အပြစ်မဲ့တအာင်းလူငယ် ၇ ဦးကို မြန်မာစစ်တပ်က မတရားဖမ်းဆီးခံရတဲ့အပေါ် ကန့်ကွက်ရှုတ်ချပြီး ခြွင်း ချက်မရှိ အမြန်ဆုံးပြန်လွှတ်ပေးဖို့ တအာင်းနိုင်ငံရေးအတိုင်ပင်ခံကော်မတီ(TPCC)က ဒီနေ့တိုက်တွန်းထုတ်ပြန်ပါတယ်။
မြန်မာစစ်တပ်ဟာ လားရှိုးအခြေစိုက် တအာင်းကျောင်းသားနှင့်လူငယ်များအဖွဲ့(TSYU)မှ ရုံးဝန်ထမ်းတစ်ဦး၊ တအာင်းပရဟိတပညာရေးဘော်ဒါဆောင် (TEC)မှ ကျောင်းဆရာ ၅ ဦးတို့ကို စက် တင်ဘာ ၂၅ ရက် ညဉ့်သန်းခေါင်ယံအချိန်မှာ ဖမ်းဆီးခဲ့ပြီး စက်တင်ဘာ ၂၆ ရက်ညမှာ ရွှေဖီမြေ သတင်းအေဂျင်စီ ရုပ်သံသတင်းထောက်ဟောင်း အမျိုးသမီးငယ်တစ်ဦးကို ထပ်မံဖမ်းဆီးခဲ့ပါတယ်။
ဖမ်းဆီးခံရတဲ့ တအာင်းလူငယ် ၇ ဦးဟာ လူမှုရေးအကျိုးပြုလုပ်ငန်းတွေနဲ့ ပညာရေးလုပ်ငန်းတွေကိုသာ အဓိကဆောင်ရွက်နေသူတွေဖြစ်ပြီး အပြစ်မဲ့လူငယ်တွေသာ ဖြစ်တယ်လို့ TPCC က ထုတ်ပြန်ပါတယ်။
ဖမ်းဆီးချိန်မှာ အရပ်ဝတ်၊ ရဲနဲ့ စစ်သားတွေဟာ လက်နက်အပြည့်အစုံနဲ့ အိမ်ဝင်းတံခါးကိုဖွင့်ခိုင်းခြင်းမရှိဘဲ အုတ်တံတိုင်းပေါ်သို့ ခုန်ကျော်ကာ အိမ်အတွင်းဝင်ရောက်ပြီး ခြိမ်းခြောက်၊ မတရားဖမ်းဆီးခေါ်ဆောင်သွားခဲ့ခြင်းဟာ ဥပဒေမဲ့လုပ်ရပ်တွေဖြစ်တယ်လို့ TPCC က ဆိုပါတယ်။
Public Service Announcement
မြန်မာစစ်တပ်က အပြစ်မဲ့ပြည်သူတွေကို ခြိမ်းခြောက်ခြင်း၊ မတရားဖမ်းဆီးချုပ်နှောင်ခြင်း၊ သတ်ဖြတ်ခြင်း၊ ပုဒ်မအမျိုးမျိုးတပ်ပြီး မတရားစွပ်စွဲမှုတွေ ပြုလုပ်နေခြင်းဟာ အာဏာရှင်ရဲ့ လုပ်ရပ်တွေသာဖြစ်ပြီး TPCC က ဆန့်ကျင်ကန့်ကွက်တယ်လို ထုတ်ပြန်ပါတယ်။
မတရားဖမ်းဆီခံရတဲ့ အပြစ်မဲ့တအာင်းလူငယ်တွေကို မိသားစုဝင်တွေနဲ့ ဆက်သွယ်ခွင့်ပြုပြီး ခြွင်းချက်မရှိ အမြန်ဆုံးလွှတ်ပေးဖို့ တအာင်းနိုင်ငံရေးအတိုင်ပင်ခံကော်မတီက တိုက်တွန်းတောင်း ဆိုထားပါတယ်။
