တိုက်ချီဒို သေဆုံးတယ်ဆိုတာ ကောလဟလသာဖြစ်
ဒေါ်လာနဲ့ရွှေချောင်းတွေ ပေးရတယ်ဆိုတဲ့ ဦးဖြိုးမင်းသိန်း ရဲ့ထွက်ဆိုချက်အရ စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် စွဲဆိုထားတဲ့အဂတိအမှုကို စွဲချက်တင်၊ မတင် လျှောက်လဲချက်ပေးတော့မှာပါ။
အဲဒီအမှုကို ဒီနေ့ နေပြည်တော်က အထူးတရားရုံးမှာ ဆက်လက်စစ်ဆေးခဲ့ပြီး စစ်ကောင်စီဘက်က တရားလိုပြသက်သေအဖြစ် သက်သေ ငါးဦးကိုတင်သွင်းခဲ့တယ်လို့ သိရပါတယ်။
အဲဒီသက်သေ ငါးဦးလုံးဟာ ရဲအရာရှိတွေဖြစ်နေပါတယ်။
ဒီအမှုမှာ စစ်ဆေးစရာသက်သေတွေ ဆက်ရှိနေသေးပေမယ့် စွဲချက် တင်သင့် မသင့်ကို လာမယ့်ဖေဖော်ဝါရီလ ၁၈ ရက်မှာ နှစ်ဖက်လျှောက်လဲချက်ပေးရတော့မယ်လို့ တရားရုံးနဲ့နီးစပ်သူတွေထံကသိရပါတယ်။
ဒါအပြင် ဒေါ်ခင်ကြည်ဖောင်ဒေးရှင်းနဲ့ပတ်သက်ပြီး ဒေါ်အောင်ဆန်းစုကြည်အပေါ် စွဲဆိုထားတဲ့ အမှု လေးမှု ၊ ရဟတ်ယာဉ် ဌားရမ်းဝယ်ယူမှုနဲ့စွပ်စွဲထားတဲ့အမှု ငါးမှုတို့ကိုလည်း အဲဒီဖေဖော်ဝါရီလ ၁၈ ရက်ကို ချိန်းဆိုထားပါတယ်။
သားအငယ်ဆုံးလက်ဆောင်ပေးသွားတဲ့ တိုက်ချီဒိုခွေးလေး သေဆုံးတယ်ဆိုတဲ့ ကောလဟလတွေ မမှန်ကြောင်း တရားရုံးအပြီးမှာ ဒေါ်အောင်ဆန်းစုကြည်ကပြောခဲ့တယ်လို့ တရားရုံးနဲ့နီးစပ်သူတွေထံက သိရပါတယ်။
ဒါပေမယ့် တိုက်ချီဒို ရဲ့ကျန်းမာရေးမကောင်းဘူးလို့သိရပါတယ်။