မကွေးတိုင်း ဆောမြို့နယ်မှ CDMဝင်ရောက်လာသော ရဲတပ်သားတစ်ဦးအား လွတ်မြောက်နယ်မြေသို့ အန္တရာယ် ကင်းစွာ ပို့ဆောင်ပေးခဲ့ကြောင်း ယောဒေသကာကွယ်ရေးတပ်ဖွဲ့-Yaw Defense Force (ဆော& ကျောက်ထု)က သတင်းထုတ်ပြန်သည်။
မကွေးတိုင်း ဂန့်ဂေါခရိုင် ဆောမြို့နယ် လောင်းရှည်မြို့မရဲစခန်းမှ ကိုယ်ပိုင်အမှတ် လ/၂၅၈၃၈၇ ရဲတပ်သား ကိုကျော်သီဟသည် အောက်တိုဘာလ ၁၆ ရက်တွင် တာဝန်မှရပ်နားပြီး CDM ဝန်ထမ်းအဖြစ် YDF (ဆော & ကျောက်ထု)တွင် ခိုလှုံ၍ ပြည်သူ့ရင်ခွင်သို့ ဝင်ရောက် လာသောကြောင့် ကောင်းမွန်စွာ ကျွေးမွေးစောင့်ရှောက်ထားပြီး အောက်တိုဘာလ ၂၁ ရက်တွင် လွတ်မြောက်နယ်မြေသို့ ရောက်ရှိအောင် ပို့ဆောင်ပေးခဲ့ပြီဖြစ်ကြောင်းအသိပေးထားသည်။
နောက်နောင်တွင် စစ်လက်နက်အပြည့်အစုံ နှင့်တစ်ကွ YDF (ယော&ကျောက်ထု)အဖွဲ့ထံ ဝင်ရောက်လာပါက ထိုက်တန်သောဆုကြေးငွေကို ပေးအပ်၍ ယခုလို လွတ်မြောက်နယ်မြေ(သို့) ပြည်ပနိုင်ငံသို့ ရောက်ရှိအောင် ပို့ဆောင်ပေးသွားမည်ဖြစ်ကြောင်းလည်း
ဖော်ပြထားသည်။
စစ်တပ်အာဏာသိမ်းပြီးနောက်ပိုင်း တပ်မတော်သားနှင့် ရဲတပ်ဖွဲ့ဝင်များလည်း CDM လှုပ်ရှားမှုတွင်ပါဝင်ခဲ့သည်။
စက်တင်ဘာလ ၇ ရက်က အမျိုးသားညီညွတ်ရေးအစိုးရ ‘NUGမှ အကြမ်းဖက်စစ်ကောင်စီအား ပြန်လည်ခုခံတိုက်ခိုက်ရန်ကြေညာပြီးနောက် စက်တင်ဘာလမှ အောက်တိုဘာလ ၇ ရက်အထိ ကာလအတွင်း တပ်မတော်သား ၄၂၉ ဦးနှင့် ရဲ ၃၃၄ဦး တို့ CDMဝင်ရန်ဆက်သွယ်ခဲ့ကြကြောင်း NUG၏ ကာကွယ်ရေးဝန်ကြီးဌာနကလည်း ထုတ်ပြန်ထားသည်။