ပဲခူးမြို့ရှိ အမျိုးသားလွှတ်တော်ကိုယ်စားလှယ်ဟောင်း ဦးဇေလတ်၏နေအိမ်ကို အကြမ်းဖက် စစ်ကောင်စီက ချိတ်ပိတ်လိုက်ကြောင်း ဒေသခံများက ပြောသည်။
အဆိုပါ လွှတ်တော်ကိုယ်စားလှယ်၏နေအိမ်ကို ယမန်နေ့(ဒီဇင်ဘာ ၁၆)တွင် စစ်ကောင်စီက စတင်ချိတ်ပိတ်လိုက်ခြင်းဖြစ်ပြီး တဆက်တည်းတွင် ပဲခူးမြို့နယ် ပြည်သူ့လွှတ်တော်ကိုယ်စားလှယ်နှင့် အမျိုးသားညီညွတ်ရေးအစိုးရ(NUG)ကျန်းမာရေးဝန်ကြီးလည်းဖြစ်သည့် ဒေါက်တာရွှေပုံ၏နေအိမ်ကိုပါ ချိတ်ခဲ့ခြင်း ဖြစ်သည်။
“ချိတ်ပိတ်တာကတော့ မနေ့(ဒီဇင်ဘာ ၁၆)က တစ်ရက်တည်းမှာပဲ အိမ်နှစ်လုံးစလုံးကို ပိတ်သွားတာပါ။ အိမ်တွေက လူမနေတော့ ကြာပါပြီ”ဟု ပဲခူးဒေသခံတစ်ဦးက ပြောသည်။
ဖေဖော်ဝါရီ ၁ ရက် စစ်တပ်ကအာဏာသိမ်းပြီးနောက်ပိုင်း အကြမ်းဖက်စစ်ကောင်စီမှ နွေဦးတော် လှန်ရေးနှင့်ဆက်နွှယ်သည့် အရပ်သားပြည်သူများ၏နေအိမ်နှင့် အဆောက်အအုံများကို ချိတ်ပိတ်ခြင်း၊ ၂၀၂၀ ရွေးကောင်ပွဲအနိုင်ရNLD လွှတ်တော်ကိုယ်စားများ၏နေအိမ်များကို ချိတ်ပိတ်ခြင်း၊ PDF တပ်ဖွဲ့ဝင်များ၏နေအိမ်ကို ချိတ်ပိတ်ခြင်းများအား ဆက်တိုက်လုပ်ဆောင်လျှက်ရှိသည်။
Public Service Announcement
ယမန်နေ့ကလည်း အမျိုးသားညီညွတ်ရေးအစိုးရ(NUG)မှ ဝန်ကြီးချုပ်မန်းဝင်းခိုင်သန်း၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာတူးခေါင်၊ ပြည်ထဲရေးဝန်ကြီး ဦးလွင်ကိုလတ် စသည့်ဝန်ကြီးများ၏ နေအိမ်များကို ချိတ်ပိတ်ခဲ့သည်။
