ဖက်ဒရယ်ဒီမိုကရေစီပဋိဉာဉ်အတည်ပြုရေးအပါအဝင် လုပ်ငန်းစဉ် ၃ ရပ်လုပ်ဆောင်မယ့် ပြည်သူ့ညီလာခံကို လာမယ့် ဒီဇင်ဘာလမှာ ခေါ်ယူကျင်းပဖို့စီစဉ်နေတယ်လို့ အမျိုးသားညီညွတ်ရေးအတိုင်ပင်ခံကောင်စီ (NUCC) က သတင်းစာရှင်းလင်းပွဲမှာ ပြောပါတယ်။
ပထမအကြိမ် ပြည်သူ့ညီလာခံကို ဒီဇင်ဘာလမှာ ခေါ်ယူကျင်းပဖို့စီစဉ်နေပြီး နောက်ပိုင်းမှာ ညီလာခံကို ၆ လတစ်ကြိမ်ခေါ်ယူမယ်လို့ဆိုပါတယ်။
ပထမအကြိမ်ညီလာခံကို NUCC တိုးချဲ့ရေး၊ ဖက်ဒရယ်ဒီမိုကရေစီပဋိဉာဉ်အတည်ပြုရေး၊ NUG အမျိုးသားညီညွတ်ရေးအစိုးရ ထပ်မံအတည်ပြုရေးစတဲ့လုပ်ငန်းစဉ်သုံးရပ်နဲ့ ကျင်းပသွားမယ်လို့ ဒီနေ့ကျင်းပတဲ့ NUCC သတင်းစာရှင်းလင်းပွဲမှာ အသိပေးပါတယ်။
အဲဒီပြည်သူ့ညီလာခံကို အားလုံးပါဝင်နိုင်ရေးကို လုပ်ဆောင်မှာဖြစ်ပြီး ဘယ်လိုနည်းလမ်းနဲ့ ပါဝင်နိုင်မလဲဆိုတာကိုလည်း မကြာခင်ကြေညာသွားမယ်လို့ ဆိုပါတယ်။
NUCCကို ရွေးကောက်ပွဲအနိုင်ရလွှတ်တော်ကိုယ်စား လှယ်တွေ၊ တိုင်းရင်းသားလက်နက်ကိုင် တော်လှန်ရေးအဖွဲ့တွေ၊ နိုင်ငံရေးပါတီတွေ၊ စစ်အာဏာရှင်ဆန့်ကျင်တဲ့ လူငယ်၊ အမျိုးသမီး၊ အလုပ်သမား၊ အရပ်ဖက်အဖွဲ့အစည်း၊ CDM ပါဝင်သူ၊ တိုင်းရင်းသားလူမျိုးပေါင်းစုံ စတဲ့ လူထု လူတန်းစားအလွှာအသီးအသီးမှ အဖွဲ့အစည်း ၂၈ ဖွဲ့မှ ကိုယ်စားလှယ် ၅၆ ဦးနဲ့ ဖွဲ့စည်းထားပါတယ်။