ကွန်ဂိုနိုင်ငံမှာ ဆိုးရွားတဲ့ မီးလောင်မှု တစ်ခုကြောင့် ကျောင်းသူကျောင်းသား နှစ်ဒါဇင်ကျော် အပါအဝင် လူအများအပြား သေဆုံးခဲ့ကြောင်း သိရပါတယ်။
အစိုးရကို ဆန့်ကျင် တိုက်ခိုက်နေတဲ့ M23 သူပုန်အဖွဲ့က မနှစ်ကတည်းက ထိန်းချုပ်ထားရာ ဘူကာဗူမြို့မှာ စက်တင်ဘာ ၁၀ ရက်နေ့တုန်းက မီးလောင်မှု ဖြစ်ခဲ့တာပါ။ လူနေအိမ် တစ်လုံးက စတင်လောင်ကျွမ်းတဲ့ မီးဟာ လျင်လျင်မြန်မြန် ကူးစက် ပျံ့နှံ့သွားပြီး မူလတန်းကျောင်း တစ်ကျောင်း၊ အလယ်တန်းကျောင်း တစ်ကျောင်းနဲ့ အိမ်ခြေ ၃၀၀ လောက် ပျက်စီးခဲ့ပါတယ်။
မီးလောင်နေချိန်မှာ ကျောင်းတွေထဲက ကလေးတွေ ကြောက်လန့်တကြား စုပြုံထွက်ပြေးရင်း အချင်းချင်း ပိမိ၊ နင်းမိကြရာက သေဆုံးမှုတွေ များပြားခဲ့တာလို့ ဆိုပါတယ်။ ပြီးတော့ သေသူတွေထဲမှာ အရွယ်ရောက်ပြီးသူတွေလည်း ပါဝင်ပြီး သေဆုံးသူ များပြားမယ်လို့ ယူဆရပါတယ်။
ဘူကာဗူရဲ့ လူနေသိပ်သည်းရာ ကာဒူတူ ရပ်ကွက်ထဲက မီးလောင်မှုကို နာရီပေါင်း အတော်ကြာ အချိန်ယူ ငြှိမ်းသတ်ခဲ့ရပါတယ်။ ဒဏ်ရာ ရရှိသူတွေကိုလည်း ကယ်ဆယ်ရေးတွေက ဆေးရုံတွေဆီ တင်ပို့ခဲ့ရပါတယ်။ လူမှုကွန်ရက်ပေါ် ပျံ့နှံ့လာတဲ့ ဗီဒီယိုတွေထဲမှာတော့ ဆေးရုံကြမ်းပြင်ပေါ်မှာ ကလေးတွေ မလှုပ်မယှက် လှဲလျောင်းနေပုံတွေကိုလည်း တွေ့ခဲ့ရပါတယ်။
Public Service Announcement
မီးကဘယ်လို စတင်လောင်ကျွမ်းခဲ့တာလဲ ဆိုတာကိုတော့ ရှင်းရှင်းလင်းလင်း မသိရသေးပါဘူး။ မြို့ကို ထိန်းချုပ်ထားတဲ့ M23 သူပုန်တွေက သေဆုံးသူ အရေအတွက်ကို တိတိကျကျ မထုတ်ပြန်သေးပါဘူး။
မြို့တော် ကင်ရှာဆာမှာ ရှိနေတဲ့ ကွန်ဂို အစိုးရရဲ့ ပညာရေး ဝန်ကြီးဌာနကတော့ ဘူကာဗူမှာ ဖြစ်ပွားတဲ့ မီးလောင်မှုအတွင်း ကျောင်းသူကျောင်းသားတွေ သေဆုံးခဲ့တဲ့ သတင်းကြောင့် အထူးဝမ်းနည်း ကြေကွဲမိတယ်လို ထုတ်ပြန်ခဲ့ပါတယ်။
ကင်ရှာဆာမှာလည်း ပြီးခဲ့တဲ့ သီတင်းပတ်ကုန်တုန်းက မင်္ဂလာ ခန်းမတစ်ခုမှာ မီးလောင်ရာက လူတွေ အထိတ်တလန့် ထွက်ပြေးရင်း ပိမိနင်းမိလို့ လူ့အသက်တွေ ဆုံးရှုံးခဲ့ရပါတယ်။
တောင်ပိုင်းက ကီဗူပြည်နယ်ရဲ့ မြို့တော် ဘူကာဗူဟာ ကွန်ဂိုမှာတော့ လူနေ အထူထပ်ဆုံး တောင်ပေါ်ဒေသ တစ်ခုလည်း ဖြစ်ပါတယ်။
ကိုးကား: BBC
