စစ်တပ်ဆက်လက်ကျူးလွန်နေသော ဆိုးရွားသည့်လူ့အခွင့်အရေးချိုးဖောက်မှုများကို အီးယူထပ်မံပြစ်တင်

ဥရောပသမဂ္ဂသည် မြန်မာစစ်တပ် ဆက်လက်ကျူးလွန်နေသော ဆိုးရွားသည့်လူ့အခွင့်အရေးချိုး ဖောက်မှုများကို ထပ်မံပြစ်တင်ရှုတ်ချကြောင်း အီးယူအကြီးအကဲ ဂျိုးဆက်ဘော်ရယ်က ပြောသည်။

အထက်ပါ အီးယူအကြီးအကဲသည် အာဆီယံ၏ မြန်မာနိုင်ငံဆိုင်ရာအထူးကိုယ်စားလှယ်၊ ကမ္ဘောဒီးယားနိုင်ငံခြားရေးဝန်ကြီး ပရက်ဆော့ခွန်ကို ယမန်နေ့(ဇန်နဝါရီ ၂၀ ရက်)တွင် မြန်မာ့အရေးနှင့်ပတ်သက်၍ ဆက်သွယ်ပြောကြားသည်။

“အကျဉ်းသားအားလုံးကို ခြွင်းချက်မရှိ ပြန်လွှတ်ပေးဖို့နဲ့ ဒီမိုကရေစီနည်းကျရွေးကောက်ခံခေါင်းဆောင်တွေထံ အာဏာပြန်အပ်ဖို့ အီးယူက တောင်းဆိုပါတယ်” ဟု ဂျိုးဆက်ဘော်ရယ်က ပြောသည်။

ထို့အပြင် စစ်မက်ဖြစ်ပွားမှုအားလုံး ချက်ချင်းရပ်တန့်ရန် အရေးကြီးမှုနှင့် အာဆီယံရပ်တည်ချက်နှင့်အညီ အကူအညီလိုအပ်နေသူအားလုံးထံ နှောင့်နှေးကြန့်ကြာမှုမရှိဘဲ လူသားချင်းစာနာ မှုအကူအညီပေးရေးတို့ကို အီးယူအကြီးအကဲက ထပ်လောင်းတိုက်တွန်းသည်။

Public Service Announcement

မြန်မာ့အကျပ်အတည်း ငြိမ်းချမ်းစွာပြေလည်ဖြေရှင်းနိုင်ရေးအတွက် အားလုံးပါဝင်သည့် နိုင်ငံရေးတွေ့ဆုံ ဆွေးနွေးရေးကို ထပ်မံတိုက်တွန်းပြီး အာဆီယံဘုံဆုံးဖြတ်ချက် ၅ ရပ်ကို အကောင်အထည်ဖော်ရေး ဆက်လက်လုပ်ဆောင်မည့် အီးယူ၏ ကတိကဝတ်ကို ထပ်မံအတည်ပြုကြောင်း ဂျိုးဆက်ဘော်ရယ်က ပြောသည်။