၂၀၂၀ ရွေးကောက်ပွဲမှာ မဲသမာမှုတွေ၊ တရားမဲ့ပြုကျင့်မှုတွေကျူးလွန်တယ်ဆိုပြီး နိုင်ငံတော်သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် ၁၆ ဦးကို တရားစွဲဆိုအရေးယူထားလို့ အကြမ်းဖက်စစ်ကောင်စီရဲ့လက်အောက်ခံ ရွေးကောက် ပွဲကော်မရှင်က ဒီနေ့(နိုဝင်ဘာ ၁၆ရက်)ထုတ်ပြန်ပါတယ်။
ပြည်တွင်း၊ ပြည်ပ လွတ်လပ်သောရွေးကောက်ပွဲလေ့လာစောင့်ကြည့်ရေးအဖွဲ့တွေက ၂၀၂၀ ရွေးကောက်ပွဲရလဒ်ဟာ မြန်မာပြည်သူတွေရဲ့ ဆန္ဒသဘောထားကို ထင်ဟပ်ကိုယ်စားပြုတယ်လို့ ယုံကြည်ထုတ်ပြန်ထားချိန်မှာ အကြမ်းဖက်စစ်တပ်က တရားမဝင်အာဏာသိမ်းခဲ့တာဖြစ်ပါတယ်။
အကြမ်းဖက်စစ်ကောင်စီဟာ ၂၀၂၀ ရွေးကောက်ပွဲမှာ မဲသမာမှုတွေ၊ တရားမဲ့ပြုကျင့်မှုတွေရှိတယ်လို့ စွပ်စွဲနေပေမယ့် အာဏာသိမ်းပြီး ၉ လကျော်ချိန်အထိ စွပ်စွဲမှုတွေကို ခိုင်ခိုင်မာမာ သက်သေမပြနိုင်သေးဘူး။
ဒါပေမဲ့ စစ်ကောင်စီလက်အောက်ခံ ရွေးကောက်ပွဲကော်မရှင်က သမ္မတဦးဝင်းမြင့်၊ အတိုင်ပင်ခံ ဒေါ်အောင်ဆန်းစုကြည်၊ ကော်မရှင်ဥက္ကဌဟောင်း ဦးလှသိန်း၊ မန္တလေးတိုင်းဝန်ကြီးချုပ်ဟောင်း ဒေါက်တာဇော်မြင့်မောင် အပါအဝင် ၁၆ ဦးကို သက်ဆိုင်ရာတရားရုံးတွေမှာ နိုဝင်ဘာ ၁၅ ရက်က တရားစွဲဆိုအရေးယူထားတယ်လို့ ထုတ်ပြန်ပါတယ်။