ကချင်လွတ်လပ်ရေးတပ်မတော်(KIA) တပ်မဟာ(၂)၊ တပ်ရင်း(၄၃) နယ်မြေ တနိုင်းမြို့နယ်တွင် စစ်ကောင်စီတပ်၏ ယာဉ်တန်းများ လုံခြုံရေးယူပေးနေသည့် တပ်ဖွဲ့ကို KIAက ယနေ့ တိုက်ခိုက်ခဲ့သည်။
တနိုင်းမြို့နယ် ကောင်ရာကျေးရွာအနီး၌ ယနေ့ အောက်တိုဘာ၆ရက် နံနက် ၆နာရီခန့်မှစ၍ တိုက်ပွဲဖြစ်ပွားခဲ့ကြောင်း၊ ဒေသတွင်းသို့ ထိုးစစ်ဆင်ဝင်ရောက် လာသည့် စစ်ကောင်စီတပ် စစ်ယာဉ်တန်းများကို လုံခြုံရေးယူပေးနေတဲ့အဖွဲ့အား KIA က တိုက်ခိုက်ခဲ့ရာ နံနက် ၁၀နာရီအချိန်ထိ ပစ်ခတ်မှုများရှိခဲ့ကြောင်းKIA သတင်းနှင့်ပြန်ကြားရေးဌာန Kachinnet Burmese က ဖော်ပြထားသည်။
ယမန်နေ့ (အောက်တိုဘာ ၅ရက်) ညပိုင်းကလည်း ဒေသတွင်း စစ်ရေးလှုပ်ရှားလာသည့် စစ်ကောင်စီ ယာဉ်တန်းကို KIAမှတိုက်ခိုက်ခဲ့ရာစစ်ကောင်စီတပ်၏ ယာဉ်တစ်စီးပျက်စီးခဲ့သည်ဟု ဆိုသည်။
စစ်ကောင်စီတပ်သည် စက်တင်ဘာမှစ၍ တနိုင်း-လီဒိုလမ်တစ်လျှောက် အင်အားတိုးချဲ့ပြီး ထိုးစစ်ဆင်ခြင်း၊ စစ်အသုံးအဆောင်ပစ္စည်းများ သယ်ပို့ခြင်းများ ခပ်စိပ်စိပ်ပြုလုပ်ကာ ပြည်သူလူထုနေထိုင်သည့် ကျေးရွာအတွင်းလက်နက်ကြီး လက်နက်ငယ်များပစ်ခတ်ခဲ့သည်ဟု ဖော်ပြထားသည်။ ထို့ပြင် ခရီးသွားပြည်သူများအား အသေးစိတ်ရှာဖွေ စစ်ဆေးခြင်းများ ပြုလျှက်ရှိနေသည်ဟုဆိုသည်။
Public Service Announcement
