မိုင်းကြောင့် မိခင်သေဆုံးပြီး ခြေတစ်ဖက်ဆုံးရှုံးခဲ့ရသည့်ကလေးငယ်အတွက် ဝမ်းနည်းကြောင်း ယူနီဆက် ထုတ်ပြန်

ချင်းပြည်နယ်မင်းတပ်မြို့တွင် မြေမြှုပ်မိုင်းပေါက်ကွဲပြီး မိခင်တစ်ဦး အသက်ဆုံးရှုံးခဲ့ရပြီး ၎င်း၏ နှစ်နှစ်အရွယ် သမီးငယ်မှာ ခြေလက်ဆုံးရှုံး၍ ဒဏ်ရာအပြင်းအထန်ရရှိခဲ့ကြောင်း သိရပြီး ကျန်ရစ်သူမိသားစုအပြင်ဘေး အန္တရာယ် ကျရောက်နေသူ အားလုံးနှင့် အတူ ထပ်တူ ဝမ်းနည်းပူဆွေးရကြောင်း ကုလသမဂ္ဂကလေးသူငယ်များရန်ပုံငွေအဖွဲ့ (UNICEF)က ထုတ်ပြန်သည်။

ဒီဇင်ဘာ ၅ရက်က မင်းတပ်မြို့ရှိ နေအိမ်ရှေ့တွင် မြေမြှုပ်မိုင်းထိ၍ ကလေးမိခင် သေဆုံးပြီး ကလေးငယ်မှာ ညာခြေဖြတ်တောက်ရခြင်းအပါအဝင် ဒဏ်ရာပြင်းထန်စွာ ရရှိခဲ့သည်။ မင်းတပ်မြို့နယ်နှင့် မင်းတပ် -မတူပီလမ်းတွင် အာဏာသိမ်းစစ်တပ်က မြေမြှုပ်မိုင်းများ ထောင်ထား၍ ဒေသခံများ ထိခိုက်ဒဏ်ရာရနေကြောင်း မင်းတပ် ချင်းကာကွယ်ရေးတပ်ဖွဲ့(CDF)က ယခင်ကတည်းက ထုတ်ပြန်ထားသည်။

UNICEF၏ ထုတ်ပြန်ချက်တွင် မြေမြှုပ်မိုင်းများ အသုံးပြုခြင်းကို ချက်ချင်းရပ်တန့်ရပါမည် ဖြစ်ကြောင်း ဖော်ပြထားသည်။

သက်ဆိုင်ရာ အဖွဲ့အစည်းများအားလုံးကို မိုင်းအန္တရာယ် အသိပညာပေးမှုများအတွက် လူသားချင်းစာနာထောက်ထားမှုဆိုင်ရာ အကူအညီများရရှိနိုင်ရေး၊ မပေါက်ကွဲသေးသော လက်နက်များ၊ လက်ရှိမိုင်းများကို ရှင်းလင်းရန်လည်း UNICEFက ဆိုသည်။

ပဋိပက္ခဖြစ်ပွားနေသည့် နေရာများရှိ ကလေးသူငယ်များ ဘေးအန္တရာယ် ကင်းစေရန်နှင့် ၎င်းတို့၏ အကာအကွယ် ရပိုင်ခွင့်များကို ပံ့ပိုးပေးရန် ယူနီဆက်က တောင်းဆိုကြောင်း ဖော်ပြထားသည်။

Public Service Announcement

ယူနီဆက်သည် မြေမြှုပ်မိုင်းအန္တရာယ်မှ ရှင်ကျန်ရစ်သူများကို ပံ့ပိုးရန်နှင့် မြေမြှုပ်မိုင်းများနှင့်အခြားပေါက်ကွဲစေတတ်သော လက်နက်အန္တရာယ်များအကြောင်းကို ကလေးသူငယ်များ၊ ၎င်းတို့၏ မိသားစုများနှင့် လူမှုအသိုက်အဝန်းများကို ပညာပေးရန်အတွက် မိတ်ဖက်များနှင့် လက်တွဲဆောင်ရွက်လျက်ရှိသည်ဟုလည်း အသိပေးထားသည်။