ကော့ကရိတ်မှာ အာဏာသိမ်းစစ်ကောင်စီရဲ့လက်နက်ကြီးပစ်ခတ်မှုကြောင့် ဒေသခံပြည်သူတစ်ဦး သေဆုံးသွားခဲ့ပြီး လေးဦးထိခိုက်ဒဏ်ရာရရှိမှု ဖြစ်ပွားခဲ့တယ်လို့ ဒေသခံတစ်ဦးရဲ့ ပြောကြားချက်အရ သိရပါတယ်။
ဇန်နဝါရီ ၈ ရက် ညပိုင်းအချိန်က စစ်ကောင်စီရဲ့လက်နက်ကြီးပစ်ခတ်မှုကြောင့် ကော့ကရိတ်မြို့အနီး ကမိုင်ကုန်းကျေးရွာက ဒေသခံပြည်သူတစ်ဦး သေဆုံးသွားခဲ့သလို တစ်ဦးထိမှန်ဒဏ်ရာရရှိသွားခဲ့တာပါ။
ဒီကနေ့ ဇန်နဝါရီ ၉ ရက် မနက်မှာလည်း စစ်ကောင်စီရဲ့လက်နက်ကြီးထပ်မံပစ်ခတ်မှုကြောင့် ကော့ကရိတ်မြို့အနီး မောင်းမရွာသစ်က ဒေသခံပြည်သူသုံးဦး ထိခိုက်ဒဏ်ရာရရှိသွားခဲ့တယ်လို့ ဒေသခံတစ်ဦးက ပြောပါတယ်။
ဇန်နဝါရီ ၈ ရက် မနက်ပိုင်း စစ်ကောင်စီရဲ့လက်နက်ကြီးပစ်ခတ်မှုကြောင့် ကော့နွဲ့ကျေးရွာအုပ်စု မြို့ဟောင်းကျေးရွာက ကလေးတစ်ဦးအပါအဝင် ဒေသခံ ၇ ဦး ထိမှန်ဒဏ်ရာရရှိခဲ့သေးတာ ဖြစ်ပါတယ်။ အဲ့ဒီအထဲက သုံးဦးကတော့ ဒဏ်ရာပြင်းထန်တယ်လို့ ဒေသခံတစ်ဦးက ဆိုပါတယ်။
Public Service Announcement
ကော့ကရိတ်မြို့နယ်မှာ စစ်ကောင်စီတပ်ဟာ နေ့စဉ်လိုလို လက်နက်ကြီးနဲ့ ရမ်းသမ်းပစ်ခတ်တာတွေ လုပ်ဆောင်ခဲ့တာကြောင့် ဒေသခံရွာသားတွေဟာ ရွာထဲမှာ မနေရဲတော့ဘဲ ထွက်ပြေးတိမ်းရှောင်နေခဲ့ရပြီး လက်ရှိမှာ စစ်ရှောင်ဦးရေဟာ ၂၀၀၀ ဝန်းကျင်အထိ ရှိလာပြီလည်း ဖြစ်ပါတယ်။
