ရုရှားသည် အကြမ်းဖက်မြန်မာစစ်တပ်အတွက် သံချပ်ကာယာဉ်များကို ဇန်နဝါရီ ၂၄ ရက်တွင် ရန်ကုန်မြို့ သီလဝါဆိပ်ကမ်းသို့ ပို့ဆောင်ပေးခဲ့ကြောင်း Myanmar Witness က အတည်ပြု ထုတ်ပြန်သည်။
Myanmar Witness သည် ရုရှားလက်နက်များ မြန်မာနိုင်ငံသို့ ရောက်ရှိလာသော အကြောင်းကို အသေးစိတ်စုံစမ်းခဲ့ပြီး ဇန်နဝါရီ ၂၄ ရက်တွင် ရုရှားလုပ် BRDM-2M 4X4 သံချပ်ကာယာဉ်များကို ပို့ဆောင်ခဲ့ကြောင်း Open Source မှရရှိသော သတင်းအချက်အလက်များအရ အတည်ပြုခြင်းဖြစ်သည်။
Myanmar Witness မှရရှိသောပုံများတွင် အချို့ယာဉ်များမှာ BRDM-2M သံချပ်ကာ ကင်းထောက်/ကင်းလှည့်ယာဉ်များ ဖြစ်ပြီး BRDM-2M သည် ဆိုဗီယက် BRDM-2 ယာဉ်၏ အဆင့်မြှင့်တင်ထားသော ဗားရှင်းဖြစ်သည်ဟု ဆိုသည်။
SIPRI ၏ လက်နက်ကုန်သွယ်မှုမှတ်ပုံတင်မှုများအရ ရုရှားနှင့်မြန်မာအကြား ၂၀၁၉ တွင် BRDM-2M အရေအတွက်မဖော်ပြနိုင်သော သဘောတူညီချက်တစ်ခုရရှိခဲ့ပြီး မတင်ပို့မီ ၎င်းတို့ကို BRDM-2M ဗားရှင်းသို့ အဆင့်မြှင့်တင်ရမည်ဖြစ်ကြောင်း သိရသည်။
အဆိုပါ သံချပ်ကာယာဉ်များကို သယ်ဆောင်လာသော အထွေထွေကုန်တင်သင်္ဘော CAPTAIN YAKUBOVICH သည် ဇန်နဝါရီ ၂၄ ရက် UTC စံတော်ချိန် ၀၃ နာရီ ၁၃ မိနစ်တွင် ရန်ကုန်မြို့သို့ ရောက်ရှိကာ သီလဝါဆိပ်ကမ်းသို့ ဆိုက်ကပ်ခဲ့ခြင်းဖြစ်သည်။
ရက်စက်ကြမ်းကြုတ်သည့်ရာဇဝတ်မှုများဆက်လက်ကျူးလွန်နေသော စစ်ကောင်စီထံ လက်နက်ရောင်းချမှုရပ်တန့်ရန် အချိန်တန်ပြီဟု Justice for Myanmar က ယနေ့တောင်းဆိုထုတ် ပြန်ထားသည်။
Justice for Myanmar ၏ ထုတ်ပြန်ချက်အရ ပြီးခဲ့တဲ့ ဆယ်စုနှစ် ၂ ခုအတွင်း လေယာဉ်များ၊ ဒုံးလက်နက်များ၊ သင်္ဘောများ၊ စက်အင်ဂျင်များ၊ အမြောက်များ၊ သံချပ်ကာယာဉ်များ၊ ရေတပ်လက်နက်များကို တရုတ်၊ ရုရှား၊ ယူကရိန်း၊ အစ္စရေး၊ ဆားဘီးယားတို့က အများဆုံးတင်ပို့ရောင်းချ ခဲ့သည်။
ကုလသမဂ္ဂအထွေထွေညီလာခံက မြန်မာနိုင်ငံသို့ လက်နက်စီးဝင်မှုကို တားမြစ်ရန် ၂၀၂၁ ဇွန် လကတည်းက ဆုံးဖြတ်အတည်ပြုထားသော်လည်း အကြမ်းဖက်မြန်မာစစ်တပ်ထံ လက်နက် ရောင်းချပံ့ပိုးနေသည့် နိုင်ငံများ ရှိနေဆဲဖြစ်သည်။