲ့အပေါ် သဘောတူညီမှုမရှိကြောင်း၊အမြန်ဆုံးပြန်လွှတ်ပေးဖို့ တောင်းဆိုထားတာတွေ့ရပါတယ်။
စစ်ကောင်စီအားပေး တယ်လီဂရမ်မှာ ထုတ်ပြန်ချက်ဖြန့်ဝေပုံ
Public Service Announcement
( https://t[.]me/kothetjournalist/56036 )
အဲဒီထုတ်ပြန်ချက်ကို ဒီနေ့ နိုဝင်ဘာလ ၂၆ ရက်အထိ ၆ ရက်တာအတွင်း ကြည့်ရှုထားသူ ၄,၆၀၀ ကျော် ရှိနေပြီး ကြိုက်နှစ်သက်ကြောင်း တုန့်ပြန်ထားသူ ၃၀၀ ကျော်ရှိတာတွေ့ရပါတယ်။
People’s Spring က စစ်ဆေးရာမှာ ထုတ်ပြန်ချက်ဟာ အတုဖြစ်တာသိရပါတယ်။
NUG ကာကွယ်ရေးဝန်ကြီးဌာန နဲ့ NUG အစိုးရ တို့ရဲ့ သတင်းထုတ်ပြန်နေကြ ဖေ့ဘွတ်ခ်စာမျက်နှာ ၊ ဝက်ဆိုက်တွေမှာ အလားတူကြေညာချက်ကို ထုတ်ပြန်ထားတာ မတွေ့ရပါဘူး။
NUG ကာကွယ်ရေးဝန်ကြီးဌာနနဲ့ NUG အစိုးရ ဖေ့ဘွတ်ခ်စာမျက်နှာ
https://www.facebook.com/modNUG
https://www.facebook.com/NUGmyanmar
ယခင်ကလည်း NUG အစိုးရက ထုတ်ပြန်သယောင် ကြေညာချက်အတုတွေကို စစ်ကောင်စီဝါဒဖြန့် လူမှုကွန်ရက်တွေကနေ ဖြန့်ဝေတာမျိုးရှိခဲ့ပါတယ်။
ကရင်နီပြည်နယ် (ကယားပြည်နယ်)မှာ နိုဝင်ဘာလ ၁၁ ရက်ကစတင်ပြီး ပြည်နယ်မြို့တော် လွိုင်ကော်မြို့သိမ်းတိုက်ပွဲ စတင်ခဲ့တာပါ။
အဲဒီတိုက်ပွဲအတွင်း လွိုင်ကော်တက္ကသိုလ်မှာ ပိတ်မိနေတဲ့ ပညာရေး ဝန်ထမ်း ၁၃၄ ဦးနဲ့ မိသားစုဝင် ၆၄ ဦးကို ကရင်နီတပ်ပေါင်းစုက ဘေးလွတ်ရာကို ခေါ်ဆောင်ပေးခဲ့တယ်လို့ ကရင်နီပြည် ကြားကာလအုပ်ချုပ်ရေးကောင်စီက ထုတ်ပြန်ထားပါတယ်။
ဘေးလွတ်ရာခေါ်ဆောင်လာသူတွေကို လုံလုံခြုံခြုံစောင့်ရှောက်ပေးထားတယ်လို့ ကရင်နီပြည် ကြားကာလအုပ်ချုပ်ရေးကောင်စီက နိုဝင်ဘာလ ၁၄ ရက်စွဲနဲ့ ထုတ်ပြန်ချက်မှာအသိပေးထားပါတယ်။
ကယ်ထုတ်ခံရသူတွေထဲက ဝန်ထမ်း ၇၀ ဦးနဲ့ မိသားစုဝင် ၃၇ ဦးတို့ကို နိုဝင်ဘာလ ၂၃ ရက်မှာ နေရပ်ပြန်နိုင်ဖို့ စီစဉ်ပေးခဲ့တယ်လို့ ကရင်နီပြည်ကြားကာလအုပ်ချုပ်ရေးကောင်စီက နိုဝင်ဘာလ ၂၄ ရက်မှာ ထုတ်ပြန်ပါတယ်။
ကျန်ရှိနေတဲ့ ဝန်ထမ်းတွေနဲ့ မိသားစုဝင်တွေကိုလည်း လိုအပ်တဲ့ စုံစမ်းမေးမြန်းမှုတွေပြုလုပ်ပြီးရင် နေရပ်ပြန်နိုင်ဖို့ ဆက်လက်ဆောင်ရွက်ပေးသွားမယ်လို့ ကရင်နီပြည်ကြားကာလအုပ်ချုပ်ရေးကောင်စီက နိုဝင်ဘာလ ၂၄ ရက် ထုတ်ပြန်ချက်မှာထည့်သွင်းအသိပေးထားတာတွေ့ရပါတယ်။
လွိုင်ကော်တက္ကသိုလ် ပညာရေးဝန်ထမ်းတွေနဲ့ မိသားစုဝင်တွေရဲ့ နောက်ဆုံးအခြေအနေကို သိရှိနိုင်ဖို့ ကရင်နီပြည်ကြားကာလအုပ်ချုပ်ရေးကောင်စီရဲ့ သတင်းထုတ်ပြန်ရာ ဖေ့ဘွတ်လင့်ခ်ကို ဖော်ပြပေးလိုက်ပါတယ်။
