ကပ်ရောဂါကို ရင်ဆိုင်နေရချိန်မှာပဲ စစ်အာဏာသိမ်းမှုပါကြုံခဲ့ရပြီး ကဏ္ဍစုံနိမ့်ကျသွားတဲ့မြန်မာနိုင်ငံမှာ လာမယ့် ၂၀၂၂ ခုနှစ် အတွင်း ဆင်းရဲမွဲတွေသွားမယ့် လူဦးရေဟာ ၂၅ သန်းရှိလာမယ်လို့ ကုလသမဂ္ဂလူသားချင်းစာနာထောက်ထားမှုညှိနှိုင်းရေးရုံး(UNOCHA) က ခန့်မှန်းလိုက်ပါတယ်။
နိုင်ငံရဲ့စုစုပေါင်းလူဦးရေက ၅၄ သန်းကျော်ရှိတာဖြစ်လို့ နိုင်ငံသူနိုင်ငံသားထက်ဝက်နီးပါးက ဆင်းရဲမွဲတေမှုအခြေအနေနဲ့ ရင်ဆိုင်ကြရမှာဖြစ်ပါတယ်။
အဲဒီ ၂၅ သန်းအနက် ၁၄ သန်းကျော်သောပြည်သူတွေဟာ လူသားချင်းစာနာထောက်ထားမှုအကူအညီတွေလိုအပ်လာလိမ့်မယ်လို့လည်း ပြောထားပါတယ်။
၂၀၂၂ အတွက် UNOCHA ရဲ့ခန့်မှန်းမှုအရ လူသားချင်းစာနာထောက်ထားမှုအကူအညီတွေလိုအပ်လာမယ့် လူဦးရေ ၁၄ သန်းကျော်မှာ အရွယ်ရောက်ပြီးအသက်အရွယ်အုပ်စုက အများဆုံးပါဝင်နေတာကိုတွေ့ရပါတယ်။
Public Service Announcement
အဲဒီနောက်မှာတော့ အမျိုးသမီးတွေနဲ့ ကလေးသူငယ်တွေ ပါဝင်နေတာဖြစ်ပါတယ်။
နှစ်သစ် ၂၀၂၂ မှာ အကူအညီအများဆုံးလိုအပ်မယ့် ကဏ္ဍကတော့ စားနပ်ရိက္ခာ ဖြစ်ပြီး အကူအညီလိုအပ်မယ့်လူဦးရေက ၁၃ သန်းကျော်လောက် ရှိနေပါတယ်။
အဲဒီနောက်မှာတော့ ပညာရေးကဏ္ဍ၊ ကျန်းမာရေးစောင့်ရှောက်မှု တွေကပ်လိုက်နေတာပဲဖြစ်ပါတယ်။
ဒါ့အပြင် အာဟာရချို့တဲ့မယ့်သူဦးရေဟာ ၂ သန်းလောက်ထိရှိလာမှာဖြစ်ပြီး ကာကွယ်စောင့်ရှောက်မှုလိုအပ်တဲ့သူတွေ၊ ခိုလှုံစရာနေရာထိုင်ခင်းလိုမယ့်သူတွေ၊ ရေနဲ့ သန့်ရှင်းမှု လိုမယ့်သူတွေဟာလည်းသန်းနဲ့ချီ ရှိနေတယ်လို့ UNOCHA နဲ့ စာရင်းအရသိရပါတယ်။
