ချင်းပြည်နယ်နှင့် မကွေးတိုင်း နယ်စပ်ဒေသများတွင် အာဏာသိမ်းစစ်ကောင်စီတပ်က ရဟတ်ယာဉ်များ အသုံးပြုပြီး လက်နက်အင်အား ဖြည့်ခြင်းအပါအဝင် စစ်ရေးလှုပ်ရှားမှုများ ပိုမိုပြုလုပ်လာကြောင်း ချင်းလက်နက်ကိုင်တပ်ဖွဲ့များက ပြောသည်။
စစ်ကောင်စီတပ်အနေဖြင့် ကန်ပက်လက်နှင့် မတူပီ မြို့နယ်များရှိ ၎င်းတို့၏ တပ်စခန်းများထံ ရဟတ်ယာဉ်ဖြင့် လက်နက်များပို့ဆောင်မှုများ ရှိသကဲ့သို့ စစ်ကြောင်းအချို့သည် မြို့ပေါ်မှ ကျေးလက်ဒေသများသို့ စစ်ကြောင်းထိုးလျက်ရှိကြောင်း ချင်းအမျိုးသား တပ်ဦး/ချင်းအမျိုးသားတပ်မတော်(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
“မြို့ပေါ်ကနေ နယ်ဘက်ဆင်းတာတွေရှိတာပေါ့။ ဒါပေမဲ့ နယ်ဘက်ဒေသတွေမှာ ကျွန်တော်တို့ တပ်ဖွဲ့တွေက နေရာယူထားတယ်ဆိုတော့ သိပ်ပြီးတော့ မတိုးနိုင်ဘူးပေါ့။အခုလက်ရှိအနေအထားထိ သူတို့ အနော်ရထာ စစ်ဆင်ရေးက သူတို့ ထင်သလောက်တော့ သူတို့ လုပ်နိုင်တာတော့ မဟုတ်ဘူးလို့ ကျွန်တော်တို့ သုံးသပ်တာပေါ့။ စစ်ရေးဘောင်က ကျယ်လာပေမယ့် သူတို့ လုပ်ဆောင်မှုက ထိရောက်မှုမရှိပါဘူး” ဟု ဆလိုင်းထက်နီက ချင်းပြည်နယ်အတွင်း စစ်ရေးအခြေအနေနှင့်ပတ်သက်ပြီး မှတ်ချက်ပြုသည်။
စစ်ဘောင်ကျယ်လာပါက လူထု ထိခိုက်မှုများ ပိုမိုဖြစ်လာနိုင်၍ လုံခြုံရေးသတိပြုနေထိုင်ကြရန် ၎င်းက ပြည်သူများအား မေတ္တာရပ်ခံသည်။
ချင်းဒေသကာကွယ်ရေတပ်ဖွဲ့ မင်းတပ်မြို့နယ်(CDF-MINDAT)ကလည်း ယခုရက်ပိုင်းအတွင်း ချင်းပြည်နယ်နှင့် မကွေးတိုင်း နယ်စပ်တွင် စစ်ကောင်စီတပ်များ ခပ်စိတ်စိတ် လှုပ်ရှားမှုများ ရှိကြောင်း ယမန်နေ့ညက ထုတ်ပြန်သည်။
CDF-MINDAT အနေဖြင့် ထီးလင်းမြို့နယ်ဘက်ကို စောင့်ကြည့်စစ်ကူပေးခြင်း၊ ဆောမြို့နယ် နှင့် ကန်ပက်လက်နယ်ဘက်ကိုလည်း တောက်လျှောက် စစ်ကူပေးခြင်း ပြုလုပ်နေကြောင်း ထုတ်ပြန်ချက်တွင်ဖော်ပြထားသည်။
စစ်ကောင်စီတပ်သည် အမာကို ရှောင်ပြီး အပျော့ကို တိုက်နေသည်ဟု ယူဆရကြောင်း၊ ဆော နှင့် ကန်ပက်လက်ကို အင်နှင့် အားနှင့် ဖိနေကြောင်း၊ ယင်းထိုးစစ်များပြီးလျှင် မင်းတပ်ကိုလည်း ဦးတည်လာနိုင်ကြောင်း ယူဆသည်ဟု CDF-MINDATက ထုတ်ပြန်သည်။