မတည်မငြိမ်ဖြစ်အောင် လှုံဆော်မှု ရာဇသတ်ကြီး ပုဒ်မ ၅၀၅ (က) နဲ့ ကျောင်းသားလူငယ် ၄ ဦးကို စစ်ကောင်စီဟာ ဒီနေ့မှာ အလုပ်ကြမ်းနဲ့ထောင်ဒဏ် ၃ နှစ်စီ အသီးသီးချလိုက်တယ်လို့သိရပါတယ်။
ကမာရွတ်မြို့နယ်တရားရုံးကနေ ကိုဝေယံဖြိုးမိုး၊ ကိုဆစ်နိုင်၊ ကိုလေပြေစိုးမိုး၊ ကိုသုတစိုး တို့ကို ထောင်ချလိုက်တာပါ။
ကိုဝေယံဖြိုးမိုးဟာ ဗကသများအဖွဲ့ချုပ် ရဲ့ ဒုတိယဥက္ကဋ္ဌဖြစ်ပြီး ကိုဆစ်နိုင်က ဗကသ ဗဟို အမှုဆောင်အဖွဲ့ဝင်ဖြစ်ပါတယ်။
ကိုလေပြေစိုးမိုးကတော့ ရန်ကုန်တက္ကသိုလ် ကျောင်းသားများသမဂ္ဂရဲ့ ဗဟိုအလုပ်အမှုဆောင်ဖြစ်သလို ကိုသုတစိုးဟာ ရန်ကင်းပညာရေးကောလိပ်ကျောင်းသားများသမဂ္ဂ ဥက္ကဋ္ဌ ဟောင်းတစ်ဦးပါ။
သူတို့ ၄ ဦးထဲမှာ ကိုဝေယံဖြိုးမိုးဟာ ဒုတိယအကြိမ် ထောင်ဒဏ်ချခံရတာဖြစ်ပြီး ပြီးခဲ့တဲ့ ဒီဇင်ဘာလအတွင်းက ထောင်ဒဏ် ၂ နှစ်နဲ့ ၁ လ ချထားပြီးဖြစ်ပါတယ်။
ဒါအပြင် သူတို့တွေဟာ ထောင်တွင်းဆန္ဒပြပွဲတွေမှာ ဦးဆောင်တယ်ဆိုပြီး ထောင်အာဏာပိုင်တွေရဲ့ ဖိနှိပ်ရိုက်နှက်မှုကိုခံရသလို တိုက်ပိတ်ထားတာကိုလည်းကြုံခဲ့ရသူတွေဖြစ်ပါတယ်။