စက်တင်ဘာလအတွင်း ရဲနှင့်စစ်သား ၁၀ဦး CNDFထံ လာရောက်ပူးပေါင်း

ပြီးခဲ့သည့်စက်တင်ဘာလအတွင်း ရဲနှင့်စစ်သား ၁၀ ဦး ဖလန်းမြို့အခြေစိုက်ချင်းအမျိုးသားတပ်ဖွဲ့ (CNDF)ထံ လာရောက်ပူးပေါင်းခဲ့သည်ဟု ချင်းအမျိုးသားအဖွဲ့ချုပ်(CNO)က စက်တင်ဘာ ၃၀ ရက်တွင် ထုတ်ပြန်သည်။

ထိုသို့လာရောက်ပူးပေါင်းခဲ့သည့် ရဲနှင့် စစ်သားများကို ဆုကြေးငွေကျပ် သိန်း ၅၀ ချီးမြှင့်ပြီး လုံခြုံသည့် နေရာပို့ပေးခဲ့သည်ဟု CNDF/CNOက ထုတ်ပြန်သည်။

ထိုသို့လာရောက်ပူးပေါင်းသည့် ၁၀ ဦးတွင် ပြည်သူရဲ့ ၈ ဦးနှင့် စစ်သား ၂ ဦးပါဝင်သည်ဟု ထုတ်ပြန်ချက်တွင်ပါဝင်သည်။ စက်တင်ဘာလ ၃၀ ရက်တွင် ဖလန်းအခြေစိုက် ခလရ (၂၆၈)မှ တပ်သားတစ်ဦး၊ သီးဘွာယ်တပ်မှ တပ်ကြပ်ကြီးတစ်ဦးနှင့် ရဲတပ်ကြပ်ကြီး တစ်ဦး စုစုပေါင်း သုံးဦးက CNDFထံ လက်နက်အပြည့်အစုံဖြင့် လာရောက်ပူးပေါင်းခဲ့သည်ဟု ဆိုသည်။

CNO/ CDNFသည် လက်နက်အပြည့်အစုံဖြင့် လာရောက်ပူးပေါင်းသည့် စစ်သားနှင့်ရဲများကို ဆုငွေကျပ်သိန်း ၅၀ ချီးမြှင့်ပြီး လုံခြုံသည့် နေရာ ပို့ဆောင်ပေးမည်ဟု ထုတ်ပြန်ထားခြင်းဖြစ်သည်။

Public Service Announcement

CNDFသည် ဖလန်းမြို့နယ် အခြေစိုက် ပြည်သူ့ကာကွယ်ရေးတပ်ဖွဲ့တစ်ခုဖြစ်ပြီး အာဏာရှင်တော်လှန်ရေးအား သွန်ခွန်စိုက်ဆောင်ရွက်နေသည့် ချင်းပြည်နယ် ပြည်သူကာကွယ်ရေးတပ်ဖွဲ့များအနက်မှ တစ်ခုဖြစ်သည်။ ၂၀၂၁ ဧပြီ ၁၃ ရက်တွင် စတင်ဖွဲ့စည်းခဲ့သည်။