အင်းစိန်မြို့နယ် ပြည်သူ့လွှတ်တော်ကိုယ်စားလှယ် ဦးမောင်မောင်ဦး၏ နေအိမ်ကို အကြမ်းဖက်စစ်ကောင်စီက ယနေ့ ချိတ်ပိတ်သည်။
“ကျွန်တော် ဦးမောင်မောင်ဦး အင်းစိန်မြို့နယ် ပြည်သူ့လွှတ်တော်ကိုယ်စားလှယ်၏ နေအိမ်ကို ယနေ့ 2.3.2022 နေ့နံနက် (9:45)ခန့်က အကြမ်းဖက် စစ်ကောင်စီက မတရား ဝင်ရောက် ချိတ်ပိတ်သွားပါတယ်” ဟု ဦးမောင်မောင်ဦးက ဖေ့စ်ဘွတ်လူမှုကွန်ရက်တွင် ရေးသားအသိပေး ထားသည်။
ဦးမောင်မောင်ဦးသည် ၂၀၂၀ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်ပါတီကိုယ်စားပြုကာ ရွေးကောက်ပွဲအနိုင်ရခဲ့သူဖြစ်သည်။ စစ်တပ်က နိုင်ငံတော် အာဏာသိမ်းပြီးနောက် မိသားစုလိုက်တိမ်းရှောင်ခဲ့ပြီး ယခုအခါ လုံခြုံစိတ်ချရသော နေရာတွင် ရှိနေသည်ဟု သိ့ရသည်။
“အင်းစိန်မြို့မရဲစခန်း(ပ)၄၅၈/၂၀၂၁ အကြမ်းဖျက်တိုက်ဖျက်ရေးဥပဒေပုဒ်မ ၅၀(က)အမှု ဖြင့်ခေတ္တပိတ်ထားပါသည်” ဟု ဦးမောင်မောင်ဦးအိမ်ကို စစ်ကောင်စီက စာချိတ်၍ ပိတ်သွားသည်ကိုတွေ့ရသည်။
အကြမ်းဖက်စစ်ကောင်စီသည် ၄င်းတို့အားဆန့်ကျင်သူများ၏ နေအိမ်များ၊ ပိုင်ဆိုင်မှုများကို လိုက်လံသိမ်းဆည်းပြီး လူထုတော်လှန်ရေးအရှိန်လျော့အောင် ကြိုးစားနေသည်။
“စစ်အာဏာရှင်အုပ်ချုပ်နေသ၍ ဒီအဖြစ်အပျက်မျိုးတွေက မဆန်းပါဘူး။အောင်ပွဲနှင့်အတူပြန်လည်ဆုံတွေ့ကြပါစို့” ဟု ဦးမောင်မောင်ဦးက ရေးသားထားသည်။