စစ်ကောင်စီတပ်က ထိုးစစ်ဆင်တိုက်ခိုက်ရန် ကားစီးရေ ၄၀ကျော်ဖြင့် စစ်ကူပို့​နေဟု MNDAA ထုတ်ပြန်

အာဏာသိမ်းစစ်ကောင်စီတပ်သည် ရှမ်းပြည်နယ်မြောက်ပိုင်း မူဆယ်မြို့နယ် ပန်ဆိုင်းဒေသသို့ စစ်ကား ၄၃စီး ထပ်မံ၍ စစ်ကူပို့လာကြောင်း ကိုးကန့်လက်နက်ကိုင်တပ်ဖွဲ့(MNDAA)က ထုတ်ပြန်သည်။

ဒီဇင်ဘာ ၇ ရက်တွင် စစ်ကောင်စီသည် စစ်ကား၂၃ စီးဖြင့် မူဆယ်မှ (၁၀၅)မိုင် သို့ချီတက်လာပြီးနောက် ဒီဇင်ဘာ ၉ရက်တွင် နမ့်ဖက်ကာမှ ၁၀၅မိုင် နှင့် ပန်ဆိုင်းဒေသသို့ စစ်ကူကား ၄၃စီး ထပ်မံ ချီတက်လာကြောင်း ဖော်ပြထားသည်။

စစ်ကောင်စီ၏ လုပ်ရပ်များသည် MNDAA နှင့် တိုက်ပွဲအကြီးအကျယ် ဖော်ဆောင်ရန် ပြင်ဆင် နေသည်ဟု သုံးသပ်မိကြောင်း MNDAAက ထုတ်ပြန်သည်။

ဒီကောင်စီတပ်သည် ဒီဇင်ဘာ ၉ရက် တစ်ရက်အတွင်း MNDAA တပ်ရှိရာ မန်ရန်တပ်စခန်း နှင့် ရှိကျိကျတောင်တန်းသို့ လက်နက်ကြီးများဖြင့် ဆက်လက် ပစ်ခတ်ခဲ့သည်ဟု ဆိုသည်။ ထို့ပြင် မန်ရန်တပ်စခန်းပေါ်တွင်လည်း ဒရုန်းဖြင့် ထောက်လှမ်းခဲ့ကြောင်း ဖော်ပြသည်။

Public Service Announcement

MNDAAနှင့် စစ်ကောင်စီတပ်သည် မုံးကိုးဒေသ၌ ဇူလိုင်လကတည်းက တိုက်ပွဲများ ဖြစ်ပွားနေခြင်းဖြစ်သည်။