VPN သုံးရင် ထောင် ၃ နှစ်ထိချဖို့ စစ်ကောင်စီခြေလှမ်းပြင်လာ

VPN သုံးရင် ထောင်ဒဏ် ၃ နှစ်အထိ ချလို့ရတဲ့ ဆိုင်ဘာလုံခြုံရေးဥပဒေ ကို ပြဌာန်းဖို့ စစ်ကောင်စီဟာ အာဏာသိမ်း တစ်နှစ် ပြည့်ခါနီးမှာ ခြေလှမ်းစလာပါတယ်။

စစ်အာဏာရှင်အမြစ်ဖြုတ်ရေး တော်လှန်ရေးကိုအထောက်အကူ ပြုနေတဲ့ သတင်းအချက်အလက် စီးဆင်းမှု ၊ အွန်လိုင်းသပိတ်တွေ ၊ တော်လှန်ရေးအောင်မြင်ရေးထောက်ပံ့မှုတွေကို ဖြတ်တောက်အရေးယူဖို့ အတွက်စစ်ကောင်စီက ဆိုင်ဘာလုံခြုံရေးဥပဒေ ပြဌာန်းဖို့ ပြင်လာတာပါ။

အဲဒီဥပဒေကြမ်းထဲမှာ ခွင့်ပြုချက်မရဘဲ VPN နည်းပညာ သုံးရင် အနည်းဆုံး ထောင်ဒဏ် ၁ နှစ်ကနေ အများဆုံးထောင်ဒဏ် ၃ နှစ် ထောင်ဒဏ်ဖြစ်ဖြစ် ၊ ကျပ်သိန်း ၅၀ ထက်မပိုတဲ့ငွေဒဏ်ဖြစ်စေ ၊ ဒဏ် ၂ ရပ်လုံးကိုဖြစ်စေချနိုင်တယ်လို့ရေးဆွဲထားတာတွေ့ရပါတယ်။

ဒါဟာ မြန်မာနိုင်ငံမှာ အင်တာနက် သုံးစွဲနေသူ အားလုံးကို အချိန်မရွေးထောင်ထဲ ထည့် အောင်ရည်ရွယ်တာဖြစ်တယ်လို့ ဘလော့ဂါ တစ်ဦးဖြစ်ခဲ့သူ NLD အမတ်ဟောင်း ဦးနေဘုန်းလတ်က ပြောထားပါတယ်။

Public Service Announcement

စစ်တပ်က အာဏာသိမ်းပြီးတဲ့နောက် ပြည်တွင်းမှာ လူသုံးများတဲ့ ဖေ့ဘွတ်ခ်အပါအဝင် အင်တာနက်ဝက်ဆိုက်တွေကို ပိတ်ပင်ထားတာဖြစ်ပါတယ်။

ဒီလိုပိတ်ပင်တာဟာ စစ်တပ်ရဲ့ကျုးလွန်မှုတွေကို ပြည်သူအများသိနိုင်အောင် ဖော်ပြ‌‌ေနတာ ၊ လူမှုကွန်ရက်ဟာ တော်လှန်ရေးကို များစွာအထောက်အကူဖြစ်နေတာကို ဖြတ်တောက်ချင်တာကြောင့် ဖြစ်ပါတယ်။

ဒါကြောင့် ပြည်သူတွေဟာ စစ်ကောင်စီပိတ်ပင်ထားတဲ့ လူမှုကွန်ရက်ကိုသုံးစွဲဖို့အပြင် ကိုယ်ရေးကိုယ်တာအချက်အလက်တွေကို လုံခြုံအောင် VPN နည်းပညာ ကို အသုံးပြုနေကြရတာပါ။

VPN ဟာဆိုရင် ကွန်ပျုတာကွန်ယက်တစ်ခုဖြစ်ပြီး အသုံးပြု သူတို့ရဲ့ အချက်အလက်တွေကို လုံခြုံအောင် စွမ်းဆောင်ပေးတဲ့ အင်တာနက် ကြားခံ ဖြစ်ပါတယ်။ ဒါအပြင် ပိတ်ပင်ထားတဲ့ ဝက်ဆိုက်တွေ ၊ လူမှုကွန်ရက်တွေကို VPN သုံးပြီးကြည့်နိုင်ပါတယ်။

မြန်မာပြည်သူက အင်တာနက် သုံးစွဲသူတိုင်းဟာ VPN ကိုအသုံးပြုနေတာကြောင့် စစ်ကောင်စီပြဌာန်းဖို့ခြေလှမ်းပြင်နေတဲ့ ဥပဒေဟာ မြန်မာနိုင်ငံကို ထောင်ဝန်းနံရံ ခတ်လိုက်သလိုဖြစ်လာပါတယ်။